“Bu sənətin zirvəsi yoxdur”

Bu həftənin “Şənbə qonağı” “Xalq ulduzu-4” müsabiqəsinin yaddaqalan iştirakçılarından olan Gülay Zeynalovadır. Muğam, xalq və bəstəkar mahnılarının ifaçısı kimi tanıdığımız Gülay xanım elə adı çəkilən müsabiqə vaxtlarından məlahətli səsi və özünəməxsus ifası ilə nəinki gənc nəslin, hətta yaşlı nəslin də sevgisini qazanıb. Sənətdə gördüyü işlərlə bərabər həm də ailəsinin gözəl xanımı və bir övlad anası olan Gülay Zeynalova ilə olan müsahibəni sizlərə təqdim edirik.

- Elə müğənnilər var ki, onlar ancaq gənclər dinləyir. Bəzilərini də yaşlı nəsil. Lakin siz həm gənc, həm də yaşlı nəslin sevgisini qazana bilmisiniz...

- Mənim repertuarımda xalq mahnıları və muğamlarla bərabər gənclərə yaxın olan musiqilər də var. Bəlkə də repertuarın rəngarəng olmağından asılıdır.

- Niyə muğam ifaçıları şou-biznesdən qaçaq olurlar?

- Çünki muğam ifaçıları estrada müğənnilərinə baxanda bir az çərçivədən çıxmamağı xoşlayırlar. Geyim, danışıq, oxumaq muğam sahəsində bir az ciddi formada olur. Bəlkə də buna görədir. Amma, şou-biznes elə bir sahədir ki, orda bir az qalmaqal, söz-söhbət var, açıq-saçıqlıq var. Ona görə muğam ifaçıları uzaq olur şou-biznesdən.

- Siz özünüzü şou-biznesdə görməsəniz də, bütün xəbərlərdə sizdən şou-biznes əhli kimi söhbət açılır.

- Ola bilər ki, estrada müğənnisinin toyunda görürlər, hansısa şou nümayəndələri ilə eyni masada əyləşmişik. Həmin vaxtda şəkillərimiz çəkilir, saytlara verilir. Lakin kiminləsə eyni masada əyləşmək, söhbət etmək o demək deyil ki, mən şou-biznes müğənnisiyəm.

- Nə vaxtsa fikrinizdən keçirmisiniz ki, estrada müğənnisi olasız?

- Estrada mahnılarını oxumaq mənim üçün heç də problem deyil. Arada görürsüz ki, oxuyuram. Çünki, əsas muğamdır. Muğam musiqi sənətinin açarı hesab olunur. Muğam ifa edəndən sonra digər musiqi janrlarında oxumaqda heç bir problem yoxdur. İstəsəm, oxuya bilərəm. Amma, mənim sənətim xalq üslubundadır. Muğamdı, xalq mahnılarıdır, bəstəkar mahnılarıdır. Məni bu cür qəbul ediblər. Ona görə də, yarı yolda üslubumu dəyişmək istəmərəm.

- Sənətdə niyə dostunuz yoxdur?

- Mənim dostum da, rəfiqəm də anamdır. Bu gün elədir ki, hansısa bir dostuna ürəyini açıb sirrini deyirsən. Sabah həmin şəxslə hansısa bir problemin olanda, sənin ona verdiyin sirri hamı bilir. Hamı ilə salamım var, heç kimlə sözüm-söhbətim, problemim yoxdur.

- Müəlliminiz Arif Babayev olub. Necə düşünürsünüz, bir tələbəsi kimi sizdən həmişə razı qalıb?

- Arif müəllimin razı qaldığı vaxtlar da olub, narazı olduğu vaxtlar da. Amma, mən bacardığım qədər boynuma düşən tələbəlik məsuliyyətini yerinə yetirməyə çalışmışam. İndi müəllimdir də inciklik də ola bilər, pisləyə də bilər. Amma çox şükürlər olsun ki, Arif müəllim həmişə məni dəstəkləyib. Hamı da bilir ki, Arif müəllim mənim toyumda necə iştirak edib. Hətta mənim həri mərasimimdə də Arif müəllim başda olub, mənə böyüklük edib. Mənə elə gəlir ki, yəqin razı qalıb ki, bu qədər məsuliyyəti o da öz boynuna götürüb.

- Səhnədə mənəvi dəstəyi kimdən alırsız?

- Mənim yoldaşım səhnədə oxuyanda mənə dəstək olursa, elə bu mənim üçün hər şeydir.

- Böyük səhnəyə yol hardan gedir?

- O yol çox keşməkeşli yollardır. Mənə elə gəlir ki, o zirvəni fəth etmək üçün çox çətin yollardan, müxtəlif mərhələlərdən keçmək lazımdır. Elə insan var ki, nəyinsə xatirinə yolunu azır və o zirvəyə gedib çata bilmir. Elə insan da var ki, Allah ona kömək olur, ağlını başından almır, ağılla-başla irəliləyir. Allah verən qədər gedir o yolu.

- Bu yol kimlər üçün açıqdır?

- Sənəti olanlar üçün.

- Sənətlə bağlı probleminiz olanda, ən çox kimdən məsləhət alırsınız?

- Mən Konservatoriyanı bitirməyimə baxmayaraq, yenə də Arif müəllimdən öz məsləhətlərimi alıram. Çalışdığım musiqiçilərdən Rövşən Qurbanovdan məsləhət alıram. Məsləhətləşdiyim sənət adamları var. Mən təbii ki kiçiyəm. Bu sənəti mən hələ sənətkarlar kimi tam bilmirəm. Öyrənmək heç vaxt gec deyil. İndinin özündə də öyrənirik.

- Bu sənətin uğurunun hansı hissəsini əldə etdiyinizi hesab edirsiz?

- Bu sənətin zirvəsi yoxdur. Bu gün Leyli rolunu oynamaq istəyirsən, sabah əməkdar artist, sonra xalq artisti adını almaq istəyirsən. Eynən insanın arzuları kimi tükənməz bir yoldur. Nə qədər də getsən qurtarmır.

- Leyli rolunu oynamaq istədiyinizi bildirmisiniz. Bu rolu ifa etmək üçün özünüzü hazır hiss edirsiniz?

- Əlbəttə, mən bilsəm ki, bu rolun öhdəsindən gələ bilmərəm, arzulamaram, heç o sözü dilimə də gətirmərəm. İnsan nədənsə arxayındırsa, onu özünə çox arzulayır. Yəqin, mənim özümə güvənim, inamım var ki, mən o şeyi arzulayıram.

- Gülay Azərbaycan musiqisinin gələcəyi üçün nələr etmək istəyir?

- Xalq musiqiləri, bəstəkar mahnıları yazdırırıam, muğamlarımızı ifa edirəm. Çalışıram, ki Azərbaycan musiqisi üçün əlimdən gələni edəm. Bu sahədə az-çox payım olsun.

- Sənətlə məşğul olmağınız uşağa vaxt ayırmağınıza mane olmur?

- Əsla. Əgər mən bir saat evdə oluramsa, bütün fikrim-zikrimi ona yönəldirəm. Tərbiyəsi ilə də özüm məşğulam. Demirəm ki, toydan gəldim, yorğunam, uşağa nənələri baxsın. Qətiyyən belə bir şey yoxdur.

- Nəyə görə Gülayın ailəsi bu qədər gündəmdədir?

- Nə bilim, bəlkə də hər ikimiz də tanınmış olduğumuz üçün. Hamı bilir ki, mən çalışdığım qədər şəxsi həyatımı, ailəmi gizlədirəm. Gündəmdə olmağını istəmirəm.

- Qədirova və Zeynalova soyadlarından hansının məsuliyyəti daha çoxdur?

- Təbii ki hər iki soyad mənim üçün məsuliyyətli və əzizdir. Biri mənim ata soyadımdı, digəri də həyat yoldaşımın. Mən onların arasında fərq qoya bilmərəm. Necə də olsa, o soyad mənim adımda gedib. Mən necə adımın məsuliyyətini daşıyıramsa, eləcə də hər iki soyadın məsuliyətini daşıyıram.

- “Ailəsinin qədrini bilməyən sənətinə də dəyər verə bilməz. Çünki, ifa etdiyi musiqiləri doğma balaları qədər sevən əsl sənətkarın ilk dinləyicisi və tənqidçisi ailəsi olmalıdır” - demisiniz.

- Mənim mamam mən nə qədər yaxşı oxusam da, deyirdi ki, yaxşı oxumadın. Deyirdim ki, mama sən məni nə vaxt tərifləyəcəksən. Deyirdi ki, mən səni tərifləsəm, daha hazırlaşmazsan, oturarsan. Həyat yoldaşım təzə tanış olduğumuz vaxtlarda tərifləyirdi. Amma, indi o da deyir, Gülay filan şey səhv oldu. Deyirəm sən musiqiçi deyilsən axı, bəlkə səhv başa düşürsən kənardan. Deyir mən sənə dinləyici, tamaşaçı gözü ilə baxıb fikir bildirirəm. Yəni ki, mən birinci tənqidi və ya xoş sözü ailəmdən eşidirəm.

- Rəqqasə Fatimə yeni layihə üzərində çalışır. Bu konsertdə rəqqaslar müğənnilərlə rəqs edib yarışacaqlar. Bu müğənnilərin siyahısında sizin də adınız var.

- Mən özüm elə şeyə pis baxmıram. Amma, görək Kamil onu necə qəbul edəcək. Hələ xəbəri yoxdur. Bilmirəm icazə verəcək, ya verməyəcək. Belə qərarlarda həyat yoldaşımın razılığı ilə oturub-dururam. Kamil razı olsa, yaxşı olacaq. Olmasa da, Fatimə xanım özümüzünküdür, üzrlü sayar.

- Yaz-yay aylarında konsert verəcəyiniz haqda xəbər vermişdiniz. Bu yaxınlarda konsert gözlənilirmi?

- Konsert etmək bugünkü gündə heç də problem deyil. Ansamblı yığ ora, zalın pulunu ödə, get konsertini et. Lakin mən bu cür istəmirəm. İstəyirəm ki, yadda qalan bir şey edim. Geyim, tərtibat, dizayn, ifa, yəni hərtərəfli fərqli bir şey etmək istəyirəm. Söz verdim yalançı çıxmayım deyə necə gəldi konsert verim. Əsas o deyil, əsas odur ki, konsert yadda qalsın, ora dəyərli xanəndələr, ifaçılar gəlsin. Bir az gec olsun, amma inşallah yaxşı olsun.

- Ölkəmizin ev sahibliyi edəcəyi “Eurovision-2012” müsabiqəsi haqda nə deyə bilərsiniz, xoşunuza gələn mahnı, qalib gördüyünüz ölkə varmı?

- Sırf hər dəfə izləmirəm. Amma mahnıları dinləmişəm. Birinci öz vətənimin qalib olmağını istəyirəm. Kimi təmsil etməyinin fərqi yoxdur, əsas odur ki, Azərbaycanımızı təmsil edəcək. Bu ilki təmsilçimiz Səbinə Babayevaya da uğurlar arzulayıram, inşallah qalib gələr.

- Qarşıdakı planlarınınz barədə danışardınız?

- İnşallah bu yaxınlarda 3-cü diskimiz işıq üzü görəcək. Muğam və xalq mahnılarından ibarət olan diskin 3-4 mahnısı qalıb ki, onlar da tezliklə hazırlanacaq. Disk hazır olsun, ondan sonra işlərimizin davamı olacaq.

Aygün Asimqızı

Üç nöqtə.- 2012.- 12 may.- S. 13.