İKT BMT tərəfindən minilliyin ideologiyası elan olunub

İnformasiya cəmiyyətinin əsasını da məhz bu yeni texnologiyalar təşkil edir

Məlum olduğu kimi ölkəmizdə III Bakı Beynəlxalq Humanitar Forumu keçirildi. Aktual humanitar əməkdaşlıq məsələlərinin müzakirəsi məqsədini daşıyan forumda diqqət çəkən məqam “Qloballaşan informasiya məkanında medianın aktual məsələləri” adlı bölmə iclasında yeni texnologiyalar və müasir media, KİV və svilizasiyalar arasında dialoq: mədəniyyətlərin qütbləşməsindən qarşılıqlı əlaqələrə və tolerantlığa doğru, həmçinin ənənəvi jurnalistika və sosial şəbəkələr mövzularında məruzələr idi. AMEA İnformasiya Texnologiyaları İnstitutunun şöbə müdiri, iqtisadiyyat üzrə fəlsəfə doktoru, dosent Əlövsət Əliyev “Müasir media və informasiya iqtisadiyyatının formalaşması” adlı məruzəsində cəmiyyətdə müasir mediasistemin rolu və yeri, mediasistem inkişaf faktoru kimi, İKT və İnternet mediasistemin əsası kimi, media vasitələrinin transformasiyası məsələləri, iqtisadi aspektləri, media-iqtisadiyyat və informasiya iqtisadiyyatı konsepsiyası və s. haqqında məlumat verərək qeyd edib ki, bəşəriyyətin inkişaf xüsusiyyətləri və istiqamətləri texnoloji yeniliklərlə bağlı olduğu kimi, müasir mediasistemin inkişaf xüsusiyyətləri də bilavasitə İKT-in imkanlarına əsaslanır. Bəşəriyyətin, o cümlədən mediasistemin gələcək inkişafının da informasiya texnologiyalarının nailiyyətləri ilə bağlı olduğunu vurğulayan Ə.Əliyev BMT tərəfindən minilliyin ideologiyası elan olunan İnformasiya cəmiyyətinin əsasını da məhz İKT-nin təşkil etdiyini diqqətə çatdırdı. “KİV-lər – informasiya müharibələrindən dialoqa doğru” adlı məruzə ilə çıxış edən institutun şöbə müdiri, texnika üzrə fəlsəfə doktoru Yadigar İmamverdiyev medianın hələ XX əsrin əvvəllərindən qloballaşma proseslərinə qoşulduğunu bildirdi. KİV-lər və informasiya müharibələri, sivilizasiyalar arasında qarşılıqlı təsirlər, sivilizasiyaların dialoqunda KİV-lərin rolu kimi mövzulara toxunan alim qloballaşma mərhələsində bəşəriyyətin qarşısında duran qlobal təhlükəsizlik təhdidlərinin sayı və miqyasının artdığını dedi. İnformasiya resurslarının dəyəri və əhəmiyyətinin çoxaldığını vurğulayan Y.İmamverdiyev, informasiya proseslərinin intensiv inkişaf etdiyini və eyni zamanda neqativ təsirlərin daha qabarıq meydana çıxdığını qeyd etdi. Həmçinin kibercinayətkarlıq, kiberterrorizm, informasiya müharibələri təhlükəsi məsələlərindən danışıb.

AMEA İTİ-nin əməkdaşlarının “İnformasiya-kommunikasiya texnologiyalarının tətbiqi” VII Beynəlxalq konfransında iştirakını da «İKT ili” çərçivəsində həyat keçirilən addım kimi dəyərləndirmək olar. Moskva Dövlət Universitetinin Bakı filialında “İnformasiya-kommunikasiya texnologiyalarının tətbiqi” VII Beynəlxalq konfransının (AICT – The 7th International Conference on Application of Information and Communication Technologies) bölmə iclaslarında fəal iştirak edən tədbirin təşkilatçılarından olan AMEA İnformasiya Texnologiyaları İnstitutunun əməkdaşları idarəçilikdə İKT, elektron hökumətdə İKT, biznes inzibatçılıq, maliyyə və iqtisadiyyatda İKT bölmələrinin işinə rəhbərlik ediblər.

İnstitutun fəaliyyət istiqamətləri haqqında məlumat verən iqtisadiyyat üzrə fəlsəfə doktoru, dosent Əlövsət Əliyev institutda və rəhbərlik etdiyi şöbədə informasiya iqtisadiyyatı, milli innovasiya sisteminin qurulması, müasir İKT infrastrukturunun formalaşması, elektron hökumət, kosmik sənayenin inkişafı üzrə görülən işlər və əldə olunan nailliyyətlərdən danışıb.

Elektron dövlət mühitində informasiya təhlükəsizliyinin idarə olunması ilə əlaqədar çıxış edən institutun şöbə müdiri, texnika üzrə fəlsəfə doktoru Yadigar İmamverdiyev kritik informasiya təhlükəsizliyi risklərinin qiymətləndirilməsi üçün ekstremal qiymətlər nəzəriyyəsi əsasında təklif edilmiş model haqqında məlumat verib. Bildirib ki, İnformasiya Texnologiyaları İnstitutu etibarlı informasiya təhlükəsizliyi sisteminin yaradılması istiqamətində öz töhfələrini verməkdədir.

İnstitutun böyük elmi işçisi Roza Şahverdiyeva innovativ texnoparkların idarətmə mexanizmlərinin təkmilləşdirilməsi aspektləri, elmi işçi Aybəniz Əliyeva informasiya iqtisadiyyatının inkişaf səviyyəsinin qiymətləndirilməsi üzrə indikatorlar sistemi mövzusunda məruzələrlə çıxış ediblər.

Konfransda institutun əməkdaşları Türkiyə, Özbəkistan, Qazaxıstan və digər ölkələrin alim və mütəxəssisləri ilə İKT sahəsində əməkdaşlıq perspektivlərini müzakirə ediblər.

“İnformasiya-kommunikasiya texnologiyalarının tətbiqi” VII Beynəlxalq konfransına start verildi

Qeydə edək ki, “İnformasiya-kommunikasiya texnologiyalarının tətbiqi” VII Beynəlxalq konfransın təşkilatçıları AR Rabitə və İnformasiya Texnologiyaları Nazirliyi, Təhsil Nazirliyi, Qafqaz Universiteti, Bakı Dövlət Universiteti, Azərbaycan Texniki Universiteti, Moskva Dövlət Universitetinin Bakı filialı , AMEA İnformasiya Texnologiyaları İnstitutu, “IEEE” Azərbaycan bölməsi və SOCAR şirkətidir.

Mütəxəssislərin sözlərinə görə, ölkəmizin tarixində əlamətdar hadisələrdən biri Azərbaycanda İKT-nin sürətli inkişafı və onun insan həyatına gətirdiyi dəyişikliklərdir. İnnovativ texnologiyaların dinamik inkişaf etdiyi və istənilən fəaliyyət sahəsində məhz yüksək texnologiyalardan geniş istifadə sayəsində mühüm əhəmiyyət kəsb edən elmi nəticələrin əldə olunduğunu söylənilir. Son illərdə Azərbaycanda bu sahədə ciddi işlər görülür, innovativ layihələr həyata keçirilir. Bu ilin əvvəlində süni peykimizin orbitə buraxılması isə ölkəmizdə İKT sahəsində əldə olunan nailiyyətlərin göstəricisi kimi qiymətləndirilir. Mütəxəssislər Azərbaycanda informasiya cəmiyyətinin qurulması prosesinin dövlət siyasətinin əsas prioritet istiqamətlərindən olduğunu vurğulayırlar.

“IEEE” təşkilatının Azərbaycan bölməsinin rəhbəri Abzetdin Adamov müasir dünyada İKT-nin müxtəlif fəaliyyət sahələrində tətbiqinin əhəmiyyətindən söz açırıb, bu istiqamətdə əməkdaşlıq əlaqələrinin, həyata keçirilən layihələrin önəmliyini qeyd etdi. İştirakçı ölkələr arasında bilik və təcrübə mübadiləsinin aparılması baxımından tədbirin böyük əhəmiyyətə malik olduğunu diqqətə çatdırıb.

Qeyd edək ki, İKT ili çərçivəsində Azərbaycan Texniki Universitetində (AzTU) texnologiyaların ötürürlməsi üzrə beynəlxalq treninqlər başlayıb.

AzTU-nun mətbuat xidmətindən bildiriblər ki, treninqlərdə Azərbaycan Texniki Universiteti ilə yanaşı, Odessa Çuma Əleyhinə Elmi-Tədqiqat İnstitutu, ADRNŞ-ın Neftqazlayihə Elmi-Tədqiqat İnstitutu, Azərbaycan Texnologiya Universiteti , AMEA-nın müxtəlif elmi-tədqiqat institutlarının əməkdaşları iştirak edirlər.

Bir həftə davam edəcək treninqlər əqli mülkiyyətin qorunması, elmi kəşflərin və ixtiraların patentləşdirilməsi, istehsalata tətbiq olunması, beynəlxalq elmi layihələrin hazırlanması, yeni texnologiyaların ötürülməsi məsələlərini əhatə edəcəkdir.

Treninqlər başa çatdıqdan sonra bir ay ərzində həmin mövzular üzrə distant təhsil həyata keçiriləcəkdir. Hər bir dinləyiciyə mövzulara uyğun sertifikatlar veriləcəkdir. Treninqlərin keçirilməsində Azərbaycan mütəxəssisləri ilə yanaşı, Ukrayna Milli Texniki Universitetinin nümayəndələri də iştirak edirlər.

Azərbaycan Respublikasının Prezidenti yanında Elmin İnkişafı Fondunun icraçı direktoru Elçin Babayev və Azərbaycan Texniki Universitetinin rektoru, professor Havar Məmmədov dinləyicilər qarşısında çıxış edərək beynəlxalq treninqin əhəmiyyətindən danışıblar.

Üç nöqtə.-2013.- 19 dekabr.- S.9.