“Bakutel-2013” yekunlaşdı

1995-ci ildən etibarən “bakutel” ikt nüfuzlularini azərbaycanda bir araya gətirir

Dünən “Bakutel-2013” Beynəlxalq Telekomunikasiya Sərgisi öz işini yekunlaşdırdı. 1995-ci ildən etibarən “Bakutel” informasiya komunikasiya texnologiyalarını (İKT) nüfuzlularını Azərbaycanda bir araya gətirir. Getdikcə beynəlxalq aləmdə də öz yerini tutaraq, yerli şirkətlərlə yanaşı, digər ölkələrin artan marağı nəticəsində qlobal təcrübə mübadiləsi meydanına çevrilən sərginin təşkilati məsələləri isə “Iteca Caspian LLC” şirkətinin üzərinə düşüb. Aparılan müşahidlərə görə, həqiqətən, bu il ziyarətçilər İKT sahəsində əsl bayramın şahidi olublar, belə ki, bu il Azərbaycan Respublikasının prezidenti İlham Əliyevin təşəbbüsü ilə “İnformasiya-kommunikasiya texnologiyaları ili” elan edilib. 2013-cü ildə ölkədə İKT sahəsinin inkişafı üçün xeyli işlər görülüb və bu sahənin bir çox nailiyyəti məhz “Bakutel 2013″ sərgisinin ekspozisiyasında öz əksini tapıb. Hər şeydən əvvəl, builki sərgi öz miqyası ilə fərqlənib. Belə ki, “Bakutel 2013″ sərgisi Bakı Ekspo Mərkəzinin üç zalı və foyesində təşkil olunub. Sərgidə Azərbaycanın aparıcı İKT şirkətləri, mobil operatorlar, rabitə operatorları və İnternet provayderləri, habelə sistem inteqratorları və distribüterlər təmsil olunublar. Sərgiyə beynəlxalq iştirakçılar da böyük maraq göstəriblər. Ölkədə “İKT ili”nin elan edilməsi sərgidə iştirak üçün əlavə stimul yaradıb, belə ki, bu il sərgidə xarici şirkətlərlə yanaşı, 15 milli pavilyon da iştirak edib. “Bakutel” çərçivəsində geniş işgüzar proqram keçirilib və bu proqrama Azərbaycan və bir sıra digər ölkələr arasında ikitərəfli görüşlər və biznes-forumlar daxil olub. Həmçinin, sərgi çərçivəsində Azərbaycanın iştirak etdiyi bütün layihələr öz əksini tapıb.

Bu sərgidəelektron xidmətlər geniş təqdim edilb. Bu xidmətlər həm rahatdır, həm də iştirakçıların və ziyarətçilərin vaxtına xeyli qənaət edir. Bu xidmət vasitəsilə sərgidə KİV nümayəndələrinin də işini asanlaşdırılıb. Hazırda xarici KİV-lər bu xidmətdən fəal istifadə edib. Kütləvi informasiya vasitələri sərgini fəal şəkildə dəstəkləyib. Təkcə bu il 40-dan çox kütləvi informasiya vasitəsi sərgini rəsmi surətdə dəstəkləyib və onların arasında əlbəttə ki, Azərbaycan, habelə BƏƏ, Gürcüstan, Rusiya və digər ölkələrin KİV nümayəndələri var. Sərgini dəstəkləyən mətbuat orqanları arasında bir çox yerli mətbuat nümayəndəsi də var. Bunlara informasiya agentlikləri, mətbuat orqanları, elektron jurnallar və veb-saytlar daxildir. Onların əksəriyyəti sərgini ilk gündən dəstəkləyib.

Son 10 ilə nəzər salsaq, özünün bu illərdəki fəaliyyəti ərzində sərgi informasiya-kommunikasiya texnologiyaları üzrə illik zirvə görüşünə çevrilib və onun vasitəsilə hər il İKT bazarında yeni texnologiyalar və ən yeni avadanlıqlar tətbiq olunur, möhkəm əlaqələr qurulur və yeni müəssisələr yaradılır. “Bakutel” sərgisində uğurlu iştirakla bağlı bir çox misal göstərmək olar. Bu il ekspozisiya sahəsi xeyli artıb və ötən il ilə müqayisədə 35 faiz genişlənib. Ümumilikdə isə sərgidə dünyanın 28 ölkəsindən 300-ə yaxın şirkətin iştirak edib. Bu sərgidə milli stendlərə böyük diqqət yetirilib və bu milli stendlərin arasında debütantlar da olub. İlk dəfə olaraq, sərgidə Argentina, ABŞ, İtaliya və Əfqanıstanın milli qrupları iştirak ediblər. Bundan əlavə, Belarus, Macarıstan, İsrail, Kanada, Latviya, Litva, Fransa, Türkiyə, Rusiya, Rumıniya, Sloveniya, Xorvatiya, Estoniya və digər ölkələrin kollektiv milli stendləri də geniş şəkildə təmsil olunub.

Artıq bir neçə ildir ki, “Bakutel” sərgisi ilə birlikdə beynəlxalq səviyyəli tədbirlər keçirilir. Məsələn, ötən il sərgi ilə eyni meydançada İnternet İdarəçilik Forumunun (Internet Governance Forum) 7-ci iclası keçirilib. Bu forum uğurlu oldu və dünyanın 100 ölkəsindən 1500-dən çox nümayəndəni bir yerə topladı. Bu il də istisna deyil, belə ki, Azərbaycan Respublikası Rabitə və İnformasiya Texnologiyaları Nazirliyinin dəstəyi ilə beynəlxalq tədbirlər keçirilib. Bura “TASİM” Konsorsiumunun əsas telekommunikasiya operatorlarının illik forumu, Asiya və Sakit okean regionu üzrə iqtisadi və sosial komissiyanın “Biliklərə əsaslanan iqtisadi inkişaf üzrə “SPECA” layihəsinin (BMT-nin Mərkəzi Asiya üzrə xüsusi iqtisadiyyat proqramı) işçi qrupu”nun iclası və Azərbaycanda dövlət və özəl İKT sektorlarının tərəfdaşlığı üzrə mütəxəssis mərkəzinin yaradılması ilə əlaqədar tədbir daxildir. 2-4 dekabr tarixində isə “İnternet – regional inkişafın və irəliləyişin lokomotivi” mövzusunda internet idarəçiliyi üzrə Azərbaycan Respublikasının Birinci Milli Forumu keçirilib.

Bu ilin böyük hadisəsi isə “Kibertəhlükəsizlik sahəsində beynəlxalq əməkdaşlıq: problemlər və perspektivlər” mövzusunda konfransı olub. Tarixdə ilk dəfə olaraq, Azərbaycan Respublikası Rabitə və İnformasiya Texnologiyaları Nazirliyi BMT ilə birlikdə ümumdünya kibertəhlükəsizlik konfransını təşkil edir və bu tədbir dünyanın 20-dən çox ölkəsindən 50-dən çox nümayəndəni bir araya gətirib. Həmçinin, seminarlar və “dəyirmi masa”lar da keçirilib. Gördüyünüz kimi, builki proqram çox zəngindir və şübhəsiz ki, mütəxəssislər üçün maraqlı olub.

Ziyarətçilərin sayına gəldikdə isə bu sərgidə 10-15 min nəfərdən çox ziyarətçi volub, bu il sərgini daha bir amil fərqləndirilib, belə ki, çox geniş işgüzar proqramı Azərbaycanda “İKT ili” ilə əlaqədar sərgi ziyarətçiləri və iştirakçılar üçün xüsusi olaraq hazırlanmış əyləncəli tədbirlər tamamlayıb. Üçüncü zalda oyun zonası, istirahət zonası və s. yerləşdirilib. Birinci gündə ziyarətçilər istifadəyə yararsız İKT hissələrindən hazırlanmış paltarların möhtəşəm nümayişinə tamaşa edib və X-bokslarda oyunda da iştirak edə biliblər. Həmçinin, lazer şousu da olub. İlk dəfə olaraq, təkcə Azərbaycanda deyil, həm də MDB-də “Bakutel” sərgisinin ziyarətçiləri qarşısında məşhur “Titan” robotu öz şou-proqramı ilə çıxış edib.

Yaradıldığı gündən bəri sərgi telekommunikasiya sahəsi ilə paralel surətdə böyüyüb, bütün dəyişikliklərə həssas yanaşıb və bir növ bu sahənin güzgüsü olub. Şübhəsiz ki, “Bakutel” sərgisinin keçirilməsi ölkədə İKT-nin inkişafına müsbət təsir göstərir. Təsəvvür edin ki, 4 gün ərzində bu sahənin bütün mənzərəsinə nəzər salmaq və onun perspektivlərini təhlil etmək imkanı qazanılıb. Hər il sərgidə bir çox yeni məhsul və xidmətlər təqdim olunur. Bunun sayəsində İKT sahəsi daim yenilənir, müasirləşir. Sərgi bu sahənin güzgüsü olaraq, rəqabət mühitinin yaranmasına kömək edir. Sərginin və bu sahənin qarşılıqlı təsirindən uzun-uzadı danışmaq olar. “Bakutel” sərgisi bu günlər ərzində həm mütəxəssisləri, həm də məsul strukturları, beynəlxalq təşkilatları, eləcə də İKT sahəsində mövcud olan bilikləri bir yerə cəm edir. Bu günlərdə Bakı İKT sahəsinin qovşağına çevrilir və diqqətini Azərbaycana yönəldir. Mən xüsusilə qeyd etmək istərdim ki, bu sahənin və sərginin inkişafı ölkə rəhbərliyinin və Rabitə və İnformasiya Texnologiyaları Nazirliyinin göstərdiyi güclü dəstəkdən asılıdır. Son bir neçə ildir ki, sərginin rəsmi açılış mərasimində Azərbaycan Respublikasının prezidenti İlham Əliyev iştirak edir və bu, sərginin yüksək statusunu bir daha vurğulayır. Artıq uzun illərdir ki, Azərbaycan Respublikası Rabitə və İnformasiya Texnologiyaları Nazirliyi “Bakutel” sərgisini yaxından dəstəkləyir, nazir Əli Abbasov sərgiyə böyük diqqət yetirir və nazirliyin Beynəlxalq əlaqələr departamenti fəal işlər həyata keçirir.

Üç nöqtə.- 2013.- 6 dekabr.- S. 9.