“İstanbul Şoppinq festivalı - 2013” yenə ilk olaraq Bakını seçdi

Vahab Küçük: “İstanbulun gözəlliklərini Azərbaycanda siz dəyərli dostlarımızla bölüşməkdən çox xoşbəxtik”

Bu il üçüncü dəfə keçirilməsi planlaşdırılan “İstanbul Şoppinq festivalı 2013” ölkə xaricində ilk tanıtım olaraq Azərbaycanı seçdi. Bu münasibətlə keçirilən mətbuat konfransında çıxış edən festivalın təşkilatçısı Vahab Küçük dedi ki, “İstanbul Şoppinq festivalı” alış-veriş, dəb, əyləncə və mədəniyyət dünyasını bir arada təqdim edən bir festivaldı: “Bu il 8-30 iyun tarixlərində keçirilməsini planlaşdırdığımız festivalın ilk tanıtımını ötən il olduğu kimi Azərbaycanın paytaxtı Bakıdan başladıq. Azərbaycanın uğuruna hər zaman inanırıq. Qitələrin birləşmə nöqtəsi, dünyanın göz bəbəyi hesab olunan İstanbulun gözəlliklərini, dəyərini, mədəniyyətini bir daha dost və qardaş ölkəmiz Azərbaycanda siz dəyərli dostlarımızla bölüşməkdən çox xoşbəxtik. Bilirik ki, Azərbaycanlı dostlarımız İstanbulu çox sevirlər. Və inanırıq ki, ötən illərdə olduğu kimi bizi bu dəfə də yalnız qoymayacaqlar. Bu tədbirlərdə Azərbaycanlı dostlarımızı görmək bizim ən böyük arzumuzdu. Festivalda tək alış-verişdən əlavə müxtəlif səpkili konsertlər, dəfilələr, partilər, çəkilişlər də olacaq. Yəni bu tək alış-veriş deyil, bir mədəniyyət bayramıdı”. V.Küçük dedi ki, ötən il festivalda iştirak edən azərbaycanlı vətəndaşların sayı 2011-ci ilə nisbətən 35 faiz artmışdı: “Bu il bu faizin daha çox olmasını istəyərdik”. Tədbirdə çıxış edən əməkdar artist Tünzalə Ağayeva İstanbula heyran olduğunu dedi: “Dəfələrlə getməyimə baxmayaraq hər dəfə bu şəhərdə olanda İstanbula bir daha aşiq oluram. Biz xanımlar alış-verişi çox sevərik. Buna görə də bu il də festivalda iştirak edəcəm”. Artıq bir ildir Azərbaycanda yaşayan türkiyəli sənətçi Oya Ergün Azərbaycanı çox bəyəndiyini dedi: “İstanbulu çox sevirəm. Amma Bakı da mənə öz vətənim qədər doğmadı. Bir ildir ki, burda yaşayıram insanlarının nə qədər mehriban olduqlarını görürəm”. Tədbirdə o da bildirildi ki, festivalda iştirak edən alış-veriş məntəqələri nəzərdə tutulan 23 gün ərzində daha gec saatlaradək fəaliyyət göstərəcək. Tədbirin sonunda o da bildirildi ki, bu il festival ərəfəsində azərbaycanlı jurnalistlərin İstanbula səfəri də təşkil oluna bilər.

Aygün Asimqızı

Üç nöqtə.-2013.-2 may.-S.13.