“Çəkdiyim əziyyətlərin bəhrəsini görürəm”

Lalə Məmmədova: “Qadın xoşbəxtdirsə, bu mütləq onun zahirinə nüfuz edəcək”

Şou-biznesdə olan müğənnilərin çoxu bu aləmin qayda-qanunları ilə yaşayır. Amma şou-biznesin içində öz qanunları ilə yaşayıb, fəaliyyət göstərən müğənnilərimiz də var. Bu müğənnilərdən biri də əməkdar artist Lalə Məmmədovadı. Ötən il əlçatmaz arzularından olan “Leyli və Məcnun”da Leyli rolunu canlandırmaq qismət olan müğənnimiz bu dəfə “Şənbə qonağı” rubrikamızda suallarımızı cavablandırdı. Müğənni onu da bildirdi ki, yaxın zamanlarda Opera və Balet Teatrının səhnəsində “Aşıq Qərib” operasında Şahsənəm obrazını canlandıracaq. Lalə Məmmədovanın bu və digər mövzularda fikirlər söylədiyi müsahibəsini sizlərə təqdim edirik.

- Sizi həm şou-biznesə daxil olan, həm də müəyyən cəhətlərinə görə, şou-biznesdən kənar olan müğənni kimi təqdim edə bilərik?

- Bəli. Başqa sözlə desək, yazılmamış qanunlar mühitində öz qanunları ilə yaşayan birisi də adlandıra bilərsiniz.

- Bu günkü Lalə Məmmədova olmaq üçün illər sizdən nəyi aldı, nələri verdi?

- İllərin mənə çox şey verdiyini deyə bilərəm, nəinki aldı. Ümumiyyətlə, insan həyatda əldə etdiklərinə görə hər zaman minnətdar olmalıdı. Əks halda nankor insan sayılar. Şükürlər olsun ki, bu gün etdiyim heç nəyə görə heyfslənmirəm, heç nəyin peşmançılığını çəkmirəm. Düzdür, gəncliyimdə yaşıdlarım asudə vaxtlarını əyləncələrə sərf etdiyi vaxt mən studiyalarda ac-susuz musiqi ilə məşğul olmuşam. Ancaq çəkdiyim o əziyyətlərimin bəhrəsini bu gün görürəm. Bax bu məni sevindirir.

- Müğənni hər zaman yenilik etməlidir deyirlər. Müğənninin etməli olduğu yeniliklər hansılardı?

- Bu fikirlə mən də razılaşıram ki, müğənni yenilik etməlidi. Sənətçi hər hansı bir yeniliyi etmək üçün ilk növbədə təcrübə və informasiya toplamalıdı ki, görəcəyi iş hər kəsin zövqünü oxşasın. Amma bu kimdənsə ideya oğurluğu anlamına gəlməməlidi.

- Bəs dəyişiklik müğənnidə hansı formada olmalıdı?

- Müğənni bir janrda oxuyursa, bu o demək deyil ki, digər janrları bir kənara qoyub dinləməməlidi. Məsələn mahnı janrında oxuyan müğənni digər janrları - muğam, caz, pop, rok, klassik musiqiləri də dinləməlidi. Ən azı məlumatlı olmaq üçün bunlar vacibdi. Yenilik sənətçinin oxuduğu lirik mahnıları daha dinamik mahnılara dəyişməsi, xalq mahnıları üslubunda oxuyan sənətçinin caz üslubunda özünü sınaması ola bilər. Amma bu yenilik özünü doğrultduqdan sonra geniş auditoriyaya təqdim oluna bilər. Oxuduğu janrda yenilik etdikdən, yeni-yeni nəfəs gətirdikdən sonra xarici görkəminə də buna uyğun olaraq əl gəzdirməlidir. Təəssüf ki, sənətçilər çox vaxt xarici görkəmdə dəyişiklik edirlər, bununla da yenilik bitir.

- İnsanlar hansısa bir şeyə adət etdikdən sonra artıq adiləşir. Amma deyəsən səhnə həyəcanı və məsuliyyəti getdikcə artır ki azalmır?

- Düzdür, səhnə həyəcanına nə vaxtsa adiləşir deyə bilmərəm. İfasının məsuliyyətini dərk edən sənət adamının həyəcanı səhnədə neçə il olmasına baxmayaraq heç zaman azalmır.

- Bir il öncə “Leyli və Məcnun”da Leyli obrazını canlandırdız. Bu rolu ifa etməyi bir çoxları arzulayırlar. Bu rol Lalə Məmmədova üçün də arzu idi?

- Leyli rolunu canlandırmağım mənim ən əlçatmaz arzum idi. Hələ də bu arzuma çatdığıma inanmağım gəlmir.

- Rolu canlandırmamışdan öncə və sonra yaşadığınız hisslər arasında hansı fərqlər oldu?

- Düzgün qeyd etdiniz. Leylinin nakam sevgisini, Məcnunun ilahi eşqini, onların həyəcanını, o dövrün cəhalətinə qarşı üsyanlarını yaşadıqdan sonra gördüyünüz Lalə hazırdakı yaşından 10-15 il artıq böyüdü.

- Lalə Məmmədova müğənni olaraq nələri etməkdən çəkinib?

- Valideynlərimin, ailəmin və vətənimin adına ləkə gətirməkdən hər zaman çəkinmişəm. Və bir də tamaşaçı rəğbətini və hörmətini itirməkdən.

- Bu gün Türkiyə şou-biznesinə qatılmaqda bir çox ifaçılarımız maraqlıdı. Sizin buna münasibətinizi öyrənmək istəyərdim?

- Münasibətim yaxşıdı. Əlbəttə ki, bizim hansısa sənətçimiz mədəniyyətimizi qardaş ölkədə layiqincə təmsil etsə, bu tək o sənətçinin deyil, bütün Azərbaycanın uğurudu. Ona görə də mən Türkiyə şou-biznesinə qatılan həmkarlarıma uğurlar arzulayıram.

- Özünüz necə gələcəyinə Türkiyədən təklif gəlsə razılaşarsız?

- Qabaqcadan heç nə deyə bilmərəm. Təklif gəldikdən sonra bu haqda danışmaq olar. Amma vətənimdə görəcəyim işlərdə daha maraqlıyam.

- Təbii ki, yaxşı görülən bütün işlər ölkəmizin adınadı. Hansı müğənnilərimizin gördüyü işlərlə qürur duyduğunuzu deyə bilərsiz?

- Əgər çağdaş Azərbaycan musiqisindən söhbət gedirsə, istedadlı vokalist Samir Cəfərovun adını çəkə bilərəm. Bundan sonrakı fəaliyyətində də ona uğurlar arzulayıram.

- Duetlər barədə də fikrinizi öyrənmək istəyərdim. Çox vaxt səhnədə öz sözünü demiş müğənnilər gənclərə dəstək olmaq məqsədi ilə onlarla duet oxuyurlar. Sizə səhnədə yeni addım atan gənc ifaçıdan duet ifa etmək təklif gəlsə razılaşarsız?

- Əgər həmin ifaçıda istedad, səs və ruh yaxınlığı varsa, niyə də olmasın. Böyük məmnuniyyətlə, oxuyaram. Gənclərə hər zaman dəstək olmuşam.

- Bir dəfə demişdiz ki, iki qadının sevgidən duet oxumasını qəbul etmirsiz. Bəs hansı formada olan duetləri qəbul edirsiz?

- Təəssüf hissi ilə deyə bilərəm ki, bir vaxtlar dediyim bu sözlərin məqsədi hamıya tam mənada bəlli olmadı. Bu da yerli şou-biznes nümayəndələrinin bəzilərinin savadsızlığından irəli gəldi. Duet - iki insanın ifası, duet oxuyan cütlüyün bir-birinə olan hisslərini ifadə etməlidi. Əlbəttə ki, burda kişi və qadın duetindən söhbət gedir. Əgər iki qadın duet oxuyursa, düşünürəm ki, burda mövzu fərqli olmalıdı. Məsələn dünya şöhrətli Vitney Houstonla Meray Careyin duetini yadımıza salaq. Onların oxuduğu duetin mövzusu insanları Allah sevgisinə yaxın olmağa, ümidlərini itirməməyə, bəşəriyyəti sülhə çağırış idi. Çox gözəl də alınmışdı. Bəs bizim qadın ifaçılarımız çıxıb nə oxuyurlar? Duetlərin mövzusuna diqqət yetirsək daha yaxşı olar. Hər iki qadın sevgidən, giley-güzardan, yaxud da kimisə gözlədiklərindən bəhs edir. Bəlli deyil bu qadınlar bir-birini sevib oxuyurlar, yoxsa bölə bilmədikləri bir kişi haqqında. Məshur “O olmasın bu olsun” komediyasında bir kəlam var: “Qızın iki adaxlısı var”. Yəqin ki, bu kəlamı əksinə “2 qızın bir adaxlısı var” desək daha yerinə düşər.

- Hər bir məşhur xanımın gözəllik sirləri olur. Lalə Məmmədovanın elə bir sirri varmı?

- Düzünü desəm, heç kimin bilmədiyi, gizli saxladığım bir gözəllik sirrim yoxdu. Ancaq bir fikrimdə çox israrlıyam ki, qadın xoşbəxtdirsə, bu mütləq onun zahirinə nüfuz edəcək.

- Bu günə qədər heç yerdə demədiyiniz elə bir şey varmı ki, onu indi oxucularımızla bölüşəsiz?

- Sənətimlə bağlı yeniliklərimi tamaşaçılarla hər zaman bölüşmüşəm. Əgər bu vaxtadək demədiyim nə isə varsa, qoyun bundan sonra da bu bir sirr olaraq qalsın.

- Lalə Məmmədovanı bir daha tamaşaçılar Leyli olaraq nə vaxt görəcəklər?

- Tamaşaçılar məni bir daha Leyli olaraq görməmişdən öncə bu yaxınlarda Opera və Balet Teatrının səhnəsində “Aşıq Qərib” operasında Şahsənəm kimi görə biləcəklər. Sonra əlbəttə ki, qismət olsa yenə “Leyli” kimi də görüşünüzə gələcəm.

- Artıq bir neçə gündən sonra ölkəmiz İsveçin Malmö şəhərində keçiriləcək “Eurovision 2013”-də iştirak edəcək. Bu ilki təmsilçimiz haqda nə deyə bilərsiniz?

- Mən Fərid Məmmədovu “Bülbüllər” qrupundan tanımışam. Düzdü, şəxsən tanışlığım yoxdu. Amma ifasını dinlədim və bəyəndim. Müsabiqədə ifa edəcəyi mahnı da çox gözəl seçilib. Uğurlar azru edirəm. İnşallah ölkəmizə qələbə ilə dönər.

- Ümumiyyətlə, “Eurovision” müsabiqəsi haqda nə deyə bilərsiz?

- Ölkəmiz bu müsabiqədə təmsil olunduğu üçün əhəmiyyəti böyükdü. Azərbaycan bu müsabiqədə hər zaman layiqincə təmsil olunub. Eldar Qasımovla Nigar Camalın “Eurovision 2011”də qalib də gəlməsi məni çox sevindirdi. Ötən il isə müsabiqənin ölkəmizdə keçirilməsi hər bir Azərbaycanlı üçün sevindirici hal oldu. Hərtərəfli Azərbaycan bu müsabiqəyə layiqincə ev sahibliyi etdi. Düzdü, “Eurovision” bir az siyasətləşdirilmiş müsabiqədi. Amma ölkəmiz bu müsabiqədə layiqincə təmsil olunsa, hər birimizi sevindirər. Bir daha Fəridə uğur arzu edirəm.

Aygün Asimqızı

Üç nöqtə.-2013.-4 may.-S.13.