Sən öldüyün
gün doğuldun, Mübariz...
Əslində insan
dünyaya gəldiyi gün ad günü hesab olunur, sən və
sənin kimi adiliyin fövqündə duran seçilmişlər
doğulduğu gün deyil öldüyü gün dünyaya
gəlir.
Biləsuvarda sadə bir ailənin neçəncisə
bir övladı kimi dünyaya gəlmişdin. Bundan kim xəbər
tutmuşdu ki, anan, atan, yaxın qohum əqrəban. Həmin
ailədə iməklədin, dil açıb ilk sözlərini
dedin, yeridin, bir sözlə böyüdün, adi insanlar, həmyaşıdların,
bacı-qardaşın kimi.
Bütün bunları yalnız valideynlərin
gördü, sevindi, fərəhləndi. Bəlkə də
gündəlik qayğılardan baş açıb heç
bu ailə hadisələrinin fərqinə də
varmadılar.
Yenə sənin kimliyindən,
harda yaşamağından bir kimsə xəbərdar deyildi.
Kimsə bilmirdi ki, filan yerdə, filan adda Tanrının
seçilmişlərindən biri yaşayır. Gəncləşdin,
yavaş-yavaş həyata baxışın formalaşmağa
başladı. Dilimizi, dinimizi, kimliyimizi anladın, sevdin, yenə
kimsə bunun fərqinə varmadı. Özünü, mənliyini
tapdıqca, bunu yaxın dairənə aşıladıqca illər
keçdi, bu illər ərzində idmana getməyin, müxtəlif
sahələrdə işləyib özünü
sınamağın səndə başqa, yeni keyfiyyətlər
aşkarladı. Bunların heç özün də fərqində
olmadın, amma rahatlığın da yoxdu, şaqraq dağ
çayları kimi özünü ordan bura
çırpıb yol axtarırdın. Bəs, bu yol səni
hara aparmalı idi, rahatsızlığın nədəndi, bəlkə
də özün bilirdin, başqa kimsə yenə bunun fərqində
deyildi.
Gənc,
yaraşıqlı, ağıllı oğlan idin,
başını qaldırıb üzlərinə belə
baxmadığın qızlar sənin üçün
gizlin-gizlin qovrulardılar, sən də bunun fərqində
deyildin. İçində alovlu, üsyankar başqa digər
sevgilərə bənzəməyən bir sevgi vardı ki, səni
dağa-daşan çırpan qovuşacağın mənsəbə
aparan da o sevgi idi, o ülvi sevgi ki, hər gəncin qəlbində
səninkində olduğu qədər bol və təmənnasız
olmur. Bütün şişirtmələrdən, pafosdan uzaq VƏTƏN
sevgisi.
Onun düşmən tərəfindən
yağmalanmasına, məsum qızlarının, gəlinlərinin
əsir götürülməsinə, sənin, həmvətənlərinin
göz açdığı, boya-başa
çatdığı torpaqlarda iyrənc düşmənin
at oynatmasına dözə bilmirdin. Bu hisslər qəlbində
hər gün daha çox böyüyürdü. Nə isə
etmək istəyirdin...nə?
Bu yolda
ilk addıma qərar verdin... Artıq ad qoymaq olar
sənə, MÜBARİZ, çünki artıq qəhrəman bir oğlan olduğun özünü biruzə verir. Başqa bütün işləri
yarıda qoyub könüllü ordu sıralarına yazılmağa
qərar vermək sıradan birinin atdığı addım,
verdiyi qərar deyil. Buna görə
artıq dostların, həmyaşıdların sənə
həsəd apara bilərlər. Kimisi
həsəd apardı,
kimisi istehza ilə yanaşdı, bu artıq hər
kəsin öz düşüncəsinin məhsuludur.
İstədiyinə çatmısan, gizir, niyə yenə rahatlığın yoxdur. Nədir səni
içindən yandırıb-yaxan,
niyə qovrulursan? Əlində avtomat, ətrafında
sənin əmrini gözləyən əsgərlər,
üzbəüz səngərdə
düşmən. Döz... dözməlisən,
ölkə siyasəti
hələ ki, bunu deyir. Damarlarında qanla birgə haqq-ədalət,
sevgi, təəsübkeşlik
qaynayan, düşmənə
qarşı bunlardan qaynaqlanan nifrət, intiqam
varkən bir el oğlu necə sakit otursun. Üstəlik də məkirli,
iyrənc düşmən
əmməllərindən qalmır,
Mübariz hər gün əsir götürülmüş Azərbaycan
qadınlarının iniltilərini
qulaqlarında duyur.
O dağ çayının
qayalara çırpıla-çırpıla
üz tutduğu mənsəb bura deyilmiş, burdan irəli, daha böyük mənsəblər
uğrunda deyib-özünü
qabağa atdı, qabaqda düşmən ordusu var...
“Canım, atam və anam. Məndən sarı darıxmayın.
İnşallah, cənnətdə görüşəcəyik. Mənim üçün bol-bol dua edin. Vətənin dar günündə
artıq ürəyim
dözmür. Allaha xatir
bunu etməliyəm.
Ən azından ürəyim sərinlik tapar. Şəhid olanadək bu şərəfsizlərin üzərinə
gedəcəyəm. Şəhid olsam
- ağlamayın. Əksinə, sevinin ki, o mərtəbəyə
yüksəldim. Allaha ibadətlərinizi
dəqiq yerinə yetirin. Çoxlu sədəqə verin. Seyid nəvəsi olaraq
bunu etməliyəm.
Allah böyükdür.
Vətən sağ olsun.
Oğlunuz Mübariz. Haqqınızı halal edin”.
Getməzdən öncə bu məktubu yazdın, deməli addımın ani atılmırdı, düşünərək atırdın. Sənin
qəhrəman olman üçün an bir rol oynamadı, sən bütün ömrünü bu an üçün yaşamışdın.
Sən nə Sovet dövrünün
şişirdilmiş qəhrəmanlarındansan,
nə də canından bezmişlərindənsən.
Səni Tanrı özü bu missiya üçün
göndərmişdi. Ölüm qabağı da özünü düşünmək
ağlına gəlmədi,
valideynlərini nigaran
qoymamaq, əsgərlərini
pərən salmamaq üçün düşünülmüş
halda namə yazdın, mesaj qoydun. Özün necə rahatsanmı...?
Doğulduğun günü bir ailən bilirdi, öldüyün gün bütün millətin üçün doğuldun. Bir qəhrəman,
bir simvol, ruhdan düşmüş
xalqına bir ruh yüksəkliyi kimi doğuldun. Mənsəbinə qovuşan
dağ çayı- Mübariz İbrahimov, sən, öldüyün gün doğuldun...
Ramilə Qurbanlı
Üç nöqtə.- 2011.- 19 yanvar.- S. 5.