Ailə dəyərləri içərisində
qadınların rolu mühümdür
Məhərrəm
Qasımlı: “Qarşılıqlı inam və səmimi
münasibətlər ən ciddi amildir”
(Əvvəli
ötən sayımızda)
Ailə dəyərlərimizin
qorunması məsələsinə münasibət bildirən
Azərbaycan Milli Elmlər Akademiyasının Ədəbiyyat
İnstitutunun əməkdaşı, professor Məhərrəm
Qasımlının sözlərinə görə,
bütövlükdə milli - mənəvi dəyərlərimizi,
milli - tarixi dəyərlərimizi, etnoqrafik dəyərlərimizi
ailə təməlinin möhkəmlənməsində əsas
hesab etmək olar. Onun fikrində də Azərbaycan ailə
münasibətlərində qarşılıqlı inam və
səmimi münasibətlər ən ciddi amildir: “Biz qədim
yazılı abidələrimizə nəzər yetirdiyimiz
zaman bu dəyərlər şəbəkəsinin geniş
olduğunun şahidi oluruq. Bir neçə mühüm məsələ
var ki, onlar bizim milli mənəvi dəyərlərimizə,
ailə təməlinin möhkəmlənməsi və ailə
sistemi ilə bağlıdır. Bunun birincisi ailə daxili
münasibətlərin qarşılıqlı inam və səmimi
münasibətlər üzərində qurulmasıdır. Dədə
Qorqud boylarında göründüyü kimi qadın ailənin
dirəyidir, yəni bu nəhəng ailə çadırının
bir çox dirəkləri var. Bu dirəklərdən hər
hansı birinin sıradan çıxması ailə təməlinə
zərbə vurur. Sağlam təməlin olması
üçün ailədaxili münasibətlərin gözlənilməsi
mühüm əhəmiyyət kəsb edən amillərdən
biridir. Burada bir – birinə qarşılıqlı, ağsaqqala
hörmət, ailə başçısına hörmət əsas
meyarlardandır. Dədə Qorqud boylarına nəzər
yetirdikdə Qazan Xan başda olmaqla bütün obrazlarda ən
ciddi əhəmiyyət verilən dəyərin məhz ailə
olmasının şahidi oluruq. Tarixən Azərbaycan
türklərinin ailələri bir təməlli olub.
Ümumiyyətlə çoxarvadlılıq sonradan Azərbaycan
ailəsinə daxil olub. Azərbaycan ailəsinin əsas dəyərləri
qadın-kişi səadətidir. Uzun illər
qadınlarımız həyat yoldaşlarını itirdiyi
zaman bir saçlarını ağ, birini qara
hörürdülər və ömürlərinin
qalanını övladlarını böyütməyə həsr
edirdilər. Bu da Azərbaycan qadınının namusuna verdiyi
dəyərdən irəli gələn faktlardan biridir”.
BƏŞƏRİYYƏTİN
İNKİŞAFI AİLƏ İNSTİTUTNUN İNKİŞAFI
İLƏ PARALEL GEDİR
Erməni Təcavüzünün
Tanıdılması İctimai Birliyi sədri,
yazıçı-publisist Səriyyə
Müslümqızı deyir ki, Azərbaycan ailəsinin
möhkəmlənməsində kişi və qadının
inamı və bir – birinə olan sədaqəti dayanır. Amma
ailə dəyərlərinin qorunmasında əsas
ağır yük məhz qadının çiyinlərinə
düşür: “Qadın ana deməkdir. O, öz məsuliyyətini
hiss etməli, vəzifə
borcunu yerinə yetirməli və hansı sahədə
işləyib-işləməməyindən asılı
olmayaraq ana olduğunu heç
vaxt unutmamalı, həyat yoldaşına sədaqətli
olmalıdır. Kişi ailənin sütunudursa, qadın da həmişə
onun dayağıdır. Azərbaycan ailəsini qoruyan dəyərlər
içərisində qadınların rolu müstəsnadır”.
Dini Etiqat və Vicdan Azadlıqları
Müdafiə Mərkəzinin (DEVAMM) sədri Hacı İlqar
hesab edir ki, ailə cəmiyyətin fundamenti və özəyi
olduğu üçün ailə institutu olmayan toplumlar məhvə
dogru gedir. Ekspertin fikrincə, əslində bəşəriyyətin
inkişafı ailə institutunun inkişafı
ilə paralel gedib. Ailə daxilində istər kişinin, istər
qadının, istərsə də övladların tam surətdə
özlərini realizə imkanları olub: “Bu mənada ailə əslində
toplumun ən ciddi, köklü fundamentlərindən biridir. Azərbaycanda
mahiyyət etibarı ilə həmişə ailə institutu
çox güclü olub. Bu həmçinin sovet zamanında
özünü qoruyub saxlayıb. Düşünürəm
ki, hazırda dünyada gedən qloballaşma prosesinin müsbət
tərəfləri ilə
yanaşı mənfi təsirləri də var. Azərbaycanda
reallıq budur ki, ailə institutu alternativsiz olaraq toplumun ən
ciddi fundamentlərindən biri kimi qalmaqdadır və onu
inkişaf etdirmək lazımdır. Ailə instututunun
əsasında bizim həm milli həm də, mənəvi dəyərlərimiz
durmalıdır».
AİLƏYƏ
İNSAN AZADLIĞI PRİZMASINDAN YANAŞMAQ LAZIMDIR
Dini Qrumlar üzrə
Dövlət Komitəsinin Dinşünaslıq Ekspertizası,
İctimai Məsələlər
və Analitik Təhlil Şöbəsinin müdir
müavini Nahid Məmmədovun fikrincə, Azərbaycan ailəsinin
formalaşmasında milli mənəvi dəyərlər vacib
rol oynayıb və bu dini nöqteyi nəzərdə öz əksini
tapıb. Hətta istər bütpərəstlik, istər atəşpərəstlik,
istərsə də xristianlıq olsun onların hər birinin
özünün bir ailə modeli olub. İslamı qəbul
etdikdən sonra da təbii ki, Azərbaycan ailəsi öz təsir
imkanlarını genişləndirib və bu dinin vacib
ünsürləri ailə modelimizə gəlib
çıxıb: “Məsələn, ailə münasibətləri,
nikah məsələsi Azərbaycanda hələ 20-ci əsrin
əvvəllərinə kimi daha çox dini motivlər üzərində
qurulub və dini müstəvidə həyata keçirilib. Yəni,
nikahın bağlanması, valideynlər arasında münasibətlər,
uşaqların bir-birilərinə qarşı münasibətləri,
bütün bunlar sistemli şəkildə dini zəmində
olub. Milli mənəvi dəyərlər deyəndə,
birbaşa ailənin qurulmasında dinin ailəyə hansı
aspektlərdən təsiri və nə dərəcədə
rolu olmasını başa düşürük”.
Nahid Məmmədovun fikrincə digər
İslam ölkələrindən fərqli olaraq Azərbaycan
cəmiyyətinin özünəməxsus milli xüsusiyyətləri
var və bu təbii ki, ailə məsələsində öz
əksini tapmışdır. Bizim ailəyə daha çox
demokratik, insan azadlığı prizmasından
yanaşmağımız bizi digər İslam ölkələrindən
fərqləndirən xüsusiyyətimizdir. Bu milli dəyərlər
yalnız Azərbaycan ailəsində öz əksini tapıb:
“Ümumiyyətlə ailə məsələsi təkcə
sosial məsələ deyil. Bu məsələ ilahi bir dəyər,
dinimizin bir hökmü və təşviqidir. Əgər Qərbdə
ailə bir sosial institut kimi görülürsə, Azərbaycanda
bu sosial institut olmaqla yanaşı, həm də ilahi bir
tövsiyyədir. “Qurani Kərim”də, Peyğəmbərimizin
hədislərində də daim ailə qurmağa bir
tövsiyyə var. Həddi-buluğa çatmış
kişilərin və qadınların evləndirilməsinin əmr,
göstəriş xarakterli olması “Qurani Kərim”də
öz əksini tapıb. Məncə ailənin qurulmasından
yayınma, cəmiyyətdə müəyyən qədər əxlaqi
– mənəvi pozğunluğa səbəb olur. İstər əxlaq
keyfiyyətləri, istər də demoqrafiya baxımından bu
məsələlər olduqca önəmlidir”.
AZƏRBAYCAN
AİLƏSİNİN MÖHKƏMLƏNMƏSİNDƏ
HANSI DƏYƏRLƏR DAHA VACİB ROL OYNAMAQDADIR?
Ekspertlərin çoxu hesab edirlər
ki, Azərbaycan ailəsinin dəyəri hesab edilən amillər
bir – birinə o qədər sıx bağlıdır ki,
bunları milli və ya dini dəyərlərə ayırmaq
çox çətindir. DEVAMM sədri Hacı İlqar
düşünür ki, milli və dini dəyərləri
ayırmaq düz deyil. Çünki, Azərbaycan
xalqının milli dəyərləri inancından
qaynaqlanıb, bir – birini tamamlayır və bir-birinə
qarşı deyil: “Hesab edirəm ki, ortada prinsip şərti ilə “Quran məntiqi və
yanaşma”sı var. Qadın da ailədə kişi
üçün bir Allah əmanəti və ailənin ən əsas
köklü bir hissəsidir. Hazırda ictimai və iqtisadi həyatda
qadınların kifayət qədər fəallaşması
üçün imkanlar yaradılıb. İnancımız da ailə
institut
və dəyərlərini dagıtmayan qadın fəallığına
çox müsbət baxır. Buna görə də fikrimizcə,
“İslam yanaşma”sı indiki ən mütərrəqqi nəzəriyələrdən
də qabaqdadır”.
Psixoloq Azad İsazadə isə ailənin
dəyərlərinin daha çox milli dəyərlər
üzərində bərqərar olduğu qənaətindədir.
Azərbaycanlıları daha çox “Etnik müsəlman”
qrupuna aid edən ekspert düşünür ki, əgər insanların
başında çarşab, üzündə saqqal yoxdursa,
deməli etnik qrupa daxilik: “Məncə ailə daxilində daha
çox müsəlman yox, etnik ünsürlər
özünü göstərir. Çünki, dilimiz,
özümüz türk olsaq da, davranışımızda
onlardan fərqli olan Qafqaz elementləri mövcuddur. Belə ki,
etnik deyəndə təkcə millətimiz yox, daha geniş
- yaşadığımız
region da nəzərdə tutulur. Demək, etnopsixoloji
baxımdan Qafqaz türkləriyik desək daha düzgün
olar. Qafqaz etnosu bizə təsir edir və həmin etnik
düşüncənin üzərində də Azərbaycan
ailəsi qurulur.
(Ardı var)
Üç
nöqtə.- 2012.- 3 avqust.- S. 9.