Bakı Uşaq Teatrı Türkiyədə festivalda iştirak edəcək

İntiqam Soltan: “Bu festivala teatr iki tamaşa ilə qatılacaq”

Fəaliyyət göstərdiyi 12 il ərzində bir neçə dəfə yerini dəyişən Bakı Uşaq Teatrı bu yaxınlarda yenə başqa bir binaya köçürüldü. Əvvəllər Zabitlər Evində yerləşən teatr, sonralar Səbayeldə, Milli Parkın yaxınlığında məskən salmağa hazırlaşdı və burada hər şeyi yenidən quraraq teatr binası hazırladı. Ancaq teatrın burada da fəaliyyəti çox sürmədi. Bu məkandan sonra teatrın təyinatı Hüseynqulu Sarabski adına mədəniyyət evinə verildi. Burada şəraitsiz şəkildə 5 il fəaliyyətini davam etdirən Bakı Uşaq Teatrı tamaşalar hazırlayıb, xarici festivallara qatıldı. Teatr hazırda Suraxanı rayonu Qaraçuxur qəsəbəsi Q.Abbasov adına mədəniyyət evinin binasında fəaliyyətini davam etdirir. Teatr bu yaxınlara Türkiyədə festivalda iştirak edib. Bu barədə “Üç nöqtə”yə məlumat verən teatrın direktoru İntiqam Soltan onu da dedi ki, yaxın günlərdə Türkiyəyə daha bir qastrol səfərinə gedəcəklər: “Aprelin 23-də Türkiyədə uşaq bayramı ilə bağlı keçirilən festivalda iştirak etdik. Bu səfər zamanı bir neçə təklif də aldıq. Belə ki, yaxın günlərdə yenidən Türkiyəyə gedəcəyik. Bu səfərimizin məqsədi isə 14-15 may tarixlərində keçiriləcək V Uluslarası Ərzurum festivalında iştirak etməkdi. Bu festivala teatr iki tamaşa ilə qatılacaq. Bir tamaşa yeni quruluş verilən Abdulla Şaiqin “Əşğas” (Şəxslər) əsəridi. Bu keçən əsrin əvvəllərində Türkiyədə kimsəsiz uşaqlara yardım məqsədi ilə yazılmış kitabda çap olunmuş bir əsərdi. Azərbaycanda bu kitab demək olar ki, yox idi. Bu Azərbaycan oxucusuna tanış olmayan bir əsərdi. Amma onu deyə bilərəm ki, çox maraqlı əsərdi. Tamaşada insanlıqdan, cəmiyyətin saflığından söhbət gedir. Digər tamaşa isə mənim quruluş verdiyim bir tamaşadı ki, burda Azərbaycan və türk aktyorları bir sahədə çıxış edəcəklər. Mayın 16-sı Bakıya dönməliyik. Çünki 18-19 may tarixlərində Bakıda keçiriləcək beynəlxalq festivalda iştirak edəcəyik. Bu 20-dən artıq ölkənin qatıldığı bir festival olacaq. Mayın 20-dən sonra isə 10 ali təhsil müəssisəsində tamaşalarımız planlaşdırılır. O tamaşalardan sonra biz yenidən Türkiyəyə gedəcəyik. Mənim quruluş verdiyim tamaşanı Ankara, İstanbul da daxil olmaqla bir neçə şəhərdə oynamışıq. Həmin tamaşanı biz daha 30 şəhərdə də nümayiş etdirəcəyik”. Teatrın məkan olaraq harda yerləşməsinin fərqi olmadığını deyən teatrın direktor öz işini yerinə yetirməyə çalışdığını da söylədi: “Teatr dövlətə məxsusdu. Məkanın harda olmasından asılı olmayarq mən öz işimi görməliyəm. Mən sizə söz verirəm ki, Qaraçuxur yaxın gələcəkdə teatr mərkəzlərindən birinə çevriləcək. Qaraçuxur uşaqlar üçün ən gözəl teatr məkanı olacaq. O biri uşaq teatrlarının əziyyətini qətiyyən yerə vurmaq haqda düşünmürəm. Amma teatrın qaydalarını və uşaqlarla işləmək prinsiplərini bildiyimə görə bunu deyirəm. Bu yaxınlarda biz bir tamaşa oynadıq. Həmin tamaşada 34 bilet satılmışdı. Bu birinci dəfə üçün çox böyük rəqəmdi”. İntiqam Soltan teatrın şəhərdən uzaq yerləşməsinin daha çox aktyorlar üçün çətinlik törətdiyini deyir: “Badamdar, Lökbatan, Masazır kimi uzaq yerlədən gələn aktyorlarımız üçün teatrın Qaraçuxurda yerləşməsi bir az problem olacaq. Amma mənə elə gəlir ki, bu da zamanla həll olunacaq bir məsələdi. Biz yəqin ki buna da öyrəşəcəyik. Qızıl hər yerdə parıldayır. Məncə məkanın harda olmasının fərqi yoxdu. Bakı Uşaq teatrı indiki yerində də öz tamaşaçılarını sevindirməyi bacaracaq”

Aygün Asimqızı

Üç nöqtə.-2013.-3 may.-S.13.