Bakı Folklor Teatrı bir çox işlər planlaşdırır

Roma Xosrov: “Teatrda şifahi xalq ədəbiyyatına, folklor nümunələrimizə üstünlük veriləcək”

BU ilin əvvəlində Bakıda yeni bir teatr – Bakı Folklor Teatrı fəaliyyətə başlayıb. Cəmi bir neçə aydır fəaliyyət göstərməsinə baxmayaraq, teatrda bir çox işlər aparılır. Teatrın iş fəaliyyəti barədə “Üç nöqtə”yə məlumat verən teatrın truppa rəhbəri Roma Xosrov bildirdi ki, teatrın yaradılmasında əsas məqsəd qədim adət-ənənələrə söykənən folklor nümunələrini yalnız ölkə daxilində deyil, beynəlxalq səviyyədə təbliğ etmək və böyük tamaşaçı auditoriyasına çatdırmaqdır: “Azərbaycan folklorunun qaynağında zəngin və dərin məzmunlu milli-mənəvi dəyərlərimiz dayanır. Milli dəyərlərin bir qisminin aşındığı çağdaş dövrümüzdə folklorumuzun adət-ənənələrimizin yenidən canlanması böyük önəm daşıyır. Bunu nəzərə alaraq Bakı şəhər Mədəniyyət və Turizm İdarəsinin, xüsusilə, idarə rəisi Əlikram Əliyevin təşəbbüsü ilə Bakıda Folklor teatrının yaradılması qərara alındı”. Truppa rəhbəri bildirir ki, teatrın aktyor heyətini təşkil etmək məqsədi ilə iki dəfə seçim mərhələsi keçirilib. Bu seçim turları Rəşid Behbudov adına Mahnı teatrında baş tutub: “Yaş məhdudiyyəti qoyulmayan seçim turları artıq başa çatıb. Yeni yaradılan teatrın şəxsi binası olmadığına görə, məşqlərimiz həftədə üç dəfə keçirilməklə Xətai Mədəniyyət evinin xüsusi zalında reallaşır. İlk məşqimiz martın 13-ü adı çəkilən ünvanda baş tutub. Aprelin 6-sı isə sayca 10-cu məşqimiz keçirildi. Teatrda 18 yaşından yuxarı olan aktyorlarla əmək müqaviləsi əsasında, azyaşlı aktyorlarla isə müqavilə əsasında yalnız qonorarla çalışacağıq. Hal-hazırda səhnə danışığından, Gənc Tamaşaçılar Teatrının aktrisası Şəhla Əliqızı, Səhnə plastika və hərəkətindən rejissor Nicat Kazımov və İncəsənət Universitetinin müəllimi Pərviz Məmmədrzayev, milli rəqsdən isə estrada teatrının aktrisası Güney Əkbərova tərəfindən məşqlərimiz intensiv olaraq davam etməkdədir. Qeyd edim ki, müsabiqə yolu ilə seçilmiş aktyorlar arasından martın 28-i idarə heyəti tərəfindən ən yaxşılarının seçimi mərhələsi keçirildi. Beləliklə, 42 aktyordan 17-si xaric olunmaqla, qalan 25-i ilə teatrımızın yüksəlişi istiqamətində müştərək addımlar atılmaqdadır. Akademik milli dram teatrının musiqi şöbəsinin müdiri eyni zamanda Bakı Folklor Teatrının baş rejissoru Həmid Kazımzadənin səyi nəticəsində ssenari üzərində yeni məşqlərimizin icrası planlaşdırılıb”. Roma Xosrov onu da bildirdi ki, teatr üçün məkan olaraq hansı ünvanın seçiləcəyi dəqiq məlum deyil: “Amma teatr özünü təsdiqləyəndən sonra yeni bina da olacaq. Başlanğıcda kiçik tamaşalarla başlayacağıq. Böyük tamaşalarımız olsa Akademik Milli Dram Teatrının, Gənc Tamaşaçılar Teatrının nəzdində onları nümayiş etdirəcəyik. Teatrda şifahi xalq ədəbiyyatına, folklor nümunələrimizə üstünlük veriləcək. Nağıllarımız, dastanlarımız hələ ki, qısaldılmış şəkildə tamaşaya qoyulacaq. Amma heyətimiz çoxaldıqdan sonra, artıq onların tam şəkildə səhnələşdirilməsinə başlanılacaq. Yaxınlarda ola bilsin ki, yeni seçimlərimiz olsun. Bu zaman teatra yeni aktyorlar cəlb olunacaq”. Sonda truppa rəhbəri onu da qeyd etdi ki, teatrın saytı - www.truppa.tk da yaradılıb: “Hələlik yüksək səviyyədə hazırlanmış bir sayt olmasa da, inşallah yeni xəbərlərimizi burda tamaşaçılarımızla bölüşəcəyik. İnşallah gələcəkdə işlərimiz daha da genişlənər. Saytımız da daha professional şəkildə fəaliyyət göstərər”.

Aygün Asimqızı

Üç nöqtə.-2013.-9 aprel.-S.13.