“Gəncliyimin qədrini bilməmişəm”

 

Biz onu daha çox teatr aktrisası kimi tanıyırıq. Amma o səhnə faliyyətinə ilk olaraq müğənni kimi başlayıb. Hətta müğənni kimi də iddialı olduğunu deyir. Həmin şəxs bu dəfə “Şənbə qonağı”mız olan əməkdar artist Xanım Qafarovadı. Bu dəfə də ənənəmizə sadiq qalaraq qonağımızın redaksiyaya gələcəyi vaxtı öncədən müəyyən edib internetdə elan verdik. Tamaşaçılar da sevimli aktrisamıza olan suallarını “Facebookda (F) “Ucnoqta.az şənbə qonağı” səhifəsində yazdılar, ya da aktrisa redaksiyamızda olan vaxt telefonla (T) zəng edib birbaşa müğənninin özünə verdilər. Xanım Qafarova da ona ünvanlanan bütün sualları cavablandırdı.

- Bir neçə nəfər səhhətinizlə bağlı sizə sual yazıb. Ona görə istəyərdim ilk olaraq səhhətinizdən danışaq. Necəsiniz?

- Əvvəllər səhhətimdə problem var idi. Şükürlər olsun indi yaxşıyam. İşimin başındayam. Amma hələ ki, müalicəm davam edir. Hələ bir neçə müddət də müalicə almalıyam.

- Yeni mövsüm başlayır. Bu mövsümdə tamaşaçı sizdən nələr gözləsin?

- İnşallah yeni mövsümdə işlərimə davam edəcəm. Çəkildiyim “Qaynana” serialı bitdi. 3-4 kanaldan serial təklifi almışam. Bir neçə günə hansına çəkiləcəyim müəyyənləşəcək.

- Bu gün nə qədər çox serial çəkilsə də, aktyorlar, bu sahədə çalışan və çalışmayan insanlar tərəfindən qınaq hədəfinə çevrilir. Siz necə hazırkı seriallarımızı bəyənirsinizmi?

- Bizdə serial çəkilməsinə yeni başlanıb. Hər zaman işə yeni başlayarkən bunlar olmalıdır. Gənclər üçün bir məktəbdi. Praktika keçib öyrənməlidirlər. Heç bir ölkədə hansısa işə başlayan kimi professional nəticə əldə olunmur. Arzu edirəm ki, bütün seriallarımızda peşəkar aktyorlarımız oynasın. Gənclər də onlarla bərabər seriala çəkilir. Bu işdə yeni olanlar öz işinin ustadı olanlardan bu yolla öyrənməlidirlər. Bizimlə bərabər seriala çəkilən o qədər gənclər var idi. Sənubər İskəndərli, mən və digər aktyorlarımız həmin gəncləri istiqamətləndirirdik, məsləhətlərimizi verirdik. Narazılıq etməklə biz onlara heç nə öyrədə bilmərik. Hər nədirsə bizimdi. Yaxşısı da, pisibizim adımızadı. Müəyyən bir vaxt keçdikdən sonra bizim də seriallarımız istədiyimiz səviyyədə olacaq. Nə bilmək olar bəlkə bir müddət keçdikdən sonra bizim də seriallarımız dünya bazarına çıxacaq. Bizim aktyorlarımız bəyəm gücsüzdülər? Sadəcə olaraq onlarda seriala çəkilmək təcrübəsi yoxdu. Bir-iki hissəli bədii filmlərə çəkiliblər. Amma serial tamam başqadı. Seriallara sənət əsəri kimi baxmaq düzgün deyil. Dünyanın heç bir ölkəsində seriala sənət əsəri kimi baxılmır. Sadəcə olaraq akyorlar onlara həvalə olunan rolu düzgün oynamağı bacarmalıdırlar. Digər işlər də yaxşı görülsə serial da baxımlılıq qazana bilir. Bizdə də yavaş-yavaş bu təcrübə qazanılır.

- Seriallarımız çəkildiyi vaxtdan bu günə qədər nələrdə irəliləyiş olub?

- Yeni başlayarkən ssenaristlərimiz də təcrübəsiz idi. Ailə həyatı qurmayan, övladı olmayanlar bu hissləri bilmədən ailə münasibətlərindən ssenari yazır. Buna görə də həmin gəncin yazdığında da qeyri-peşəkarlıq özünü göstərəcək. Təcrübə artdıqca hər şey yaxşı olacaq. Seriallarımız yeni çəkiləndə baxmaq mümkün deyildi. Sonrakı il bir az düzəldi. Daha sonra başqa irəliləyişlər oldu.

- Dediz ki, gənclərə məsləhətlərimizi veririk. Lakin bəzən gənclərin özlərindən razı olduqlarını, başqalarını dinləmədiklərini də deyirlər. Məsləhətlərinizdən nəticə çıxaranlar olur?

- Bizim vaxtımızın gəncliyi tamam başqa tərbiyə görmüşdü. Sovet tərbiyəsi görmüşük. İndiki gənclər çox sərbəstdilər. Onlar öz sözlərini deyə bilirlər. Amma bu o demək deyil ki, hər şey xaosa gətirib çıxarmalıdır. Gənclərin öz istəklərini deyə bilmələri əslində yaxşı haldır. Hamısına şamil etmirəm. Bəzi gənclər elədir. Bir az ulduzluq xəstəliyi tutandan sonra təkəbbürlü olurlar. Bunlar da onların yaşının az olmasından irəli gəlir. Bizim vaxtımızda hər bir şeyi sərt dillə deyirdilər. Amma indiki gəncə sərt heç nə demək olmaz. O dəqiqə cavab verir. Ona görə hərəni öz dili ilə dilləndirmək lazımdır.

- Gülarə Ramazanlı (T): Əvvəllər səhhətinizdə problem var idi. Həm eviniz yox idi. Bilmək istəyirəm indi vəziyyət necədi?

- Xanım Qafarova: Səhhətim şükür Allaha yaxşıdı. Ev məsələsi inşallah tezliklə həll olunar.

- Xəyalə Məmmədova (F): Teatrda çalışan aktyorlar maaşlarının az olduğunu deyirlər. Sizcə bu sahədə gəlirin az olması gənclərin teatra gəlişinə mane olurmu?

- X.Qafarova: Teatrda çalışanlar işinin fanatı olanlardı. Teatra gələnlər xüsusən gənclər maaşın azlığından gileylənirlər. Fikirləşirlər ki, mən burda aldığım məvaciblə necə ailəmi dolandırım. Sənətini dəlicəsinə sevənlər tetarda qalıb. Teatr bir bataqlıqdı. Ora girdinsə batıb qalırsan. Artıq bizim gedən yerimiz yoxdu. Amma indi şükürlər olsun ki, indi seriallarımız var. Qazanc əldə etmək olur.

- Seriallardan çox təklif gələrsə teatrdakı işinizdən uzaqlaşa bilərsiz?

- Sağ olsun teatrın rəhbərliyi ki, bizə imkan yaradır ki, seriallarda da çəkilək. Onların da işlərini yarıda qoymamaq şərtilə. Çəkildiyim seriallarda da bilirlər ki, mənim oynadığım tamaşa var. Mən hansı günlər tamaşada oluramsa, həmin gün çəkilə bilmərəm. Bu şərtlə müqvilə bağlayırıq. Mən teatrdan da ayrıla bilmərəm.

- Sevinc Əhmədova (T): Sizi əvvəllər Afaq Bəşirqızı ilə bir yerdə çox görürdük. Amma son zamanlar görmürük.

- X.Qafarova: Mən yenə Afaq Bəşirqızı ilə bir tetarda çalışıram. Amma sadəcə olaraq bizim teatr xeyli vaxtdır təmirdə idi. Biz Dənizçilər evində tamaşalar göstərirdik. Orda isə böyük tamaşalar səhnəyə qoya bilmirdik. İnşallah yeni mövsümdə tetarımızın binası təmir qurtardıqdan sonra böyük tamaşalar səhnəyə qoyulacaq. Allah can sağlığı versin Afaq xanıma. Yenə onunla bir yerdə işləyəcəyik.

- Aysel Əliyeva (F): Gəncikən elə bir rol olub ki, oynamağa risk etməyəsiniz. Bu isə kaş oynayaydım deyəsiz?

- X.Qafarova: Yox olmayıb. Xoşbəxtliyim o olub ki, tetara gələn gündən baş rolları canlandırmışam. Mən musiqili komediya janrına gəldiyim üçün bir janrda oynamışam. Amma içimdə olan potensial bütün janrlara aiddir. Amma bizim teatrın janrına uyğun məcburam ki, yalnız komediya oynayım. Amma bizim teatrın adında dəyişiklik oldu. Musiqili teatr adlanacaq. Bununla bağlı bizim teatrda müxtəlif mövzulu tamaşalar qoyulacaq.

- Samirə Azərova (T): Xanım Qafarova müğənniliyə hobbi olaraq yanaşır?

- X.Qafarova: Mən səhnəyə ilk olaraq müğənni kimi başlamışam. Festivallarda laureat olmuşam. Azərbaycan radiosunun qızlı fondunda səs yazılarım var. Teatra sonralar gəlmişəm. Teatr kollektiv, müğənnilik isə fərdi sənətdir. Müğənniliklə məşğul olmaq üçün gərək maliyyə dəstəyin güclü olsun. Ona görə mən müğənni kimi çox görünə bilmədim. 2-3 klipim oldu. Müğənni kimi qarşılandım. Amma müğənni kimi özümü reklam etdirməyə imkan yoxdu. Özüm üçün mahnılar yazdırıram, el şənliklərinə gedirəm.

- Samirə Azərova (T): İmkanınız olsaydı müğənniliyə daha çox yer verərsiz?

- X.Qafarova: Əgər imkanım olsaydı müğənniliyə yer verədim. Amma aktyorluğumu da kənara qoymazdım. Elə müğənni var ki, onun aktyorluq qabiliyyəti yoxdu. Elə aktyor da var ki, müğənniliyi bacarmır. Allahıma şükür edirəm ki, mənə həm səs, həm aktyorluq qabiliyyəti verib. Hər ikisində özümü təsdiqləyə bilərəm.

- Xalid Kazımov: Region teatrlarında 5 nəfər yaradıcı heyət varsa, texniki heyət bundan 4-5 nəfər çoxdu. Bakı teatrlarında da belə vəziyyət varmı? Əgər bu vəziyyət aradan qalxarsa aktyorların əməkhaqqının artırılmasına gətirib çıxara bilərmi?

 

- X.Qafarova: Hər bir teatrda artıq adamlar var. Elə insanlar var ki, ildə 1-2 tamaşada oynayır. Amma gəlib digər aktyorlarla eyni maaş alır. Amma onun maaşını gətirib çox çalışan aktyora versələr gözəl olar. Belə faktorlar regionlarla yanaşı, Bakı teatrlarında da var.

- Müğənniliklə aktyorluğun bir yerdə inkişaf etdirə bilərsiz?

- Mümkündür. Amma maliyyə dəstəyi olmadan heç olmur.

- Toylara müğənni kimi gedirsiz. Həmin pulla sənət üçün isə edə bilmirsiz ki?

- Yox. Çünki mənim müğənni kimi, reklamım o qədər deyil ki, toya yaxşı qiymətə gedim. toylardan qazandığım məni qane eləsin.

- Bir dəfə müsahibələrinizdə demişdiz ki, müğənnilik edən bir neçə həmkarınızın ifası sizi qane eləmir

- Onlar özləri qeyd edirlər ki, müğənniliyə hobbi kimi yanşaırlar. Amma mən müğənni kimi iddialıyam. Mən müğənni ilə duelə çıxıb yarışa da bilərəm. Sovetin vaxtında bədii şuradan keçməyən müğənnini eifrə buraxmırdılar. Mən bədii şuradan keçmiş müğənniyəm. 6-7 saat toylarda canlı ifa edirəm.

- Ailədən müğənni olmağınıza qarşı olan var?

- Yox. Bizim nəsildə çoxları yaradıcı insanlar olub. Mənim babam molla olub. Çox gözəl azan verirmiş. Nəsillikcə bizdə hamının səsi olub. Bacımın oğlu skiripka çalır.

- Könül Əhmədova (T): Aktyorluqda davamçınız varmı?

- Yox. İstəyi olsa bəlkə qızım. Bu sahədə irəli getmək üçün mənə yol açan olmayıb. Amma qızımın arxasında mən durmuşam.

- Adil Mirzəyev (F): Xanım Qafrova nələrin onun üçün artıq gec olduğunu düşünür?

- X.Qafarova: Elə şeylər var ki, gəncliyimdə qədrini bilmədim. İndi onların arzusundayam.

- Nələrin qədrini bilməmisiz ki?

- Gəncliyimin, gözəlliyimin qədrini bilməmişəm. Bütün vaxtımı işimi, sənətimi fikirləşmişəm. Şəxsi həyat fikirləşmədim. İndiki cavanlar gənc ikən özləri üçün gün ağlayırlar. Hər biri özləri üçün şərait qururlar. Amma mən çoxlarının əlimdən tutmağın həsrətini çəkdiyi bir vaxtımda heç nədən istifadə etmədim. İndi onlara görə çox peşmanam.

- Bu gün əldə etdiklərinizə görə peşmançılıq hissi keçirməyə dəyərmi?

- Şəxsən mən peşmanam. Çünki mənim sənətdə aldığım qiymət həyat şəraitim buna layiq deyildi. Gəncliyimdə hər şeyin qədrini bilsəydim indi istədiyim yerdə idim.

- Haralarda olmaq istəyirsiz ki?

- Çox yerdə. Ürəyim istədiklərini etmək üçün artıq çox gecdi. Amma bu günümüzə min şükür. Allah övladımı xoşbəxt eləsin. Reallaşdıra bilmədiyim arzuları övladımdan görərəm inşallah. İnsanın canı sağdırsa, hər şey yaxşı olacaq.

 

Aygün Asimqızı

 

Üç nöqtə.-2013.-31 avqust.-S.13.