“Muğam aləmi” Muğam Festivalı davam edir

Mənsum İbrahimov: “Azərbaycan dünyada muğamın mərkəzinə çevrilib”

Martın 9-dan etibarən ölkəmiz “Muğam aləmi” III Beynəlxalq Muğam Festivalına ev sahibliyi edir. Artıq dünyanın 24-dən çox ölkəsindən olan musiqiçilər şəhərimizin qonağıdır. Xarici ölkələrdn gələn sənətçilərlə yanaşı, festivalda Azərbaycanlı musiqilər də çıxış edir. Festivla çərçivəsində bir neçə dəfə çıxış edən xalq artisti Mənsum İbrahimov festival təəssüratlarını “Üç nöqtə” ilə bölüşdü. Bildirdi ki, bu il keçirilən festival bir çox özəlliklərinə görə, əvvəlki illərdə keçirilənlərdən fərqlənir: “Paytaxt Bakımızla yanaşı, bölgələrimizdə də konsertlər keçirilməsi vacib amillərdəndi. Belə ki, martın 10-da Lənkəran şəhərində Üzeyir Hacıbəylinin “Leyli və Məcnun” operası nümayiş edildi. Aygün Bayramova ilə birlikdə çıxış etdik. Bizi bu operada əməkdar artistlər Elçin Həşimov və Elnur Əhmədov müşayiət etdi. Fərqliliklərdən biri də, Beynəlxalq Muğam Mərkəzində ustad və şagirdin birgə keçirilən konsertidir. Bu sıradan mən martın 13-də “Qarabağ” Muğam qrupumla birlikdə, tələbəm Təyyar Bayramovla çıxış edəcəm. “Leyli və Məcnun”un ilk dəfə audio CD şəklində albomu işıq üzü gördü və açılışda festivala gələn musiqiçilərinə verildi. Eyni zamanda “Leyli və Məcnun” haqda “Film opera” adlı film də çəkilib. Bu film Nizami Kino Mərkəzində martın 17-də tamaşaçıların ixtiyarına veriləcək. Bu filmə Aygün Bayramova ilə mən çəkilmişəm. 19-da isə festivalın təntənəli bağlanış mərasimi keçiriləcək. Bağlanışda da iştirakım gözlənilir. Həqiqətən də bu festival üçün böyük təşkilati işlər aparılıb. Beynəlxalq səviyyəli festivalın təşkil olunması böyük məsuliyyət tələb edir”.

Mənsum İbrahimov martın 15-dən isə festival çərçivəsində beynəlxalq müsabiqəyə start veriləcəyini də bildirdi: “Üç gün davam edəcək müsabiqədə bu il xanəndələrlə yanaşı, instrumental ifaçıların da müsabiqəsi keçiriləcək”.

“Gələn qonaqların hər birinin ölkəmiz haqda təəssüratları çox gözəl olur. Onlar Azərbaycanla tanış olurlar, Bakımızın, bölgələrimizin gözəlliyini görürlər, milli mətbəximizin müxtəlif çeşiddə olan təamlarından dadırlar, dünyaya səs salan muğamlarımızı canlı şəkildə, sənətkarlarımızın ifalarında, öz ölkəmizdə dinləyirlər. Ümumilikdə, bu cür festivalların əhəmiyyəti ölkələrin bir-birinin musiqisi, mədəniyyəti ilə tanış olmasına şərait yaradır. Azərbaycan demək olar ki, dünyada muğamın mərkəzinə çevrilib” – deyə xalq artisti sonda bildirdi.

Qeyd edək ki, Heydər Əliyev Fondunun, Mədəniyyət və Turizm Nazirliyinin və Azərbaycan Bəstəkarlar İttifaqının birgə təşkilatçılığı ilə festival martın 19-a qədər davam edəcək.

Aygün Asimqızı

Üç nöqtə.-2013.-13 mart.-S.13.