Gənc rəssamların sərgisi nümayiş olundu

Ağaəli İbrahimov: “Gənclər Qərb mədəniyyətinə daha çox maraqlıdırlar”

”Bu gün ölkəmizdə “Gənclər günü” kimi qeyd olunur. Gəncliyin yaşı rəsmən 29 yaş hesab olunsa da, bu bayramdan çoxları yararlanmağa çalışır. Elə ona görə də, təsəlli olaraq bu söz dildən dilə gəzməkdədir. Hər kəs bir-birinə təki qəlbimiz cavan olsun deyərək, bayramlaşır. 1996-cı ildə prezident Heydər Əliyevin sərəncamı ilə təsdiq olunan bu tarix gəncliyə göstərilən diqqət və qayğının bir nümunəsidir. Gənclər günü MDB məkanında və Şərqi Avropa ölkələri arasında ilk dəfə olaraq Azərbaycanda qeyd olunub. Azərbaycanda hər il Gənclər günündə bütün istiqamətlər üzrə fəaliyyət göstərən gənclər yekun hesabat verirlər. Mədəni aləmdə də gənclərin aktivliyi hiss olunur. “Gənclər günü” münasibəti ilə dünən Rəssamlar İttifaqında sərginin açılışı oldu. Sərgi Mədəniyyət və Turizm Nazirliyi, Gənclər və İdman Nazirliyi və Rəssamlar İttifaqının birgə təşkilatçılığı ilə keçirilir. Tədbirdə çıxış edən xalq rəssamı, ittifaqın katibi Ağaəli İbrahimov sərgi ilə bağlı təəssüratlarını bölüşdü. Onun sözlərinə görə, artıq 15 ildir ki, davamlı şəkildə sərgi təşkil olunur. “Gənclər günü” münasibəti keçirilən sərgidə gənc rəssamların əl işləri nümayiş olunur. “Bu il sərgidə 160 rəssamın 185 əsəri təqdim olunur. Ancaq bizə 400-ə yaxın əl işi təqdim edilib. İmkan daxilində hər kəsin əsərlərini sərgiyə çıxarmağa çalışdıq. Əlbəttə, məhdud şəraitə görə bəzi rəssamların yalnız bir əsəri sərgidə nümayiş olunur”- deyə A.İbrahimov bildirdi.

Xalq rəssamı qeyd etdi ki, bu sərginin təşkil olunmasında məqsəd mədəniyyətimizin inkişafına xidmət etməkdir: “Bu sərgilər gənclərin bacarıqlarını nümayiş etdirir. Gənc rəssamların işi ilə hər kəs tanış olmaq şansı qazanır. Bildirim ki, artıq bəzi gənclər bizim ittifaqa üzv qəbul olunublar. Bu gün həm də onlara vəsiqələri təqdim etdik”.

Rəssamlıq Akademiyasında dərs deyən və Rəssamlar İttifaqının katibi olan Ağaəli İbrahimov mütəmadi olaraq gənclərlə birgə işlər görür. Onlarla sıx əlaqədə olan xalq rəssamı bu sərgidə iştirak edən gənc rəssamların işlərini də “Üç nöqtə” qəzetinə açıqlaması zamanı qiymətləndirdi: “Əlbəttə, məni qane edən və etməyən bir çox məqamlar var. Ancaq ümumilikdə gənc rəssamların parlaq gələcəyini hiss etmək mümkündür. Diqqət yetirsək, görərik ki, gənclər Qərb mədəniyyətinə daha çox maraqlıdırlar. Lakin çox istərdim ki, onlar Şərq mədəniyyətinə də bu cür maraq göstərsinlər. Şərq elementlərindən daha çox istifadə etsinlər. Dərs dediyim gənclərə bunu aşılamağa çalışıram. İnanıram ki, onlar da hamı kimi Qərbə deyil, həm də Şərqə can atacaqlar”.

Qeyd edək ki, 3 gün davam edəcək sərgiyə girişi pulsuzdur.

Üç nöqtə.- 2012.- 2 fevral.- S. 13.