“Kaliforniyada Azərbaycan muğam ayı” keçirilib

Aytən Məhərrəmova “Sanki Azərbaycan musiqisinə ac idilər”

II Respublika muğam müsabiqəsinin qalibi xanəndə Aytən Məhərrəmova Amerikada keçirilən muğam ayında iştirak edib. Səfər təəssüratlarını “Üç nöqtə” ilə bölüşən xanəndə bildirdi ki, 16 gün ərzində Amerikanın bir neçə şəhərində konsert veriblər: “Kaliforniyada keçirilən “Muğam ayında” iştirak etdik. Amerikanın bir neçə şəhərində konsertlərimiz oldu. San-Fransiskoda keçirilən San-Fransisko Dünya opera Musiqisi Festivalında iştirak etdik. Dünyanın müxtəlif ölkələri öz operası ilə çıxış etdi. Azərbaycandan isə “Leyli və Məcnun” nümayiş olundu. İfaçılar isə Vüsalə Musayeva və İlkin Əhmədov idi. Çox qəribə olsa da, mən festivalda Koreya operasında iştirak etdim. Operanın məzmunu belə idi ki, ata qızını itirir. Mən qız rolunda çıxış edirdim. Ata rolunu isə koreyalı aktyor ifa edirdi. Mən ona muğamlarımızla cavab verirdim. İmamyar Həsənov (kamança), Rüfət Həsənov (tar) və Elşən Qasımov (nağara) bizimlə birlikdə iştirak etdi. Çin, Hindistan, Cənubi Koreya və ABŞ musiqiçilərindən ibarət orkestr “Leyli və Məcnun”un partiyalarını bizim musiqiçilərimizlə bərabər ifa edirdilər. Onların alətlərində bizim musiqinin ifa edilməsi maraqlı alındı. Eləcə də onların musiqilərini bizim musiqiçilərimiz ifa edirdilər. Daha sonra Los-Ancelesə qayıtdıq. Burda da böyük bir tədbir keçirildi. Burda Los-Ancelesdəki baş konsulumuz Nəsimi Ağayev işğal altında olan torpaqlarımızla bağlı məsələni ortaya qoydu. Ermənilər konsertlərimizdən birində mitinq keçirməyə cəhd etdilər. Lakin konsulluğumuz bunun qarşısını aldı. Konsertə maneçilik törədə bilmədilər”.

“Orda olan coşqunu sözlə ifadə etmək mümkün deyil. Ağzımızdan çıxan hər kəlməyə reaksiya verirdilər. Sanki Azərbaycan musiqisinə ac idilər. Belə yerdə deyilir ki, musiqinin dili yoxdur və onu hər kəs başa düşə bilir. Konsertimizə gələn amerikalı bir vətəndaş dedi ki, dostuna deyib ki, dünyada eşitmədiyin bir musiqi dinləmək istəyirsənsə, Azərbaycan muğamını dinlə. Festivalda bir çox opera səsləndi. Amma mənə elə gəlir ki, bizim opera qədər iz qoyanı olmadı. Mən bu operanı bir tamaşaçı kimi izlədim. Və fəxr edirəm ki, mən azərbaycanlıyam və Azərbaycan musiqisini, mədəniyyətini təbliğ edirəm” – deyə xanəndə bildirdi.

Aygün Asimqızı

Üç nöqtə. – 2012. – 21 noyabr. –S. 13.