“Geniş baxış” ssenari müsabiqəsi başa çatdı

Müşfiq Hətəmov: “Layihə çərçivəsindən əlavə olaraq daha iki qısametrajlı film nəzərdə tutulur”

Azərbaycan Prodüsserlər Gildiyasının ssenaristlər arasında elan etdiyi “Geniş baxış” ssenari müsabiqəsi başa çatıb. Bu münasibətlə Nizami Kino Mərkəzində keçirilən tədbirdə çıxış edən “Azərbaycanfilm” Kinostudiyasının direktoru və Prodüsserlər Gildiyasının sədri Müşfiq Hətəmov nəticələrdən razı qaldığını bildirib: “Biz ssenari seçimi mexanizmini dəyişməyə çalışdıq. Ssenari seçimi mexanizmi ilk dəfə olaraq prodüsserlər gildiyası öz üzərinə götürdü. Belə ki, hər bir prodüsser maliyyələşməni öz üzərinə götürəcək. Bu dəfə ssenarinin seçilmə prosesini biz dəyişdik. Yenə də dövlət tərəfindən sifariş olunan filmlərlə yanaşı yaradıcı insanların cəlb edilməsi daha çox oynayır. Praktika göstərir ki, bizim çəkdiyimiz filmlər yaradıcı insanların verdiyi qiymətləri kinonun nəticələri ilə özünü doğrultmur. Ona görə də prodüsser mərkəzləri ssenarini özləri seçməyi təklif etdik. Müsabiqənin keçirilməsi müasir dövrümüzdə kino sahəsində mühüm yer tutan “prodüsser kinosu” anlayışını ölkəmizdə tətbiq etmək və gənc prodüsserlərin bu peşəyə dərindən yiyələnməsi üçün şərait yaratmaqdır”.

Qeyd edək ki, müsabiqədə iştirak edənlərin işləri Prodüsserlər Gildiyasına üzv olan prodüsser mərkəzlərinin rəhbərləri və mütəxəssisləri tərəfindən araşdırılaraq qiymət verilib və yekun rəyə görə “Adari Films” prodakşn şirkətindən İradə Bağırzadə “Motivlər…” layihəsi ilə qalib olub.

““Motivlər…” layihəsi 6 (Teymur İsmayılov, Anar Abbasov, Cəfər Axundzadə, Rüfət Həsənov, Vüqar İslamzadə, Elmar İmanov) rejissorun çəkəcəyi 6 qısametrajlı filmdən ibarət kinoalmanaxdır. Layihə çərçivəsində əlavə olaraq daha iki qısametrajlı film nəzərdə tutulur. Filmləri çəkmək üçün rejissor heyəti xaricdə yaşayan və kino təhsili alan azərbaycanlılardan seçilib.

Müşfiq Hətəmov dedi ki, şərtlərə görə, müsabiqənin qaliblərinə Prodüsserlər Gildiyası tərəfindən bütün imkanlar tanınaraq film çəkmək şansı verilib: “Layihə çərçivəsindən əlavə olaraq daha iki qısametrajlı film nəzərdə tutulur. Filmləri çəkmək üçün rejissor heyəti isə xaricdə yaşayan və kino təhsili alan azərbaycanlılardan seçilib. Bizim çəkdiyimiz filmlərin texniki bazası özəl şirkətlər tərəfindən təmin olunur. Bu da atdığımız ilk addımlardan biridir. Bu layihə İradə Bağırzadənin “Motivlər” mövzusu əsasında hazırlanıb. O bizim gənc qadın prodüsserlərimizdəndir. Burada 6 gənc rejissorun qısametrajlı filmləri keçirildi ki, onların bəziləri Amerikada, Avropada kino məktəblərində təhsil alıb. Məqsədimiz isə xaricdə yaşayan yüksək potensiala malik olan gənclərimizi Azərbaycan kinosuna gətirmək və onları da təkmilləşdirməkdən ibarətdir. Biz bilirik ki, rejissor potensialımız hansı səviyyədədir. İnanıram ki, bu 6-lıqdan çıxan rejissorlarımız tam metrajlı filmlər çəkəcəklər”.

Müşviq Hətəmovun sözlərinə görə, Türklərlə “Mahmud və Məryəm” filminin çəkilməsi bizə çox uğur gətirdi: “Bu filmin çəkilişləri zamanı biz öz kadr potensialımızı bildik. Müasir çəkiliş sistemi ilə uyğunlaşa biləcəyimizi müəyyənləşdirdik. “Mahmud və Məryəm” Avropada və Türkiyədə yayıldı və xarici şirkətlər bizə ciddi partnyor kimi baxdı. Biz istəsək xarici heyətlə film çəkə bilərik, ancaq əgər o Azərbaycan filmi deyilsə, bunu istəmirik. Xarici ssenaristlərlə müştərək filmlər çəkmək niyyətindəyik. Planlarımız çoxdur”.

Müşviq Hətəmov çıxışında Kann kino festivalının onların gələcək işləri üçün uğurlu addım ola biləcəyini də dedi.

Aygün Asimqızı

Üç nöqtə.- 2013.- 30 may.- S.13.