İCAPP-ın Bakı bəyannaməsi qəbul olundu

Erməni partiya sədri Raffi Ovanessyan isə İCAPP-ın tədbirini pozmağa cəhd göstərdi və cavabını aldı

Bakıda Asiya Siyasi Partiyalarının Beynəlxalq Konfransının (İCAPP) VII Baş Assambleyasında Ermənistanın keçmiş xarici işlər naziri Raffi Ovanesyan deyib

“Bakı vaxtilə yüz minlərlə erməninin yaşadığı şəhər olub, indi isə burada bir-iki nəfər erməni yaşayır”. Bunu Bakıda Asiya Siyasi Partiyalarının Beynəlxalq Konfransının (İCAPP) VII Baş Assambleyasında Ermənistanın keçmiş xarici işlər naziri Raffi Ovanesyan deyib. O, həmçinin erməni kilsəsinin bağlandığını bildirib: “Deyilənlərə görə, Bakıda minlərlə erməni yaşayır. Mən onları görmək istəyirəm”. O, həmçinin Ermənistanın mövqeyini təkrarlayaraq Dağlıq Qarabağın işğal yox, azad olunduğunu deyib. R.Ovanessyanın çıxışına cavabında Azərbaycan Sosial Demokrat Partiyasının (ASDP) sədri Araz Əlizadə özünü təhqir olunmuş hiss etdiyini deyib: “Ermənistan nümayəndəsi Göbbels sayağı müraciət edərək hər şeyi təhrif etdi, baş-ayaq göstərdi. Göbbels deyib- yalan o qədər həyasız olmalıdır ki, buna kimsə inansın. İndi burada məhz həmin formada həqiqətlər təhrif olunaraq tədbir iştirakçılarına çatdırıldı. Mən sosial demokratam və buna görə sülh tərəfdarıyam. Qan tökülməsinin əleyhinəyəm. Ancaq bu gün çox təəssüflər olsun ki, Ermənistan nümayəndəsi də, digər təşkilatların nümayəndələri də günahkarla günahsızı, təcavüzkarla təcavüzə məruz qalanı eyniləşdirməyə cəhd edirlər”. A.Əlizadə soruşub ki, məgər Azərbaycan Ermənistan torpaqlarını işğal edib?

“Məgər Azərbaycan erməniləri soyqırımına məruz qoyub? Məhz onlar Xocalıda soyqırımı törədiblər, Sumqayıt hadisələrini də edən erməni Qriqoryan olub.

Bəli, 90-cı ilin əvvəllərində Bakıda qırğınlar olub. Bunu da ona görə ediblər ki, sovet- rus qoşunları Bakıya girsin, azərbaycanlıları qətlə yetirsin. Deyirlər ki, cinayətkarları- Miloşeviçi, Karaciçi axtarırlar. Amma bu gün sarkisyanlar, köçəryanlar Ermənistan prezidenti olurlar. Axı, bu insanlar Xocalı soyqırımında birbaşa əli olan insanlardır! Dəfələrlə də çıxışlarında Xocalıda azərbaycanlıları qətlə yetirdiklərini deyiblər. Ancaq çox təəssüflər olsun ki, dünya birliyi susur. Deyirlər ki, sülhə gələk. Onda zəhmət çəkib torpaqları geri qaytarsınlar. BMT-nin 4 qətnaməsi var və onları yerinə yetirsinlər. Bu şovinistlər təkcə özlərini yox, xalqlarını da bədbəxt edirlər. Onların fəaliyyəti nəticəsində Ermənistandan təkcə bu il 80 min erməni köçüb. Bu durum şovinistlərin xalqa verdiyi vədlərlə bağlı deyilmi? Mən heç zaman siyasətçilərlə xalqları bir-birinə qarışdırmamışam, onları hər zaman fərqləndirmişəm. Bu məsələdə erməni xalqı günahkar deyil, günahkarlar şovinist erməni siyasətçiləri və rəhbərləridir. Burada imperiyadan söz getdi. Bilmək lazımdır ki, imperiya söhbəti çoxdan aradan çıxıb. Amma ermənilər hələ də “Böyük Ermənistan” xülyasından əl çəkmirlər. Onların kimlərə ərazi iddiası yoxdur? Türkiyə, Gürcüstan və Azərbaycana ərazi iddiası edirlər. Bununla çox da uzağa getmək olmaz. Mən bu münaqişənin çıxış yolunu yalnız müharibədə görürəm, vətənimi sevirəm və onun azadlığını istəyirəm”.

Hakim partiyadan olan millət vəkili Mübariz Qurbanlı bu gün hazırda Bakıda minlərlə erməninin heç bir qorxusuz, azad yaşayıdığını vurğulayıb: “Bakıda erməni kilsəsi də var və o bağlanmayıb, istər erməni nümayəndəsi, istərsə də başqa kimlər arzulayırsa gedib həmin kilsədə ola bilərlər. Bakıda həmçinin katolik, pravoslav kilsəsi, sinaqoq fəaliyyət göstərir”. O qeyd edib ki, biz monomillət, monoetnik dövlət yaratmaq istəmirik və bu niyyətdə də deyilik: “Biz çoxmillətli dövlətik və hər zamanda Azərbaycanda olan milli və dini tolerantlıqla fəxr edirik. Onu da qeyd edim ki, bu gün nəinki Asiya regionunda bütövlükdə dünyada sülhə, təhlükəsizliyə böyük ehtiyac var. Biz artıq 21-ci əsrin ilk dekadasını başa vurmuşuq. Bildiyimiz kimi 20 əsr iki böyük müharibə ilə yadda qalıb. Biz istəyirik ki, yaşadığımız 21-ci əsr müharibəsiz əsr olsun, qanlı savaşlar baş verməsin. Bu gün dünyada 7 milyarddan artıq insan var. Ancaq dünyanın ayrı-ayrı yerlərində münaqişə ocaqları hələ də qalmaqdadır. Hesab edirəm ki, ilk növbədə bu problemləri yaradan amillər aradan götürülməlidir. Əslində bu problemlərin kökündə millətçilik, şovinizm, terrorizm, islamafobiya və digər fobiyalar dayanır. İlk növbədə bunlar aradan qaldırılmalıdır. Azərbaycan demokratik bir ölkədir. İki gündür ki, gözəl Bakı şəhərindəsiniz. Azərbaycan heç zaman heç bir dövlətə qarşı ərazi iddiası sürməyib. Ancaq çox təəssüflər olsun ki, qonşu və təcavüzkar dövlət tərəfindən ölkəmizə qarşı əsassız ərazi iddiaları irəli sürülür. Bu gün dünyada 7-8 min xalq var. Ancaq onlardan cəmi 193-nün müstəqil dövləti var və BMT-nin üzvləridir. Əgər hər bir millətə öz müqəddəratını təyinetmə hüququ versək, dünya xaosa gedib çıxar. Bu gün burada başqa mövzu ilə çıxış etmək istəyirdim. Ancaq təəssüflər olsun ki, Ermənistan nümayəndəsinin çıxışından sonra mən başqa səpkidə çıxışımı etməyə məcburam. İstər o, istərsə də həmin şəxsin təmsil etdiyi Ermənistan tamam yanlış yol seçib. Məndən bir az öncə Azərbaycanda fəaliyyət göstərən 2 müxalifət partiyasının rəhbəri də çıxış etdi və onların da çıxışından gördünüz ki, Qarabağ məsələsində Azərbaycan hakimiyyəti ilə müxalifət arasında fikir ayrılığı yoxdur. Bu məsələdə hamı yekdildir. Ona görə hamı bilməlidir Azərbaycan torpaqlarının 1 metrini belə güzəşt edən deyil. Təcavüzə, işğala məruz qalsaq da istər bölgədə, istərsə dünyada sülhün tərəfdarıyıq. Amma bir daha qeyd edirəm ki, biz torpaqlarımızı heç kəsə güzəşt edən deyilik”.

“Biz qonşu dövlətləri özümüzə tərəfdaş görürük, oyunları birdəfəlik qurtarmaq lazımdır”. Bu fikri isə Azərbaycan Demokratik İslahatlar Partiyasının (ADİP) sədri, millət vəkili Asim Mollazadə dilə gətirib. Millət vəkili çıxışı zamanı qeyd edib ki, oyunları birdəfəlik qurtarmaq lazımdır: “Azərbaycan xalqı ötən əsrin əvvəllərində demokratik prinsipləri rəhbər tutaraq öz müstəqil dövlətini yaratdı. Bu dövlətin ömrü qısa olsa da, xalqımız XX əsrin sonlarında yenidən müstəqilliyinə qovuşdu. Odur ki, biz demokratik dəyərlərin daşıyıcısı olan bir xalq və dövlət kimi regionda və bütövlükdə dünyada sülhün, təhlükəsizliyin tərəfdarıyıq”. A.Mollazadə Ermənistan nümayəndəsinin fikirlərini pisləyərək qeyd edib ki, bu gün Ermənistan yox, Azərbaycan həmin ölkənin təcavüzünə məruz qalıb:

“Burada qaçqınlardan söhbət getdi. Nəzərinizə çatdırmaq istəyirəm ki, qaçqınlar məsələsi ötən əsrin əvvəllərinə gedib çıxır. Ötən əsrin əvvəllərində indiki İrəvan şəhərində əhalinin 70 faizini azərbaycanlılar təşkil edirdi. İndi sual olunur, həmin azərbaycanlılar haradadırlar? Eyni zamanda, azərbaycanlıların Ermənistandan deportasiyası siyasəti XX əsrin ortalarında və 80-ci illərdə də davam etdirildi. Ötən əsrin 40-cı illərinin sonlarında siyasi büronun qərarı ilə yüz minlərlə azərbaycanlı Ermənistandan qovuldu. Bu azmış kimi 80-ci ilin sonlarında Ermənistanda yaşayan və o torpaqların əsl sahibləri olan azərbaycanlılar son nəfərinəcən həmin ölkədən qovuldu. Ona görə, həqiqətləri olduğu kimi səsləndirməli və dilə gətirməliyik. Biz Azərbaycan torpaqlarının azad olunmasını tələb edirik və bu tələbimizdə də haqlıyıq”.

Onu da qeyd edək ki, tədbirin sonunda-yekun Bakı bəyannaməsi oxunduqdan sonra gərginlik yaranıb. R.Ovanessyan tədbiri pozmağa çalışıb. Azərbaycan və Türkiyə nümayəndələrinin Ermənistan ünvanına səsləndirdikləri ittihamlara cavab olaraq R.Ovanessyan prosedur qaydalarını pozaraq çıxış etməyə cəhd göstərib. İclasa sədrlik edən Yeni Azərbaycan Partiyasının (YAP) icra katibi Əli Əhmədov ona nə danışdığını özü belə bilmədiyini deyib və prosedur qaydalara əməl etməyə çağırıb. R.Ovanessyanın addımına etiraz əlaməti olaraq Azərbaycan və digər dövlətlərin nümayəndələri əllərini qarşılarındakı masaya vuraraq, onun bu hərəkətini pisləyiblər.

Elməddin MURADLI

Üç nöqtə. – 2012. – 24 noyabr. – S. 6.