Artıq 20 məktəbdə elektron jurnal sisteminə keçid təmin olunub

Ümumtəhsil müəssisələrindən 1700-ü azərbaycan təhsil şəbəkəsinə qoşulub

Artıq xeyli müddətdir orta məktəblərin İnformasiya-Kommunikasiya Texnologiyaları ilə təchizatı sahəsində iş aparılır. 2005-2007-ci illər üçün «Ümumtəhsil məktəblərinin informasiya-kommunikasiya texnologiyaları ilə təchizatı» proqramının qəbulundan sonra bu istiqamətdə həyata keçirilən işlər nəzərəçarpacaq dərəcədə artdı. 2008-2012-ci illərdə həyata keçirilən Dövlət Proqramı çərçivəsində isə bu işlər daha da sürətləndirildi. Azərbaycanda 2013-2020-ci illərdə təhsil sisteminin informasiyalaşdırılması üzrə yeni Dövlət Proqramı təsdiq olunacaq.

Hazırda Azərbaycanın ümumtəhsil məktəblərinin 83 faizi, texniki-peşə müəssisələrinin 84 faizi, 56 dövlət orta ixtisas təhsil müəssisəsinin və ali məktəblərin hamısı kompüter avadanlığı ilə təmin olunub.

Təhsil Nazirliyi yanında Təhsil Sisteminin İnformasiyalaşdırılması İdarəsindən verilən məlumata görə, hazırda respublikanın ümumtəhsil müəssisələrində 20 şagirdə 1 kompüter, dövlət ali məktəblərində isə hər 28 tələbəyə 1 kompüter düşür. “Azərbaycan Respublikasında ümumtəhsil məktəblərinin informasiya və kommunikasiya texnologiyaları ilə təminatı Proqramı (2005–2007-ci illər)” və “2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramı” çərçivəsində təhsil müəssisələrinə 37 242 ədəd stolüstü kompüter, 2743 ədəd noutbuk və 2679 ədəd proyektor paylanıb. Təhsil müəssisələri 300-ə yaxın interaktiv lövhələrlə təchiz edilib, eyni zamanda “Elektron Məktəb” layihəsinə daxil olan 15 ümumtəhsil müəssisələrinə “1 şagird - 1 kompüter” layihəsi çərçivəsində 2200-dən çox netbuk və simsiz genişzolaqlı, filtrasiyalı internetə çıxış imkanına malik olan USB tipli modemlər verilib. Təhsilin informasiyalaşdırılması üzrə fəaliyyət istiqamətlərini “Azərbaycan 2020: gələcəyə baxış” İnkişaf Konsepsiyasında geniş əks olunub. Belə ki, konsepsiyada Azərbaycan Respublikasının “2013-2020-ci illərdə təhsil sisteminin informasiyalaşdırılması üzrə Dövlət Proqramı”nın həyata keçirilməsi qeyd edilib. Bu məqsədlə Dövlət Proqramının layihəsi hazırlanıb və yaxın müddət ərzində bu sənədin təsdiqi gözlənilir. Bundan əlavə, informasiya texnologiyalarının təhsil sistemində tətbiqi istiqamətində görülən işlərin davam etdirilməsi, məktəblərin kompüterləşdirilməsi, infrastrukturun inkişafı, pedaqoji heyətin İKT üzrə təlimlərə cəlb etdirilməsi, elektron tədris resurslarının hazırlanması davam etdiriləcək.

YÜKSƏK İKT BACARIQLARINA MALİK PEDAQOJİ KADRLARLA TƏMİNAT ƏSAS MƏSƏLƏLƏRDƏN BİRİDİR

Respublikada təhsil prosesində rəqəmsal texnologiyaların geniş istifadəsinə maneçilik törədən əsas amillərdən biri rəqəmsal şəbəkə infrastrukturunun zəif inkişaf etməsi, təhsil ocaqlarının ölkədaxili intranet şəbəkəsi ilə yetərli səviyyədə əhatə olunmaması və yüksək sürətli İnternet əlaqəsi ilə təmin olunmamasıdır. Belə ki, hazırda respublikanın ali məktəblərində İnternet əlaqəsi tam təmin olunsa da, orta təhsil məktəblərinin və orta ixtisas məktəblərinin İnternetə tam çıxış imkanlarına malik deyil. Təhsil müəssisələrinin böyük əksərinin veb-səhifələri yaradılmayıb. Bununla yanaşı, multimedia xarakterli dərsliklərin və digər tədris vasitələrinin işlənilməsi, yayılması və təhsil prosesində tətbiq olunması ləngiməkdədir. Son dövrdə bu sahədə bir sıra tədbirlər həyata keçirilib, elektron tədris sistemlərinin formalaşdırılması istiqamətində əməli addımlar atılıb. Lakin İKT tətbiqi üzrə elmi-metodiki bazanın təkmilləşdirilməsi, ümummilli səviyyədə vahid elektron təhsil məkanının təşəkkül tapması günün əsas tələbi olaraq qalır.

Azərbaycanda təhsil sisteminin islahatları ilə bağlı ən aktual məsələlərdən biri İKT tətbiq etməklə təhsilin idarə olunmasının təkmilləşdirilməsidir. Bu sırada təhsildə İKT-nin tətbiqi sahəsində yerli özünüidarə və dövlət orqanlarının fəaliyyətini tənzimləyən normativ-hüquqi bazanın təkmilləşdirilməsi, təhsil sahəsində effektiv idarəetmə üçün zəruri olan və bu sahənin vəziyyətini xarakterizə edən elektron məlumat bazası sistemi hazırlanıb tamamlanması xüsusi diqqət tələb edir. Həmçinin, ölkənin təhsil sisteminin yüksək İKT bilik və bacarıqlarına malik pedaqoji və inzibati kadrlarla təminatının müasir standartlar səviyyəsinə çatdırılması təxirəsalınmaz məsələlərdən biridir. "2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramı" çərçivəsində də bu məsələlərin səmərəli və kompleks şəkildə həlli istiqamətində xeyli iş görülüb.

MƏKTƏBLƏRDƏ İSTİFADƏDƏ OLAN KOMPÜTERDƏ PROQRAM TƏMİNATININ LİSENZİYASININ MÜDDƏTİ UZADILACAQ

Bu il Təhsil Nazirliyi tərəfindən daha 250 təhsil müəssisəsi Azərbaycan Təhsil Şəbəkəsinə qoşulacaq. Məktəblərdə istifadədə olan 32 min kompüterdə proqram təminatının lisenziyasının müddəti uzadılacaq. Orta təhsil müəssisələrinə minə yaxın kompüter və proyektor veriləcək. İKT ili çərçivəsində “Elektron məktəb” layihəsinə daha 10 təhsil müəssisəsi qoşulacaq. 2013-cü ildə təhsil sisteminin informasiyalaşdırılması istiqamətində görülən işlər nəzərdə tutulan tədbirlər planı çərçivəsində həyata keçiriləcək. Tədbirlər planı çərçivəsində Azərbaycan Təhsil Şəbəkəsinin genişləndirilməsi, elektron tədris resurslarının sayının artırılması, Təhsil portalının işinin effektiv qurulması, idarəetmədə proqram təminatının tətbiqi, təhsil müəssisələrinin avadanlıqlarla təchizatı istiqamətində fəaliyyət davam etdiriləcək. Elmi tədqiqat, ixtisasartırma və yenidənhazırlanma institutlarında müasir yanaşmaların tətbiqinin təşkilini və UNESCO-nun müəllimlərin İKT kompetensiyaları üçün standartların adaptasiyası və milliləşdirilməsi üzrə master klaslar keçirilməsi planlaşdırılır.

Artıq ümumtəhsil müəssisələrindən 1700-ü Azərbaycan Təhsil Şəbəkəsinə qoşulub. İnformasiya texnologiyalarının təhsildə effektiv bir alət kimi istifadəsi “Elektron məktəb” layihəsinə qoşulan məktəblərdə daha qabarıq əks olunur. Layihəyə qoşulan 50 pilot təhsil müəssisəsindən 43-ü ümumtəhsil məktəbləridir. Tətbiq olunan proqram təminatından istifadə etməklə məktəb rəhbərliyi hər bir şagirdin davamiyyəti, müəllimin iş yükü, sinfin dərs cədvəli və jurnalı, habelə digər mühüm məlumatları ümumi verilənlər bazasından əldə edə bilər. Cari tədris ilindən başlayaraq, “Elektron Məktəb” layihəsinə qoşulan 20 məktəbdə kağız jurnalından elektron jurnal sisteminə keçid təmin olunub. “Elektron məktəb” layihəsinin maraqlı funksiyalarından biri də Valideyn Nəzarət Sisteminin tətbiqidir. Bu sistem vasitəsilə valideynlər onlayn rejimdə övladlarının davamiyyəti ilə tanış ola bilərlər. Eyni zamanda, elektron jurnallara tətbiq olunan SMS Modul vasitəsi ilə valideynlər şəxsi mobil nömərlərində övladlarının cari qiymətləndirilməsi barədə məlumat almaq imkanları var.

Üç nöqtə.-2013.-22 fevral.-S.9.