“Gecələr Bahar deyə xatırlanacam”

Bahar Lətifqızı: “Məni gözüyumulu dinləyəndə Bahar Lətifqızı olduğunu bilirlər”

Səhnə fərqlilik, özünəməxsusluq tələb edir. Çünki tamaşaçı səsi, görünüşü, hərəkətləri ilə fərqlənən, nümunə göstəriləcək sənətçiləri yaddaşda saxlayır. Bu dəfə “Şənbə qonağı”mız səsi, sənəti ilə digər müğənnilərdən seçilən müğənni Bahar Lətifqızıdır. Ənənəmizə sadiq qalaraq qonağımızın redaksiyaya gələcəyi vaxtı öncədən müəyyən edib internetdə elan verdik. Tamaşaçılar da müğənniyə olan suallarını “Facebook”da (F) “Ucnoqta.az şənbə qonağı” səhifəsində yazdılar, ya da qonaq redaksiyamızda olan vaxt telefonla (T) zəng edib birbaşa özünə verdilər. Müğənninin ona ünvanlanan müxtəlif mövzulu sualları cavablandırdığı müsahibəsini sizlərə təqdim edirik.

- Sizə ən çox yazılan sual “Haralardadır”, “Niyə görünmür” kimi səpkidə olanlardı….

- Görünürəm. Nə qədər az olsa o qədər yaxşıdı. Kərə yağının reklama ehtiyacı yoxdu.

Məlahət Əhədova (F): Bahar xanımı sənəti ilə yanaşı, xanımlığına görə sevirəm. Amma yeni işləri çox gec-gec olur. Sualım budur ki, özü gec görünməyə üstünlük verir, yoxsa vaxt edib işlərini görə bilmir?

Bahar Lətifqızı: Belə deyək də bir az təmbəllik olur. Başım çox vaxt övladıma qarışıq olur.

Vasif Məhərrəmov (F): Səhnəyə gəlişi neçənci illərə təsadüf edir?

B.Lətifqızı: 6 yaşımda Sumqayıtda mədəniyyət evində başlamışam. Professional səhnəyə isə ilk dəfə 20 yaşımda Aztv-də çıxmışam.

- Bəs 6 yaşdan sonra arada fasilə verdinizmi?

- Çox oldu. İnsanda ruh düşkünlüyü olanda hər şeydən bezir. Bir ara bezdim. Bir il heç nə oxumadım. Amma elə də uzun fasilə verməmişəm.

Vasif Məhərrəmov (F): Səsi olduğu üçün səhnəyə gəlib, yoxsa həvəs onu səhnəyə gətirib?

B.Lətifqızı: Səsim olmasaydı oxumağa utanardım. Mən ümumiyyətlə utancaq insanam. Görsəm ki, nə isə mənə yaraşmır özümü çox narahat hiss edirəm. Ola bilsin kənardan baxanlar deyəcək ki, yaraşmır. Amma mən yaraşdığını düşündüyüm üçün rahat oluram.

Ayşən Eldarova (T): Bahar xanımı səhnədən getməyə nə vadar edə bilər?

B.Lətifqızı: Bir şey ola bilər. Onu da demək istəmirəm. Amma qalan heç nəyə görə səhnəni tərk etmərəm.

Ruhəngiz Ələsgərova (F): Bahar xanım olduğu yer üçün kimə borcludu?

B.Lətifqızı: Müəllimlərimin mənim bu yerə çatmağında böyük əziyyəti olub. Sumqayıt şəhərində Sədulla müəllimim var idi. 10 il mənimlə sərasər məşğul olub. Bundan sonra Sevinc Sarıyeva, Sabir Abdullayev, Canəli Əkbərovdan dərs almışam.

Ədalət Vəlizadə (F): Bildiyimə görə Bahar xanım uşaqlar evində böyüyüb. Valideynlərindən xəbəri varmı?

B.Lətifqızı: Nəinki valideynlərimi, hətta bütün nəslimdən xəbərim var. 2 ildir hamısını axtarıb tapmışam. Ana tərəfi bilirdim, atam tərəfi yox. Əlaqəmiz də yaxşıdı. Atam rəhmətə gedib. Anamın isə bu yaxınlarda 60 illiyini qeyd edəcəyik. Atamın birinci həyat yoldaşından 3 övladı olub. Əlaqəmiz var. Biri rəhmətə gedib, dəfnində də iştirak elədim. Amma ümumilikdə götürəndə həmişə deyirəm ki, mənə ata olacaq bir qardaşım var. Çünki mən hər zaman qardaşımla bir yerdə olmuşam.

Vəsilə Quliyeva (T): Sizcə tək mahnılarla sənətçi gündəmdə qala bilər?

B.Lətifqızı: Hə qala bilər. Mənə gördüyüm işlərin bu gün deyil, gələcəkdə qalması vacibdir.

Mehin Kərimova (F): Tələbələri varmı və onlara ən çox nəyi məsləhət görür?

B.Lətifqızı: Evdə hazırlayırdım. İki tələbəm vokaldan Samir Cəfərovun sinfinə qəbul olundu. Mən demirəm ki, bütün dəsgahları tam bilirəm. Bildiyimi tələbələrimə də öyrədirəm. Düzünü deyəcəm qızlar yanıma oxumağa gələndə deyirəm ki, gedin özünüzə iş tapın. Mən həmişə bu fikirdəyəm. Oğlanlara isə məsləhət görürəm ki, yaxşı səsi varsa, vətənimizi layiqincə təmsil edə biləcəksə oxusun.

- Qızların bu sənətə gəlməsini niyə istəmirsiz?

- Azərbaycanda xanımın müğənni olmasını istəmirəm. Hərənin öz fikri var.

- Müğənni Əkbər də açıqlamasında dedi ki, “Heç bir xanım sənətçi ilə evlənmərəm. Çünki onların mətbəxinə yaxşı bələdəm”. Müğənnilər haqda niyə bu cür fikir formalaşıb?

- Mən çətinlik mənasında istəmirəm. Pislər, yaxşılar hər bir sənətdə var. Pislər olmalıdı ki, yaxşıların qədrini bilək. Qızların doğrudan müğənni olmasını istəmirəm.

- Hansı çətinliklərlə üz-üzə gəlmisiz ki, bu gün müğənniliyi heç bir xanıma məsləhət görmürsüz?

- O qədər çətinliklər olub ki, hansını deyim axı? Hətta adamı tora da salırlar. Ayıq olmaq lazımdır. Ziyandırsa həmin yolum yarısından qayıtmaq lazımdır.

Kəmalə Abdullayeva (T): Bahar xanım düşünürmü ki, zamanında nələrinsə qədrini bilməyib?

B.Lətifqızı: Yaşadığım heç nəyə görə peşman deyiləm. Pis, yaxşı nə yaşayıramsa bu mənim həyatımdı. Bu həyatda mənim öz rolum var və ssenariya baxıb o rolu oynayıram.

Maya Muradzadə (T): Necə düşünür, xalq Bahar xanımı tarixdə necə saxlayacaq?

B.Lətifqızı: “Gecələr Bahar” deyə xatırlanacam.

Gülzar Qəhrəmanova (T): Özünüzü hansı cəhətinizə görə digər sənətçilərdən fərqli hesab edirsiz?

B.Lətifqızı: Səs tembrimlə fərqlənirəm. Səhnəmizdə öz səs tembri ilə fərqlənən sənətçilərimiz çoxdu. O səs ki, üzünü görməsən belə səsini eşidəndə bilirsən oxuyan kimdir. O sənətçilərdənəm ki, gözüyumulu dinləyəndə Bahar Lətifqızı olduğunu bilirlər. Mənim səsim qədimi səsdir. Bunu hər kəs bilir. Allah bu səsi mənə çox görməsin. Bu səsi mənə verdiyi üçün Allahımdan çox razıyam. Bundan sonra qarşıma nə çətinliklər çıxarsa da, heç peşman olmaram ki bu səsin yiyəsi Bahar olub.

Tahirə Qafarlı (F): Yaxşı oxuyur. Necə edir ki, qalmaqallardan uzaq olur?

B.Lətifqızı: Bəlkə də qalmaqal məndən uzaq olur. Ancaq arada gəlir. Bir az ağıllı olmaq lazımdır ki, qalmaqalları yaxın buraxmayasan. Bir dəfə səhvən nə isə olmuşdu. Amma sonradan aydınlaşdı. Bəlkə də mənim xasiyyətimə görədi.

- Dava adamı deyilsiz?

- Davakaram özü də necə (Gülür). Hal əhliyəm, sülhü sevirəm.

- Şou-biznesdəki qalmaqallara sizi cəlb etməyə çalışmayıblar?

- Bu yaxınlarda özüm haqda internetdə çox iyrənc bir söz oxudum. Mən elə sözdən uzaq adamam. Həqiqətən də o iki kəlmənin heç biri mənə aid deyildi. Oxudum peşman oldum. Birinci dəfə idi özüm haqda elə söz oxuyurdum. 2-3 gün sonra yenə açdım baxdım. Gördüm ki, siliblər.

Sevda Camalova (T): Bahar xanımın səhnəyə gələn gündən davam etdiyi yolda əsas məqsədi nə olub?

B.Lətifqızı: Məqsədim Allahın verdiyi səslə musiqimizə xidmət etməkdir. Çox demirəm, biz balaca insanlar mən oxuyanda düşünə bilirlərsə, musiqimlə insanların qəlbində sevgi yarada bilirəmsə nə xoş mənə. İstəyirəm məndən sonra desinlər ki, milli musiqimizi ifa edən bir Bahar Lətifqızı var idi.

- 6 yaşlı Bahar sənəti ilə bağlı nələr xəyal etdiklərindən bu gün nələri əldə edib?

- Heç nə dəyişməyib. Arzularım zaman-zaman reallaşdı.

- Hamısı?

- Hə.

- Bəs reallaşmayanlar?

- Olmayanlar da var. Amma hələ o yaşdayam ki, istədiyim bir çox arzuları yerinə yetirmək üçün çalışacam. Allah ömür versin, canımı sağ eləsin, inşallah hələ görəcəyim çox işlər var.

- Qızınızın gələcəyi ilə bağlı nələr düşünürsüz?

- Arzulayıram ki, bütün övladlar valideynlərinin üzünü ağ edəcək bir şəxs olaraq böyüsünlər. Valideynlər, xüsusən də atalar övladlarına qarşı düşüncəli davransınlar. Bu mənim yanıqlı yerimdi. Bu barədə ətraflı danışmaq istəmirəm. Övladım əsl Azərbaycan qızı, xanımı olsun.

- Birdən səsi olsa və müğənni olmaq istəsə…

- Çətin o bu sənəti seçsin. Evdə müğənniliyi çox pisləmişəm. O mənada yox ki, müğənniləri pisdi. Onun da anası müğənnidi. Sadəcə olaraq çətinlikləri başa salıram. Qızım hərdən mənə deyir ki, ana sən yenə gedirsən? Oxumağa gedirsən? Mənə pul gətirməyə gedirsən? Deyir ki, mənə ev alacaqsan? Qapısı olacaq? Mən də qızıma başa salıram ki, bizim sənət çox çətindi. Tozda, yayın istisində toylarda oxumaq xanım üçün asan deyil. Səhnə gözəllik tələb edir. Dikdaban ayaqqabıda oluruq. Ayaqlarımız ağrısa belə bunu hiss elətdirmirik. Gecə saat 3-4-də evə gəlirik. Bu xanımı başa düşən övlad, ər, qardaş, bacı, ailə lazımdır. Buna görə də o mənada yaxşı deyil. Jurnalistika daha yaxşıdı.

- İlin əvvəlində konsert verdiniz…

- Bu mənim ilk konsertim idi. Prodüserim çox gözəl təşkil elədi. 21 min xərclədim. Ürəyimdən konsert vermək keçdi mən də toylardan qazandığım pulu sərf edib hazırladım. Fikirləşdim ki, mən Azərbaycanımız, musiqimiz üçün nə edirəm? Düzdü el şənliklərində, efirlərdə ifa edirik. Amma tamaşaçı qarşısında hesabat da verilməlidi. Konsertdə mənə sifariş vermirlər, istədiyim qədər də mahnı ifa edirəm. Sevinirəm ki, bu konsert yaxşı keçdi. Allahım mənə güc versin 121 min xərcəyib daha böyük konsert verim. Yenə də başqasının pulu ilə deyil, öz qazancımla.

- Qarşıda nələr gözlənilir?

- Qızımın doğum gününə hazırlaşıram. Onun ad gününə mahnı hədiyyə edəcəm. Mahnının musiqisi Fidan Süleymanovaya, sözləri gənc şair Anar Məmmədova aiddir.

- Doğum günündə şou nümayəndələri olacaq?

- Bəli.

- Deyirlər ki, müğənnilər bir-biri ilə dost ola bilmir…

- Yox mənim sənət adamlarından çox yaxşı dostlarım var. Sənət adamları xoş günlərində bir-birinin yanında olmalıdır. Hərdən hansısa bir musiqiyə qulaq asıram. Və ehtiyacım olur həmin müğənni ilə danışmağa. Çəkinmədən zəng edirəm. Deyirəm ki, elə-belə zəng vurmuşam. Müğənni rəfiqəm var. Ona tez-tez zəng edirdim. Hər dəfə də prodüseri cavab verib məni müğənni ilə danışdırmırdı. Axırda müğənninin özünə dedim ki, sənin musiqinə qulaq asıram və musiqi məni uzaqlara aparır. O an duyğularımı səninlə bölüşmək istəyirəm. İnsanıq da nə olar ki?

- Sizə bu qədər təsir edən mahnılar hansılardı?

- O qədər musiqilər var ki.

- Kimləri dinləyirsiz?

- Bu gün ən son radioda sevə-sevə Ayanla Nadirin duetini dinlədim. Musiqi məni çox uzaqlara apardı. Fərqi yoxdur kim oxuyur. Hərdən mənə deyirlər ki, sən milli musiqi ifaçısısan. Bəs niyə filankəsi dinləyirsən? İnsanın ürəyinin zənginliyi bundan bilinir. O hər bir musiqidə özünü, hər bir musiqinin nəbzini tuta bilirmi? Əgər tuta bilirsə o insanın qəlbi zəngindir. Hərdən insanın xasiyyətini müəyyən etmək üçün onun hansı musiqiləri xoşladığını soruşurlar.

Aygün Asimqızı

Üç nöqtə.-2013.- 26 oktyabr.- S.13.