Bakıda Beynəlxalq Müasir Musiqi Festivalı keçirilir

Rauf Abdullayev: “Bu festivala bir musiqi təntənəsi deyə bilərik”

Aprelin 14-dən etibarən Bakıda Mədəniyyət və Turizm Nazirliyinin təşkilatçılığı ilə Qara Qarayev adına V Beynəlxalq Müasir Musiqi Festivalı keçirilir. Azərbaycan Dövlət Filarmoniyasında təntənəli açılış mərasimi təşkil edilən festival proqramına uyğun olaraq davam edir. Bu haqda “Üç nöqtə”yə danışan xalq artisti, dirijor Rauf Abdullayev bildirdi ki, dahi bəstəkarımızın adını daşıyan festival çox uğurla davam edir: “Bu festivala bir musiqi təntənəsi deyə bilərik. Çünki burda dünyanın müxtəlif ölkələrindən olan musiqiçilər çıxış edirlər. Bu da Azərbaycanın və musiqiçilərimizin dünyada tanıdılması və əlaqələrin genişləndirilməsi baxımdan önəmlidi. Bu festivalın təməli 1980-ci illərdə qoyulub. Arada bir müddət fasilə verilməsinə baxmayaraq bu gün festival öz əhəmiyyətini qoruyub saxlayır. Festivalda Azərbaycanla yanaşı, Almaniya, Avstriya, Fransa, Hollandiya və Rusiyan müasir musiqini mükəmməl ifa edən solist və kollektivləri təmsil olunacaq. Biz festivalda Avropanın ən tanınmış muisiqiçilərinin əsərlərini səsləndiririk. Azərbaycan bəstəkarlarından Arif Məlikov, Xəyyam Mirzəzadə və s-lərinin əsərlərini səsləndiririk”. Rauf Abdullayev festivala gələn xaricilərin ölkəmiz haqda fikirlərinin müsbət olduğunu deyir: “Gələn qonaqların eləsi var ki, Azərbaycanda dəfələrlə olub. Eləsi də var ki, birinci dəfədir Bakıya gəlir. Hər tərəf yaşılıq, gözəlliklə əhatə olunub. Belə bir ölkədə festivalda iştirak etməkdən məmnunluqlarını bildirirlər. Azərbaycanda da çox gözəl təşkilatçılıq işləri aparılıb və gözəl məkanlarda bu festival keçirilir”.

Qeyd edək ki, festival çərçivəsində Muzey Mərkəzində Azərbaycan Bəstəkarlar İttifaqı və Üzeyir Hacıbəyli adına Bakı Musiqi Akademiyası tərəfindən müasir musiqinin problemlərinə həsr olunmuş elmi konfrans, Beynəlxalq Muğam Mərkəzində, Rəşid Behbudov adına Azərbaycan Dövlət Mahnı Teatrında, Müslüm Maqomayev adına Azərbaycan Dövlət Filarmoniyasında və filarmoniyanın kamera və orqan musiqisi zalında xarici və yerli musiqiçilərin, musiqi kollektivlərinin ifasında konsertlər keçiriləcək. Festivalın başqa bir orijinal layihəsi Azərbaycan Dövlət Gənc Tamaşaçılar Teatrının səhnəsində ekstravaqant klassiklərdən biri Mauricio Kagelin musiqisi əsasında "Variete" tamaşasının nümayişi olunmasıdı. Festivalın bədii rəhbəri əməkdar incəsənət xadimi, professor Fərəc Qarayevdir. Onu da bildirək ki, Qara Qarayev adına V Beynəlxalq Müasir Musiqi Festivalı aprelin 19-dək davam edəcək.

Aygün Asimqızı

Üç nöqtə.-2013.-16 aprel.-S.13.