“Hər bir şey gözəl idi”

Fərid Məmmədov: “Gərək mahnı və şouyla zamanın nəbzini də tuta biləsən”

Bu il ölkəmizə “Eurovision-2013” mahnı müsabiqəsində ikincilik qazandıran Fərid Məmmədov dünən Heydər Əliyev Sarayının qarşısındakı parkda Heydər Əliyevin heykəlini ziyarət etdi. Ulu öndərin heykəli önünə gül qoyduqdan sonra təmsilçimiz jurnalistlərin suallarını cavablandırdı. Göstərilən dəstəyə görə dövlətimizə bu işdə əməyi keçən hər kəsə təşəkkürünü bildirən ifaçı vətənində olduğu üçün sevindiyini bildirdi: “Çox sevinirəm ki, artıq vətənimdəyəm. Müsabiqə iştirakçıları arasında favoritlər sırasında olmağım çox gözəl hal idi. Amma ikinci yerdə qərarlaşmaq da yaxşı nəticə idi. Çox istəyərdim ki, Azərbaycan bu il də qalib olsun və gələn il “Eurovision” yenə Azərbaycanda keçirilsin. Amma Allahın qisməti belə imiş. İki ay idi ki, bizim gündəlik məşqlərimiz gedirdi. Bu nəticə də əziyyətlərimizin bəhrəsidi. İnşallah gələcəkdə yenə birinci olarıq. Bundan sonra da boş oturmayacam. Yeni mahnılar, konsertlər, maraqlı proyektlər olacaq”.

“Çalışdım ki, öz çıxışımı layiqincə göstərə bilim”

Müsabiqənin qalibi olan Danimarka təmsilçisi Emmili de Forestin ifası haqda fikirlərini özünə saxlamağı üstün bilən təmsilçimiz favorit hesab etdiyi ölkənin adını da açıqladı: “İsveçin ifasını bəyənirdim. Lakin, İsveç onluğa düşə bilmədi. Müsabiqədə elə hal baş verdi ki, yaxşı mahnılar onluğa düşməmişdi. Bu müsabiqədi, hər cür ola bilər. Çox şükür ki, biz belə halla qarşılaşmadıq. Çünki biz onlardan daha yaxşı hazırlaşmışdıq”. Fərid Məmmədov müsabiqədə səsvermənin şəffaf aparılması haqda da danışdı: “Azərbaycan hər il yaxşı nömrə ilə çıxış edir və hər dəfə də müsabiqədə onluğa düşə bilir. Bu o deməkdir ki, sağlam rəqabət gedir. Bundan əlavə gərək mahnı və şouyla zamanın nəbzini də tuta biləsən. Bu da önəmlidi. Hər bir şey gözəl idi. Mən ən çox çalışdım ki, öz çıxışımı layiqincə göstərə bilim”. Fərid Bakıya gələrkən soyuq qarşılanması haqda yayılan xəbərlərə də münasibət bildirdi: “Qətiyyən belə bir şey yoxdu. Mən Bakıya gələndə səhər saat 5 idi. O saatlarda hava da soyuq olur. Ona görə heç kimin narahat olmasını istəmədim”.

“Rusiya bütün məlumatlara müvafiq olaraq, ikincidir”

Müsabiqə ilə yanaşı son günlər gündəmdə olan məsələlərdən biri də Azərbaycanda Rusiyaya səs verilməməsi oldu. Azərbaycanın xarici işlər naziri Elmar Məmmədyarov Moskvada rusiyalı həmkarı Sergey Lavrovla birgə mətbuat konfransının gedişatında jurnalistlərin Azərbaycanın “Eurovision-2013”-də Rusiyaya verdiyi “sıfır” balla əlaqəli yaranan insidentlə bağlı suallarını cavablandırıb. Gün.Az xəbər verir ki, E.Məmmədyarovun sözlərinə görə, televiziya ekranlarında Azərbaycan izləyicilərinin Rusiyaya təqdim etdiyi ballar görünəndə şok yaşamamaq mümkün deyildi.

“Təkcə, izləyicilər deyil, Avropa Yayım İttifaqının tərəfdaşı olan Azərbaycan İctimai televiziyası da səsvermənin nəticələrinə təəccüblənib. Səhər bu məsələnin detalları öyrənilməyə başlanıb. İTV-də şübhələrin olmasına səbəb keçirilən sorğuların efirdə səsləndirilən qiymətləndirməyə uyğun olmaması olub. Müvafiq sorğu əsasında məhkəmə tərəfindən SMS-səsverməsinin nəticələri barədə məlumatın əldə edilməsi ehtiyacı barədə qərar qəbul edilib. Ölkənin mobil operatorları, buna dair məhkəmənin müvafiq qərarı olduğuna görə, məlumatları təqdim ediblər. Budur, həmin məlumatlar əlimizin altındadır. Onları səsləndirmək istərdim. Ən böyük operator olan “Azercell” şirkətinin təqdim etdiyi məlumata əsasən, səslər aşağıda göstərilən şəkildə hesablanıb:

1. Ukrayna – 7893.

2. Rusiya – 1677.

Daha sonra siyahıda Malta, Belarus, Gürcüstan və başqa ölkələr qərarlaşıb.

“Bakcell”-in təqdim etdiyi məlumatlar isə belədir:

1. Ukrayna – 408.

2. Rusiya – 380.

Və nəhayət, “Narmobile” şirkətinin məlumatları belədir:

1. Ukrayna – 193.

2. Rusiya – 112.

Gördüyünüz kimi, tamaşaçıların verdiyi səslər yüksəkdir. Rusiya bütün məlumatlara müvafiq olaraq, ikincidir. Bəs onda bu səslər hara yoxa çıxıb? Bu isə artıq İctimai Televiziyaya (İTV) ünvanlanmalı olan sualdır, onlar bu məsələni aydınlaşdırarlar”, - deyə, E.Məmmədyarov bildirib. Xatırladaq ki, İTV-nin direktoru Cəmil Quliyevin sözlərinə görə, müsabiqə iştirakçılarına yüksək bal verən peşəkar münsiflər heyəti Rusiyadan olan təmsilçi Dina Qaripovanın da çıxışını yüksək bal ilə qiymətləndirib. Rusiya Federasiyasının (RF) xarici işlər naziri Sergey Lavrov əlavə edib ki, tərəflər belə bir razılaşma əldə ediblər ki, Azərbaycan İctimai Televiziyası hüquqi yollarla məsələyə aydınlıq gətirəndən sonra tərəflər gələcəkdə hansı müvafiq addımların atılmalı olduğuna qərar verəcəklər. “Bu məsələ cavabsız qalmamalıdır” – deyə, S. Lavrov qeyd edib.

“Bizim bildiyimizə görə, hər şey dəqiq olub”

Azərbaycanın Eurovision mahnı müsabiqəsinin şənbə günü keçirilən finalında Rusiyaya 10 xal verməsi, amma bunun nəticələrdə özünü göstərməməsilə bağlı yayılan xəbərlərə Avropa Teleradio Yayım Birliyinin rəsmisi münasibətini bildirib. "Eurovision” mahnı müsabiqəsinin finalında səsvermənin hesablanması zamanı hər hansı pozuntu olsaydı, bu barədə indiyə kimi bizə mütləq siqnal gələrdi". "Səsvermə bizim səsvermə tərəfdaşımız Digamo tərəfindən aparılır və PriceWatersHouseCoopers şirkəti tərəfindən qiymətləndirilir. Hər hansı məsələ olsaydı, bizə bu barədə siqnal çatardı". Qafqazinfo.az-ın məlumatına görə, bu sözləri ATYB-nin Avropa Mahnı Müsabiqəsi üzrə kommunikasiya koordinatoru Jarmo Siim BBC Azərbaycancaya deyib. "Bizim bildiyimizə görə, hər şey dəqiq olub", o əlavə edib. O, hər hansı qeyri-dəqiqlik halı olarsa, bu barədə "siqnalın" Digamo şirkəti tərəfindən gələcəyini bildirib. Fəridin qələbəsinə ən çox sevinənlərdən olan müəllimi əməkdar artist Aybəniz Haşımova tələbəsinin uğurlu çıxış etməsi münasibətilə qurban kəsəcəyini demişdi. Müğənni bu barədə “Facebook” sosial şəbəkəsində məlumat yazıb. Hazırda xaricdə olan müğənni bildirib ki, mayın 27-də Fəridin qurbanları kəsiləcək.

Aygün Asimqızı

Üç nöqtə.-2013.-22 may.-S.13.