Müasir gənclik və İKT sahəsində innovasiyalar

İntiqam Babayev: «İstərdik ki, Azərbaycan gəncliyi sosial şəbəkələrdə ölkəmizin mədəniyyətini dünyaya çatdırsın»

Müsair dünyanı informasiya və kommunikasiya texnologiyaları olmadan təsəvvür etmək mümkün deyil. Avropaya inteqrasiya yolunu tutan Azərbacanda da müasir informasiya və kommunikasiya texnologiyaları əksər sahələrə tətbiq olunub. Azərbaycanda «Ümumtəhsil məktəblərində informasiya və kommunikasiya texnologiyaları ilə təminatı Proqramı»na uyğun olaraq elektron dərsliklər hazırlanıb, orta məktəblər internet şəbəkəsinə qoşulub, bir sözlə, ümumi təhsil sisteminin informasiyalaşdırılması konsepsiyası həyata keçirilib. Lakin respublikamızda orta məktəblərdə kompyuter təhsili ala bilməyən və hazırda belə kurslarda iştirak etmək üçün maddi imkanı olmayan xeyli yeniyetmə və gənc var. Nəzərə alsaq ki, müasir dövrdə informasiya və kommunikasiya texnologiyaları sahəsində kifayət qədər biliklərə sahib olmadan uğur əldə etmək mümkün deyil. Bu problemin həllinin nə qədər vacib olması aydın görünər.

Dünən də “Müasir gənclik və İKT sahəsində innovasiyalar” mövzusunda dəyirmi masa keçirilib. Azərbaycan Respublikası Gənclər və İdman Nazirliyinin Gənclərin Problemləri üzrə Elmi Araşdırmalar Mərkəzinin keçirdiyi tədbirin məqsədi gənclərin müasir texnologiyalardan istifadəsi sahəsində bilik və bacarıqlarının artırılması və maarifləndirmə işinin gücləndirilməsıdır. Tədbirdə dövlət orqanlarının məsul şəxsləri, qeyri-hökumət təşkilatlarının və ictimaiyyət nümayəndələri iştirak edib. Tədbirdə müasir cəmiyyətimizdə İKT-nin inkişafı və yeni innovasiyaların tətbiqi, ölkənin daxili siyasətinin prioritet istiqamətlərindən birinə çevrilib. Ölkə prezidenti cənab İlham Əliyev tərəfindən 2013-cü ilin “İnformasiya-kommunikasiya texnologiyaları ili” elan edilməsi, bu proseslərin daha da sürətlə inkişaf etməsi üçün geniş şərait yaradır. Məlum olduğu kimi, gənclərin davamlı inkişafı istiqamətində yeni innovasiyaların tətbiqi mühüm əhəmiyyət kəsb edir. İKT sahəsində uğurlara nail olmaq üçün gənclərimiz biliklərini daim artırmalı və öz üzərlərində çalışmalıdırlar.

DAHA YAXŞI OLARDI Kİ, GƏNCLƏR SOSİAL ŞƏBƏKƏLƏRDƏ DAHA SƏMƏRƏLİ VAXT KEÇİRSİN

Tədbirdə çıxış edən gənclər və idman nazirinin müavini İntiqam Babayev Azərbaycanda gənclər günü ilə bağlı müxtəlif tədbirlər keçirildiyini bildirib: «Gənclərin müasir İnformasiya Kommunikasiya Texnologiyaları (İKT) sahəsində məlumatlandırılması işi həyata keçirilir. Artıq müasir dünyada İKT həyatımızın ayrılmaz bir hissəsidir. Xüsusən, gənclərin həyatını müasir İnformasiya Kommunikasiya Texnologiyaları olmadan təsəvvür etmək olmaz. Bu il Azərbaycanda “İnformasiya-kommunikasiya ili” elan olunub. Gənclərin əksəriyyəti bu gün sosial şəbəkələrdə fəaliyyət göstərir. Amma daha yaxşı olardı ki, gənclər sosial şəbəkələrdə daha səmərəli vaxt keçirsin. Ölkəmizin problemləri dünya ictimayyətinə çatdırılsın».

GƏNCLƏRİN VƏTƏNPƏRVƏRLİK RUHUNUN ARTIRILMASI ÜÇÜN SON İLLƏR MÜXTƏLİF KOMPYUTER OYUNLARI DA YARADILIB

İ.Babayevin sözlərinə görə, gənclərlə yanaşı, yaşlı nəslin də kompüterə marağı böyükdür: «Gənclərin vətənpərvərlik ruhunun artırılması üçün son illər müxtəlif kompyuter oyunları da yaradılıb. Artıq ötən il Azərbaycanın xüsusi təyinatlılarının işğal altında olan Şuşa şəhərininin azad etməsini əks etdirən kompyuter oyunu istifadəyə verilib. “Azərbaycan gəncliyi 2011-2015-ci illərdə” Dövlət Proqramının ayrı-ayrı bəndlərində də yeni texnologiyaların tətbiqini nəzərdə tutan bəndlər var. Proqramda milli kompüter oyunlarının hazırlanması öz əksini tapıb. Ötən il “İşğal altında - Şuşa” adlı kompüter oyunu yaradılıb. Bu il isə “İşğal altında 2-Ağdam” kompüter oyunu hazırlanır. Bu il yay aylarında isə beynəlxalq şirkətlə birlikdə ingilis, rus və Azərbaycan dillərində “Odlar yurdu” adlı ikinci kompüter oyunu təqdim olunacaq. Azərbaycanın orta əsr tarixini əhatə edən oyun beynəlxalq aləmə çıxarılacaq. Kompüter oyunları istiqamətində bir neçə layihə həyata keçirilib. Bu gün kompüter sosial şəbəkələr, internetin həyatımızın ayrılmaz hissəsinə çevrildiyindən bu sahələrin inkişaf etdrilməsi zəruridir. İstərdik ki, Azərbaycan gəncliyi sosial şəbəkələrdə Azərbaycanın tarixinin, mədəniyyətinin beynəlxalq aləmə çatdırılması istiqamətində fəaliyyət göstərsin».

Tədbirdə çıxış edən Rabitə və İnformasiya Texnologiyaları Nazirliyinin Məlumat Hesablama Mərkəzinin direktoru Nail Mərdanov isə qeyd edib ki, hazırda nazirliyin “E-xidmətlər” portalına 40 dövlət qurumu qoşulub. Nazirlər Kabineti tərəfindən təsdiq olunan 417 xidmət növündən 118-i portala inteqrasiya olunub. Yanvar ayında portala daxil olmaların sayı 32 minə çatıb.

İKT-nin MÜXTƏLİF TALEYÜKLÜ PROBLEMLƏRİN HƏLLİNDƏ ROLU GETDİKCƏ ARTIR

Yaşadığımız müasir dövr dünyada formalaşmaqda olan informasiya cəmiyyətinin prinsip və tələbləri əsasında qurulur. Bu gün elm və təhsil, sosial-iqtisadi, mədəniyyət sahələrində, bir sözlə istənilən sferada innovativ inkişafa nail olmaq, kreativ kadr hazırlığı siyasətini həyata keçirmək, nəhayət, bu cəmiyyətin tamhüquqlu üzvü kimi beynəlxalq aləmə inteqrasiya olunmaq hər bir ölkənin qarşısında duran başlıca vəzifələrdən biridir. Yeni cəmiyyətin vətəndaşı kimi yetişmək üçün gənc nəsil İKT-biliklərini mənimsəməli, müasir texnologiyalardan istifadə bacarığına malik olmalı, bu sahədə mütəmadi olaraq maariflənməli, əldə etdiyi bilikləri tətbiq etməyi və eyni zamanda da aşılamağı bacarmalıdır. Bu gün dünyada İKT-nin innovativ inkişafı və tətbiqi, yüksək ixtisaslı kadrların hazırlanması məsələləri hər bir ölkənin daxili siyasətinin prioritet istiqamətlərindən birinə çevrilib. Bu istiqamətdə beynəlxalq səviyyədə münasibətlər qurulur, İKT-nin müxtəlif problemlərinin araşdırılması, həlli və tətbiqi ilə bağlı alim və mütəxəssislər arasında əməkdaşlıq əlaqələri yaradılır, bilik, təcrübə mübadiləsi aparılır, qlobal layihələr həyata keçirilir. İnformasiya texnologiyalarının yaratdığı mükəmməl imkanlar sayəsində innovativ bilik inteqrasiyası prosesləri sürətlənir, insanlar arasında yeni ünsiyyət, əlaqə formaları (forum, çat, videokonfrans, telekörpü) yaranır, müxtəlif sahələrdə mövcud problemlərin həlli asanlaşır. Əgər yaxın keçmişdə bəşəriyyət üçün mühüm əhəmiyyət kəsb edən hansısa bir problemin həlli yollarının araşdırılmasına uzun illər sərf edilirdisə, hazırda məhz müasir texnologiyaların geniş imkanları sayəsində bu işlər qısa müddət ərzində həllini tapır. Bu isə rəqəmsal texnologiyaların getdikcə daha da intellektuallaşdığını göstərir. Bir sözlə, İKT-nin müxtəlif taleyüklü problemlərin həllində rolu getdikcə artır.

Qeyd etdiymiz kimi Prezident İlham Əliyevin sərəncamı ilə Azərbaycanda 2013-cü ilin “İnformasiya-kommunikasiya texnologiyaları ili” elan edilib. 2003-2012-ci illəri əhatə edən “Azərbaycan Respublikasının inkişafı naminə informasiya və kommunikasiya texnologiyaları üzrə Milli Strategiya”sı nəticəsində İKT sahəsində əsaslı inkişaf etdirilib. Gələcək layihələr üçün həm hüquqi, həm də texniki baza yaradılıb. Ötən illər ərzində İKT sektorunun dinamik inkişafı müşahidə edilir. Yalnız 2012-ci ildə Azərbaycanda İKT sektorunun artım tempi 18 faiz olub ki, bu göstərici dünya üzrə orta artım tempindən 2.5 dəfə yüksəkdir. Yaxın zamanlarda Azərbaycanın öz telekommunikasiya peykini orbitə çıxarması İKT sahəsinin inkişafına əlavə təkan verəcək, yeni bir mərhələnin başlanğıcı olacaq.

Üç nöqtə.-2013.-1 fevral.-S.-9.