Azərbaycan
telekommunikasiyası inkişaf yolunda
Ölkəmizdə
neftdən sonra prioritet
sahə kimi məhz informasiya
və kommunikasiya texnologiyaları önə
çıxır
Azərbaycan
İKT-də dinamik inkişaf
tempinə görə MDB ölkələri arasında birincidir
İstənilən
cəmiyyətdə davamlı sosial-iqtisadi inkişafa və
yeniləşməyə yalnız çoxmülkiyyətli
iqtisadiyyat, azad rəqabət, dünya iqtisadiyyatına
inteqrasiya və liberal qiymətlər şəraitində nail
olmaq mümkündür. Azərbaycan da 1991-ci ildə dövlət
müstəqilliyini bərpa etdikdən sonra iqtisadi sahədə
öz suveren hüquqlarını gerçəkləşdirməyə
və müstəqil siyasət aparmağa başladı. Bu
siyasətin tərkib hissələrindən biri də rabitə
və informasiya texnologiyalarının inkişaf etdirilməsi
idi. Ümummilli lider Heydər Əliyevin 2003-cü ildə təsdiq
etdiyi “Azərbaycan Respublikasının inkişafı naminə
informasiya-kommunikasiya texnologiyaları üzrə Milli Strategiya
(2003-2012-ci illər)” bu istiqamətin ölkəmiz
üçün vacibliyini və əhəmiyyətini
vurğulayan ilk rəsmi sənəd oldu. Qloballaşma
dövrünün reallıqları nəzərə
alınaraq çevik və təkmil idarəetməni təmin
edəcək “elektron hökumət”in yaradılması da sənəddə
vacib məsələlərdən biri kimi önə çəkildi.
Strategiya informasiya və kommunikasiya texnologiyalarının
(İKT) dövlət orqanlarında istifadəsinin səmərəliliyinin
artırılması, əhalinin bu orqanlarla əlaqələrində
ünsiyyətinin asanlaşdırılması və
bürokratik əngəllərin aradan qaldırılması,
ölkədə yaradılan müxtəlif təyinatlı
informasiya sistemlərinin qarşılıqlı
uzlaşmasının əsasını qoydu. Son 8 ildə bu
siyasəti uğurla davam etdirən Prezident İlham Əliyev
isə hələ 2003-cü ilin dekabrında Cenevrədə
İKT üzrə keçirilən ümumdünya sammitində
çıxış edərkən demişdi ki, Azərbaycanda
neftdən sonra prioritet sahə məhz informasiya və
kommunikasiya texnologiyaları olmalıdır. Ölkə
başçısı, «qara qızılın insan
qızılına» çevrilməsinin vaxtının
çatdığını bildirmişdi: «...Bizim gənc nəslimiz
bilikli, dünyada gedən proseslərə bələd
olmalıdır, izləməlidir. Ən qabaqcıl
texnologiyalar Azərbaycana gəlməlidir. Bir sözlə,
ölkənin inkişafı məhz bu istiqamətdə davam
etməlidir. Dünyada uğur qazanmış, inkişaf
etmiş ölkələrin təcrübəsinə baxsaq,
görərik ki, o inkişafın, tərəqqinin əsas səbəbləri
təbii ehtiyatlar deyildir. Məhz bilik, savad, yeni texnologiyalar -
bütün bunlar ölkəyə uğur, rifah gətirir,
inkişaf, müasirlik gətirir». Həmin vaxtdan başlayaraq
İKT sahəsində yüksək ixtisaslı kadrların
hazırlanması məqsədilə dünyanın
tanınmış informasiya texnologiyaları universitetləri
ilə əlaqələr quruldu və «Azərbaycan gənclərinin
xarici ölkələrdə təhsili üzrə Dövlət
Proqramı»na əsasən tələbələr xaricə
göndərildi. Məktəblərin kompyuterləşdirilməsi,
gənclərin virtual dünyaya
çıxışının təmin edilməsi,
onların informasiya texnologiyaları ilə işləmək vərdişlərinə
yiyələnmələri üçün atılan məqsədyönlü
addımlar da məhz bu məqsədə xidmət etdi.
AZƏRBAYCAN
İKT SAHƏSİNDƏ REGİONAL MƏRKƏZƏ
ÇEVRİLİR
Prezidenti
İlham Əliyevin rəhbərliyi ilə həyata
keçirilən İKT siyasəti və onun ölkəmizdə
ən yeni texnologiyaların tətbiqi üzrə məramının
reallaşdırılması isə Azərbaycanın yaxın
gələcəkdə İKT sahəsində dünyanın
qabaqcıl ölkələrinin sırasında
olacağına zəmanət verir. Buna nail olmaq məqsədilə
respublikada informasiya-kommunikasiya texnologiyaları sahəsinin
inkişafının sürətləndirilməsi,
normativ-hüquqi bazanın təkmilləşdirilərək
Azərbaycanın tərəfdar çıxdığı
beynəlxalq müqavilələrə
uyğunlaşdırılması, telekommunikasiya və
poçt xidmətləri bazarının
liberallaşdırılması və özəl sektorun
inkişafına diqqət artırıldı. 2004-cü ildə
«Poçt rabitəsi haqqında», «Elektron imza və elektron sənəd
haqqında», 2005-ci ildə «Telekommunikasiya haqqında», «Elektron
ticarət haqqında» qanunlar qəbul olundu. Azərbaycan
Prezidentinin 21 oktyabr 2005-ci il tarixli sərəncamı ilə
«Azərbaycan Respublikasında rabitə və informasiya
texnologiyalarının inkişafı üzrə 2005-2008-ci illər
üçün Dövlət Proqramı» («Elektron Azərbaycan»)
təsdiq edildi. Onlar ölkədə elektron sənəd
dövriyyəsinin yaradılmasına və elektron imza tətbiq
edilən yeni proseslərin, o cümlədən yeni iqtisadi fəaliyyət
sahələrinin inkişafına şərait yaratdı,
telekommunikasiya resurslarının məqsədyönlü
planlaşdırılmasına və ədalətli istifadə
olunmasının tənzimlənməsini təmin etdi. Prezident
İlham Əliyevin “Xüsusi iqtisadi zonaların
yaradılması haqqında” 2007-ci il 6 mart tarixli fərmanı
da ölkədə İKT sektorunun inkişafına münbit zəmin
yaratdı. Bu fərmanda müəyyən edilən məqsədlərin
reallaşdırılması ölkədə texnoparkların,
texnopolislərin, innovasiya mərkəzlərinin
yaradılmasına, alim və mütəxəssislərin
elmi-texniki potensialından daha səmərəli istifadə etməyə,
rəqabətədavamlı, elmtutumlu məhsulların
istehsalına, nəticə etibarilə, informasiya cəmiyyətinin
əsasını təşkil edən biliklər
iqtisadiyyatının formalaşmasına imkan yaratdı. Təkcə
son beş ildə Azərbaycan bazarlarına və regiondakı
digər bazarlara 500-dək yeni İT - şirkət
çıxdı. Azərbaycanda "Elektron hökumət"
portalı üzrə xidmətlərin sayı isə 49-a çatdı.
"Elektron xidmətlərin yeni növləri
hazırlandıqdan sonra nazirlik və idarələrin sayı
300-ə çatan elektron xidmətlərinin siyahısı təsdiqlənəcək.
Görülən işlər korrupsiyaya qarşı
mübarizə sahəsində də önəmli oldu.
Çünki elektron xidmətlər dövlət
qurumlarının vətəndaşlarla təmasını
azaltmaqla onların fəaliyyətində şəffaflığın
artmasına yardım etdi. Bu gün Azərbaycanın qlobal
informasiya məkanına inteqrasiyanın genişləndirilməsi,
informasiya təhlükəsizliyinin gücləndirilməsi,
yeni texnologiyaların tətbiqi, regional telekommunikasiyalar
bazarına çıxışın təmin edilməsi və
cəmiyyətin müasir xidmətlərə artan tələbatının
ödənilməsi üçün milli telekommunikasiya peykinin
hazırlanması və orbitə çıxarılması
üzrə işlər aparılır. Kosmik sənayenin
inkişafı üçün iki telekommunikasiya süni
peykinin orbitə çıxarılması üçün
texniki-iqtisadi əsaslandırma və kontraktlar tərtib edilib.
Hər iki layihə kommersiya tipli və rentabellidir. Bu layihənin
əhəmiyyətini qiymətləndirməmək olmaz. O, Azərbaycanın
İnformasiya mübadiləsinin xarici ölkələrdən
asılığının aradan qaldırılması,
iqtisadi və informasiya təhlükəsizliyinin təmin
olunmasına xidmət edəcək. Birinci süni peykimiz
2012-ci ildə orbitə çıxarılacaqdır.
Telekommunikasiya peykinin orbitə çıxarılması, idarə
edilməsi və istismarı işlərinin həyata
keçirilməsi üçün «Azərkosmos» ASC-yə
2012-ci ildə büdcədən 3,6 milyon manat ayrılması
nəzərdə tutulub. Beləliklə, Azərbaycan çox
ciddi kosmik sənayeyə malik ölkəyə çevrilir.
Görülən işlər nəticəsində ölkədə
normal rəqabət mühitinə malik olan, böyük həcmdə
investisiya qəbul edən müasir İKT bazarı
yaradıldı. Bir çox beynəlxalq təşkilatlar bu
sahədə Azərbaycanla əməkdaşlığa
hazır olduqlarını bildirdi. Avrasiya transmilli informasiya
magistralı, Avropa-Yaxın Şərq yüksəksürətli
informasiya şəbəkəsi kimi layihələr buna
misaldır. Xəzər və Qafqaz regionlarının ən
iri telekommunikasiya tədbiri olan “BakuTel-2011” sərgisi
cözügedən prosesi əyani şəkildə əks
etdirir.
AZƏRBAYCAN
BİRİNCİDİR
Bu gün
Azərbaycanın informasiya və kommunikasiya texnologiyaları
(İKT) sektoru öz inkişaf templərinə görə
qeyri-neft sektorunun sənaye sahələri arasında birinci yeri
tutur, yaxın 10-15 ildə gəlirlərin həcminin neft ixracından
əldə edilən gəlirlərə
çatdırılması nəzərdə tutulur. 2003-2010-cu
illər ərzində bu sahədə orta illik artım sürəti
30-32 faiz səviyyəsində olub. Halbuki dünya üzrə
illik artım orta hesabla cəmi 10 faiz təşkil edib.
Yalnız böhranlı 2009-cu il istisna təşkil edib, həmin
il artım dinamikası 13-14 faizə düşüb.
Strategiyanın qəbul olunmasından keçən yeddi ildə
İKT sektorunun həcmi 5 dəfə artaraq 2010-cu ildə 1,5
milyard ABŞ dolları təşkil edib. Bu isə
bütövlükdə ÜDM-in 1,9 faizinə və qeyri-neft
sektorunda ÜDM-in 4,3 faizinə bərabər olub. 2010-cu ildə
İKT və poçt rabitəsi sektoru üzrə gəlir həcmi
2009-cu illə müqayisədə 32,1 faiz artaraq 1230,2 milyon
manat təşkil edib. Bu sektora 2010-cu ildə ümumilikdə
300 milyon dollar sərmayə qoyulub. İnkişaf tempi 2011-ci
ildə də davam edib. 2011-ci ilin 9 ayı ərzində rabitə
və informasiya-kommunikasiya texnologiyaları sektorunda əldə
olunan gəlirlər ötən ilin müvafiq dövrü ilə
müqayisədə 12.4 faiz artaraq 932.9 milyon manat təşkil
edib. Artım tempi İKT sektorunda 12,1 faiz, o cümlədən
telekommunikasiya sektorunda 8,3 faiz, İT sektorunda 1,6 dəfə,
poçt sektorunda 5,7 faiz, informasiya sektorunda isə 38,8 faizə
bərabər olub. Telekommunikasiya sektoru üzrə gəlirlərin
67,5 faizi mobil operatorların payına düşməklə,
mobil sektor üzrə real artım tempi 3.4 faiz təşkil edib. İKT üzrə
özəl sektorun fəaliyyəti də ildən-ilə
güclənir və hazırda bu sahədə əldə
olunan gəlirin təqribən 80
faizi qeyri-dövlət müəssisələrinin
payına düşür. Gələn il dövlət büdcəsindən
İKT sahəsinə 23,3 milyon manat həcmində vəsaitin
ayrılması nəzərdə tutulub. Hesabat dövründə
mobil abunəçilərin sayı isə 10 milyona yaxın
olub ki, bu da o deməkdir ki, indi Azərbaycanda hər 100 nəfərə
təxminən 105 mobil telefon düşür. Hazırda mobil
operatorlar tərəfindən üçüncü nəsl
(3G) mobil rabitə texnologiyası respublikamızda tətbiq
olunur. “İndi 4G ilə əlaqədar, yəni yeni
texnologiyanın lisenziyasının verilməsi ilə
bağlı mobil operatorlara məlumat verilib. Bu texnologiya imkan
verir ki, mobil telefonlar vasitəsilə təkcə danışıqlar
yox, yeni xidmətləri də həyata keçirmək
mümkün olsun. Bu yeni texnologiya istifadədə olan məişət
avadanlıqlarını, kiçik qurğuları mobil
telefonlar vasitəsilə uzaqdan idarə etməyə imkan verəcək”,-rabitə
və informasiya texnologiyaları naziri Əli Abbasov bildirib. Onun
sözlərinə görə, artıq gələn ilin may
ayına qədər Azərbaycanda 4G texnologiyasının tətbiqinə
başlanacaq. Bundan başqa, hava
gəmilərinin göyərtələrində səs rabitəsi,
sms və məlumatların ötürülməsinin internet
xidmətindən istifadə etmək mümkün olacaq.
Əhalinin
kompyuterlərdən istifadə imkanları da genişlənib.
Ölkəmizdə əhalinin hər 100 nəfərinə
düşən kompyuterlərin sayı 15, internet istifadəçilərinin
sayı isə 60-a bərabər olub. Onların 30 faizdən
çoxu genişzolaqlı xidmətlərdən istifadə edir.
Bu isə ümumdünya orta göstəricisindən 2 dəfə
çoxdur. MDB ölkələri arasında ilk olaraq Azərbaycanda
sabit telefon şəbəkəsi tam
elektronlaşdırılıb. Əldə olan uğurları
Prezident İlham Əliyev də yüksək qiymətləndirib:
«Biz qısa müddət ərzində Azərbaycanda informasiyakommunikasiya
texnologiyaları sahəsində demək olar, inqilab yarada
bildik. Qarşıdakı illərdə bu sahənin çox
böyük gələcəyi var».
Azərbaycan
İKT-də dinamik inkişaf tempinə görə MDB ölkələri
arasında ön sıradadır. Davos Dünya İqtisadi
Forumunun “Global İnformation Technologies 2009-2010” hesabatında Azərbaycan
əvvəlki illərdə olduğu kimi MDB ölkələri
arasında liderliyini qoruyub saxlayıb və bu “şəbəkə
hazırlığı indeksinə” (Networked Readiness Index)
görə dünyanın 133 ölkəsi arasında 64-cü
yeri paylaşıb. Azərbaycan bu reytinqin ilk yarısına
düşən yeganə MDB ölkəsidir. 2010-2011”
hesabatında isə Azərbaycan dünyanın 138 ölkəsi
arasında 70-ci yeri tutub.
Elməddin MURADLI
Üç nöqtə.- 2011.- 30
noyabr.- S. 9.