Tanrı insanı xoş niyyətlər üçün yaradıb

Novruz Aslan: “İnsan da yalnız yaxşı əməllərin sahibi olmağa can atmalıdır”

Nə böyük xoşbəxtlikdir- sevdiyin işlə məşğul olmaq. Sevdiyin işin sayının çox olması ondan da böyük xoşbəxtlikdir. Bəs, o baxımdan sevdiyin və gördüyün işlərin hər birinin mütəxəssisi olmaq necə...? Müsahibim həmin xoşbəxt kəslərdəndir ki, sevdiyi bir-neçə işi görür, özü də məsuliyyətlə, ona görə də uğuru qaçılmazdır. Dövlət başçısı da əməyini görüb və ordenlə qiymətləndirib. Söhbət millət vəkili, Qızıl Aypara Cəmiyyətinin rəhbəri, bəstəkar, fəlsəfi kitablar müəllifi Novruz Aslandır.

- Sizinlə son müsahibəmizdən çox illər keçib, bu illər ərzində nələr dəyişib, həm Azərbaycan Qızıl Aypara Cəmiyyətinin rəhbəri kimi, həm yaradıcı insan kimi, bu illər ərzində millət vəkili də seçilmisiniz, hansından başlayaq, bəstəkarlıqdan?

- Hansından istəyirsiniz, yaradıcılığı sona saxlayaq.

- Elə isə rəhbərlik etdiyiniz sahədən başlayaq...

- Artıq 11-ci ildir ki, Qızıl Aypara Cəmiyyətinə rəhbərlik edirəm və bu vəzifəni daşımaqdan şərəf duyuram, çünki insanların ağır, çətin günündə ona kömək olmaq, dayaq durmaq hər bir normal insanın həyatına qızıl həriflərlə yazılan bir işdir, həmçinin mənim də. Bu iş çox mərhəmət tələb edən şərəfli işdir. Özümü biznesdə də sınamışam, dövlət işində də, amma ən ürəyimcə olan, təbiətimə uyğun olan, özümü tapdığım iş Qızıl Aypara Cəmiyyətindəki işimdir. Bundan sonra harda işləsəm də ömrümün axırına qədər də Qızıl Aypara Cəmiyyətində işlədiyim illər həyatımın ən parlaq səhifəsidir. Təsəvvür edin ki, yaşlı, xəstə insan evdə tənhadır, onun yanında yalnız Qızıl Aypara Cəmiyyəti var, görün necə nəcib işlə məşğul olan bir cəmiyyətə rəhbərlik edirəm. Ulu yaradan bizi xoş məramlar, məqsədlər üçün yaradıb, müharibələr, fəlakətlər üçün yox. Ömür çox qısadır, insanın ən böyük məqsədi insanlara gərəkli olmaqdır. “İncil”də deyir ki, Allah insanı yaradanda ona öz simasını verib, “Quran”da deyir ki, Allah insanı yaradanda ona öz ruhundan verib. Hər bir insan bu dəyəri birləşdirsə başa düşəcək ki, onun siması, ruhu Allahdandır. Hər insan öz finişinə catanda bütün ömrünü gözləri qarşısından keçəcək. Yaxşı insan düşünəcək ki, övlad böyütmüşəm, yaxşı valideyn olmuşam, valideynlərimə yaxşı övlad olmuşam. Pis insan düşünəcək ki, ilahi, mən nə pisliklər etmişəm... Birincisi axirətə rahat, qorxmadan gedəcək, ikincisini dəhşət götürəcək. Ona görə hər bir insan bacardığı qədər savab iş görməyə çalışmalıdır. Bizim könüllülər əsasən tələbələrdir, yaşlılara, imkansızlara, tənhalara yardımlar edirik, yanlarında oluruq, həyatda dəstək veririk. İmkanı olmayan qan verir, evində onlara köməkçi olur. İmkanlı insanları tapırıq, onların köməkliyi ilə ehtiyacı olanı dava-dərmanla təmin edirik. Heç kimdən tələb edilmir ki, imkanın, gücün xaricində işlər gör, yox bacardığın qədər, imkanın daxilində. Savab iş ibadətdən, namazdan üstündür. Dediyim odur ki, bu cəmiyyətdə işləmək çox böyük, müqəddəs, savab, lazımlı işdir. İnanıram ki, cəmiyyət üzvlərinin sayının artması da bununla bağlıdır.

- Elə bilirəm müsahibim bir filosofdur, təşkilat rəhbərində çox filosof kimi mühakimə yürüdürsünüz. Bilirəm ki, fəlsəfi əsərlər müəllifisiniz, indi o səpgidə yaradıcılığınızda hansı yeniliklər var? Novruz müəllim, üstünüzdə bayaqdan bir qarışqa gəzir...

- Qoy gəzsin, biz onu öldürməyəcəyik, cavanlıqda ova gedərdim, sonra getmədim, çünki dərk elədim ki, Tanrının yaratdığını bizim məhv etməyə ixtiyarımız yoxdur. Bir vaxtlar Tanrı buna icazə vermişdi ki, biz heyvanları ovlayıb qidalanaq, çünki başqa qida mənbəyimiz yox idi, indi nə zərurət var ki, onları nəfsimiz üçün məhv edək. Ona görə də qarışqa harda istəyir orda gəzməsi üçün Tanrıdan icazəsi var. O ki, qaldı fəlsəfi kitablara, onlar mənim içimdən gəlir, yazmaya bilmirəm. Bütün kitablarımın da girişində yazıram ki, oxucu, sən bu kitabı oxumağa məcbur deyilsən, qoy, onu istəyən oxusun. Məqsədim odur ki, düşündüklərimi insanlarla bölüşüm, anladıqlarımı bölüşüm, anladım. Çox adamda bu qabiliyyət var, amma əlinə qələm alıb ifadə etmir, mən edirəm. 8 il öncə kitabımda insanların klounlaşması barədə yazmışdım. İndi alimlər bunu sübut edir. Çox sevinirəm ki, bunu ilk dəfə mən demişəm. İnsan meymunlarla, digər heyvanlarla klounlaşıb. Ona görə də insanlar, cinslər, millətlər fərqlidir. Darvin nəzəriyyəsi absurddur. Ona görə də ağlına gələn fikri qoy ortaya, səni buna görə dara çəkməzlər, elm ya təsdiq edəcək, ya da inkar, bəlkə sənin ağlına gələn məqam bir vaxt öz təsdiqini tapacaq.

- Millət vəkili kimi də insanlara xidmət edirsiniz, bu hansı zərurətdən yarandı, onsuz da gördüyünüz işlərlə ona qədər də insanlara xidmət edirdiniz?

- Siyasi arenada öz sözümü demək istəyindən yarandı. Bəzən deyirlər siyasət çirkin işdir, yox, düzgün siyasət çox təmiz, hətta savab işdir. Siyasətdə çirkin oyunlar olur, sən də məcbur olursan o çirkin işlərə cavab verəsən. İnsanın formalaşması üçün bu sahə də vacibdir. Biznesdə öz sözümü demişəm, ictimai işdə, elm sahəsində, incəsənətdə, dövlət işində

- Uğurlar qazandınız

- Bunu siz deyirsiniz, mən deyə bilmərəm, bir prinsipim var, hər gördüyüm işə məsuliyyətlə yanaşıram. Dünən İsmayıllıda olmuşam, seçicilərimlə görüşmüşəm, hər cümə mən ora gedirəm. Orda yaşlı, xəstə insanlar var, Bakıya gəlməyə imkanları yoxdur, mən özüm gedirəm onların yanına. 5 il ərzində İsmayıllıdan bir nəfər Milli Məclisə məni görməyə gəlmədi, çünki buna ehtiyac duyulmadı. Bir dəfə Milli Məclisdə dedilər ki, İsmayıllıdan gələn var, sizi görmək istəyir, qəzəblə getdim ki, mən dünən İsmayıllıda olmuşam, niyə gəlmədiniz görüşə, dedi Novruz müəllim, mən Bakıda yaşayıram, sizi görmək üçün İsmayıllıya gedəsi deyildim ki... Gedirəm müxtəlif problemlərlə gəlirlər görüşümə. Bir uşağa böyrəkköçürmə əməliyyatı üçün 50 min manat lazımdır, ata deyir evimi satıb 30 min manat əldə etmişəm, mən zəng elədim İranda 30 min manatdan da aşağı qiymətə razılaşdırdıq o əməliyyatı. Kiməsə kömək etmək gücüm olmayanda çox əziyyət çəkirəm. Rayonun inkişaf etməsi sahəsində də rayon rəhbərliyi ilə birləşib işlər görmək borcumuzdur. Onlarla birgə səyyar xidmət göstəririk.

- Bütün bunların sayəsində bəstəkar Novruz Aslanı itirmirik ki?

- Yox, son vaxtlar “Sarı gəlin” mahnım getdi efirə, Təranə Vəlizadə ifa etdi. Sadəcə sevgi-məhəbbət mövzusun bir qədər arxa plana keçirmişəm, indi sosial yönümlü mahnılar yazıram. Ötən il Rəşad İlyasov “Uşaqları qoruyaq” adlı mahnımı ifa etdi. İl ərzində bu mahnı getdi. Ötən il uşaq ili idi, qızım sözlərini yazdı, mən bəstələdim. Ondan öncəki il “Kristal” qrupu ilə bir layihəm getdi, yenə uşaqların qorunması zəminində. Bu il Azərbaycan bayrağı ilə bağlı bir layihəm ərsəyə gələcək, İlhamə xanım ifa edəcək. Təbii ki, əvvəlki qədər məhsuldar olmasa da mahnı yazmağı kənara qoymamışam, bəstələyirəm. “Sarı gəlin” ili mahnısı oldu.

- Həm də Təranə Vəlizadəni efirə çıxarmaqla savab etdiniz. Yaxşılıq etməkdən zövq almaq çox böyük zövqdür, onu heç bir zövq əvəz edə bilməz... Pislik etməkdən zövq alanlar da görmüşük, belələri də var. Kim hansı əməllərin sahibidirsə, özünün olmasa da övladlarının qarşısına çıxacaq, buna inanmasaq həyat eşqimiz ölər...

- Düzdür, siz artıq xoşbəxt insansınız ki, yaxşılıq edənlərdənsiniz, onun necə qiymətləndirilməyi isə Tanrının işidir. Bu gün deyirlər ki, niyə qar yağmır, əşi, şükür edin ki, Haitidə, Avropada baş verənlər burda baş vermir. Tanrı Azərbaycanı sevir, bura müqəddəs məkandır. 9 iqlim qurşağından 7-si bizdədir deyirlər, yox, elə 9-u da burdadır.

- Bayaq dediniz ki, hər işə məsuliyyətlə yanaşıram, məncə elə uğur qazanmağın da yolu bax o məsuliyyətdən keçir.

- Təbii...

Ramilə Qurbanlı

Üç nöqtə.- 2011.- 22 yanvar.-S. 15.