Azərbaycan Frankfurt Beynəlxalq kitab sərgisində

Oktyabrın 10-dan 14-dək Almaniya Federativ Respublikasının Frankfurt şəhərində 63-cü Beynəlxalq kitab sərgisi keçiriləcək.

Sərgidə ölkəmizi Mədəniyyət və Turizm Nazirliyinin nəşriyyat, reklamın təşkili və informasiya şöbəsinin sektor müdiri Tehran Vəliyev, həmin sektorun baş məsləhətçisi Aslan Cəfərov, mətbuat xidmətinin baş məsləhətçisi Zöhrə Əliyeva, Heydər Əliyev Fondunun əməkdaşı Elşad Bayramov, M.F.Axundzadə adına Azərbaycan Milli Kitabxanasının direktoru Kərim Tahirovdan ibarət nümayəndə heyəti təmsil edəcək.

Mədəniyyət və Turizm Nazirliyindən bildiriblər ki, xüsusi dizaynla hazırlanacaq 40 kvadratmetrlik sahəni əhatə edən stendimizdə dövlətçilik tariximiz, Qarabağ həqiqətləri, azərbaycanlıların soyqırımı, mədəniyyətimiz, tariximiz barədə 350 adda, 600 nüsxəyə yaxın Azərbaycan, ingilis, alman və rus dillərində nəfis tərtibatlı nəşr məhsulları – kitablar, turizm potensialımız haqqında müxtəlif bukletlər və digər çap məhsulları sərgi iştirakçılarına təqdim olunacaq.

Oktyabrın 13-də sərgi çərçivəsində Azərbaycan nümayəndə heyətinin, Almaniyanın Mainz Universitetinin bir sıra alimlərinin, Azərbaycan və Almaniyanın bir sıra tanınmış dövlət və mədəniyyət xadimlərinin iştirakı ilə dahi Azərbaycan şairi Nizami Gəncəvinin 870 illik yubileyi ilə əlaqədar tədbirin keçirilməsi də nəzərdə tutulub.

Aygün.

Üç nöqtə.- 2012.- 12 oktyabr.- S.13.