Qadın qanunun ona verdiyi
imkanlardan tam yararlana bilmir
Gender siyasətinin məqsədi
yalnız statistik göstəriciləri artırmaq
olmamalıdır
Demokratiyanın inkişafının
əsas prinsiplərindən biri gender bərabərliyinin təmin
olunmasıdır. Əhalisinin əksəriyyətini
qadınlar təşkil edən Azərbaycanda da gender mədəniyyəti
prioritet məsələlərdəndir.
Amma cəmiyyətdə mövcud patriarxal sosial
normalar, qadınların kişilərlə bərabər
ölkənin ictimai-siyasi həyatında aktiv iştirak etməsinə
mane olur. Qadınlar bəzən demokratiyanın
inkişafı prosesində öz sosial rollarını,
imkanlarını reallaşdırmaqda çətinlik çəkirlər.
İnkişaf etmiş ölkələrlə Azərbaycanın
müqayisəli təhlili göstərir ki, bizdə
demokratiyanın inkişafına mane olan mühüm amillərdən
biri gender bərabərliyi mədəniyyətinin
aşağı səviyyədə olmasıdır. Bu da öz növbəsində ölkənin dinamik
inkişafını ləngitməklə, hüquqi dövlət
quruculuğu prosesində insan potensialından tam şəkildə
istifadə edilməsinə mane olur. Kişilər
hələ də cəmiyyətdəki dominant
statuslarını qadınlarla bərabər imkanlara əsaslanmaqla
bölüşmək istəmirlər. Əks
cinsin onlarla eyni sosial statusa malik olmaları ilə
barışa bilmirlər. Qadınları
daha çox özlərinə tabe vəziyyətdə
görmək istəyən, ailənin məişət problemlərinin
əksəriyyətini qadınların zərif çiyinlərinə
yükləyən güclü cinsin nümayəndələri
siyasi-ictimai həyatda ona rol vermək istəmir.
Kişilər hələ də
qadınların rəhbərliyi altında işləmək
istəmir
Azərbaycanda qadınlar ölkənin siyasi həyatında
fəal olmasa da, elmin inkişafında müstəsna rol
oynayır.
Dövlət Statistika Komitəsindən
aldığımız məlumata görə, 2012-ci ilin
sonunda ölkə əhalisinin 50,4, məşğul
əhalinin isə 48,5 faizini qadınlar təşkil edib.
Hazırda ümumtəhsil müəssisələrində
müəllimlərin 76, orta ixtisas təhsil müəssisələrində
73, ali məktəblərdə 48 faizi
qadınlardır. Həkimlərin isə 63
faiziini qadınlar təşkil edir. Şagirdlərin 46,
ali məktəb tələbələrinin 47, doktorantların
35,1, elmi işçilərin isə 55,3
faizini qadınlar təşkil edir. Dövlət qulluğunda
çalışanlar arasında qadınların xüsusi
çəkisi 28,3, sahibkarlar arasında isə
16,2 faizdir.
Son bələdiyyə seçkilərində bələdiyyə
üzvü seçilən qadınların sayı əvvəlki
seçkilərə nisbətən 5 dəfə artaraq 4194 nəfərə
çatıb.
Milli Məclisdə 124 millət vəkilindən
19-u qadındır. Ombudsman,
Naxçıvan ombudsmanı, Konstitusiya Məhkəməsinin
sədr müavini, parlamentin vise-spikeri də zərif cinsin
nümayəndəsidir. Amma Azərbaycanda hələ də
nazir qadın yoxdur. Yalnız iki komitəyə -
Tələbə Qəbulu üzrə Dövlət Komitəsinə
və Ailə, Uşaq və Qadın Problemləri üzrə
Dövlət Komitəsinə qadın başçılıq
edir. Prezident Aparatı Humanitar siyasət
şöbəsinin müdiri vəzifəsində də zərif
cinsin nümayəndələri çalışır.
Hazırda respublikada cəmi iki nazirlikdə: iqtisadi
inkişaf, mədəniyyət və turizm nazirliyində
müavin postunu qadınlar tutur. Maraqlıdır
ki, ölkənin güc sturukturlarında qadınlar demək
olar ki, təmsil olunmur. Müdafiə
Nazirliyində 1998-ci ilə qədər nazirlikdə
qadınlar çalışmayıb. Yalnız
2002-ci ildən qadın kadr zabitlər yetişib və
hazırda onlar baş leytenant rütbəsindədir. Daxili
işlər orqanlarında polkovnik rütbəli az sayda qadın olsa da, general
qadınımız yoxdur, şöbə rəisləri isə
çox azdır. Güc sturukturlarında
çalışan kişilər də qadının rəhbərliyi
altında işləmək istəmir.
«Qadın kişidən
ağıllı olsa da, onun önə çıxmasına
imkan vermirlər»
Araşdırmalar göstərir ki, mövcud problem
yalnız bu kimi patriarxal sosial normalar, təhrif olunmuş
köhnə adət-ənənələrin saxlanmasından
asılı deyil. Reallıqda gender mədəniyyətinin əsas
inkişafını əngəlləyən spesifik xüsusiyyətlərdən
biri də qadınların təşəbbüslərinin və
həmrəyliyinin zəif olmasıdır. Qadınlar daha
çox ailədə, evdə olmağa, uşaqların tərbiyəsi ilə
məşğul olmağa üstünlük verir. Digər səbəb isə cəmiyyətin
qadına qısqanc yanaşması ilə bağlıdır.
Həmçinin, qadın iqtisadi cəhətdən
kişidən daha çox asılı olduğu
üçün müstəqil qərar verə bilmir.
Millət
vəkili Jalə Əliyeva da hesab edir ki, qadınların
ictimai-siyasi həyatda və parlamentdə zəif təmsil
olunması milli xüsusiyyətlərlə
bağlıdır: «Cəmiyyətdə qadınların fəallığına
mane olan əsas səbəblərdən biri mental dəyərlərdir.
Həmçinin, qadın mental xüsusiyyətlərlə
bağlı kişidən önə keçmək istəmir.
Həm də baxmaq lazımdır ki, qadın özü bu təmsilçiliyə
hazırdırmı?».
Dilarə
Əliyeva adına Qadın
Hüquqlarının Müdafiəsi Cəmiyyətinin sədri
Novella Cəfəroğlu deyir ki, qərar qəbul edilməsində
qadınların iştirak etməməsi onların
bacarıqsızlığı ilə bağlı deyil: «Azərbaycanda
qadınlar layiq olduqları yeri tuta bilməyiblər. Ölkədə bir nəfər belə qadın
nazir, hətta rektor yoxdur. Qadın kişidən
ağıllı olsa da, onun önə çıxmasına
imkan vermirlər. Məktəblərdə,
xəstəxanalarda qadınlar say baxımından kişiləri
üstələsə də, məktəb direktorları və
baş həkimlərin böyük əksəriyyəti
kişilərdir. Gender bərabərliyi o
vaxt olacaq ki, qadınla kişi qərar qəbulunda bərabər
hüquqlu olacaqlar».
«Təmiz
Dünya» İctimai Birliyinin rəhbəri Mehriban
Zeynalovanın qənaətinə görə, qadınların
idarəetmədə az təmsil olunması müxtəlif səbəblərlə
bağlıdır: «Bu sırada kişi dominantlığı,
kişi həmrəyliyi ilə yanaşı, kişilərin
boş vaxtlarının daha çox olması və danışıqlar
aparmaq üçün geniş imkanlara malik olması da əsas
rol oynayır. Eyni zamanda adət-ənənələr,
ailə münasibətləri də təsirsiz qalmır.
Güclü lider qadınlar isə fərdi fəaliyyət
göstərir».
İşlək mexanizm
olmadığı üçün qanun qadına ümumi
sözlərdən başqa heç nə vermir
Problemdən çıxış yolu kimi dünyanın
bir çox ölkələrinin təcrübəsindən
yararlanmaq mümkündür. Bir çox inkişaf
etmiş ölkələrdə seçkili, seçkisiz
orqanlarda qadınların və kişilərin iştirak faizi
qanunla tənzimlənir. Qadınlara
kişilərlə bərabər hüquqlar verən ölkələr
qadınların ictimai-siyasi həyatda aktiv
iştirakçılığını təmin etmək
üçün hədlər müəyyən edir, güzəşt,
imtiyazlar verir. Finlandiyada inzibati və qərarqəbuledici
orqanlarda təmsilçilikdə cinslərarası bərabərliyi
qoruyan qanuna görə, heç bir cinsin nümayəndələri
seçkili və təyinatlı inzibati strukturlarda 40 faizdən
aşağı, 60 faizdən yuxarı təmsil oluna bilməz.
Bolqarıstanda isə gender məsələlərini tənzimləmək
üçün "Diskriminasiya əleyhinə" qanun,
"Qadın və kişilər üçün bərabər
imkanlar haqqında" qanun qəbul edilib. Ən
əsası isə bu ölkədə "Gender bərabərliyinin
təbliği və təmin edilməsi üçün Milli
Fəaliyyət Planı" qəbul edilərək icra olunub.
Böyük Britaniyada isə 1975-ci ildə
"Cinsi dikrimanasiya haqqında" qanun qəbul edilib ki, bu
qanun qanunverici səviyyədə ayrı-seçkiliyin aradan
qaldırılmasını nəzərdə tutur.
Azərbaycan
qanunvericiliyi də kişi və
qadınlara bərabər hüquqlar verir. Cinslər
arasında hüquq bərabərliyinin təmin olunması məqsədi
ilə ölkəmiz bir sıra beynəlxalq konvensiyalara
qoşulub. Respublikamız BMT-nin «Qadınlara qarşı
ayrı-seçkiliyin bütün formalarının ləğv
edilməsi» və
«Qadınların siyasi hüquqları» üzrə
konvensiyasını ratifikasiya edib. Avropa Şurasının
tövsiyələrində də qadın və kişilərin
siyasi sahədə, dövlət əhəmiyyətli qərar
qəbul edilməsində balanslaşdırılmış
iştiraka nəzarət etməklə, yanaşı kvota prinsipinə
(40 faizlik) əməl olunmasının vacibliyi də
vurğulanıb. Respublikamızda 1998-ci ildə Dövlət
Qadın Problemləri üzrə Komitə yaradılıb ki,
2006-cı ildə onun bazasında Ailə, Qadın və
Uşaq Problemləri üzrə Dövlət Komitəsi təsis
edilib. Amma gender bərabərliyinin təmin olunması
praktikada reallaşmayıb.
Ailə, Qadın və Uşaq
problemləri üzrə Dövlət Komitəsinin sədr
müavini Sədaqət Qəhrəmanova isə deyir ki, Azərbaycanda
gender bərabərliyinə nail olmaq üçün çox
böyük işlər görülüb. Onun
sözlərinə görə, bu gün başqa dövlətlərdən
fərqli olaraq yetərincə hüquqi baza
formalaşdırılıb. Araşdırmalar
isə göstərir ki, respublikamızda qanunun işlək
mexanizmi olmadığı üçün qadına ümumi
sözlərdən başqa heç nə vermir.
Qadınların qərar qəbul etmədə
rolunu gücləndirmək üçün kvota sisteminin tətbiqi
irəli sürülür
Bəs
görəsən, Azərbaycanda gender bərabərliyinə
nail olmaq üçün daha hansı işlər
görülməlidir? Millət vəkili Qənirə
Paşayevanın qənaətinə görə,
qadınlarımızın hər biri ictimai mühitdə
aktiv olmalıdır: «Ölkəmizi nə müsəlman
ölkələri, nə də Cənubi Qafqazla müqayisə
etmək istəməzdim. Özümüzü
həmişə güclülərlə müqayisə edək.
Şimali Avropa isə buna misaldır. Şimali Avropada olan “kvota” sistemi onları uğura
aparan yol oldu. Bu gün onlarda artıq bu
sistem yoxdu, çünki artıq onlar cəmiyyəti bu sistemə
öyrəşdirdilər. Biz də bundan
nümunə götürərək bəhrələnməliyik.
Bu həm də cəmiyyətə bir ismarış ola bilər».
Sabiq millət vəkili Gültəkin Hacıbəylinin
sözlərinə görə, bütün sahələrdə
qadının rolu gücləndirilməlidir. «Qadınları
müdafiə etməyin ən yaxşı yolu onları
gücləndirmək, səlahiyyətləndirməkdir.
Amma azadlıq və hüquq istəyən kimi
kişilərin bunu verəcəklərini düşünmək
sadəlöhvlük olardı. Buna öz iradənlə
nail olmaq lazımdır».
N.Cəfəroğlu hesab edir ki, problemin həlli üçün qadınların idarəetmədə iştirakı ilə bağlı təxminən 10 illik kvota tətbiq edilməlidir: «İlkin olaraq təxminən 25-30 faizlik kvaota olmalıdır. Bundan sonra vəziyyət nisbətən düzələ bilər».
Ekspert Mehriban Vəzirin qənaətinə görə, bir vəzifəyə keçmək üçün qadının özünün gücü, biliyi və təhsili olmalıdır: «Ölkədə gender bərabərliyinin təminatı üçün ilk növbədə qadın proqramları işləməli, qadına dəstək olmalı və qadının sosial yükü dövlət tərəfindən ələ alınmalıdır. Bunun üçün əvvəlcə təhsil güclü olmalı, sonra şərait yaradılmalıdır ki, qadınlar da artıq kişilərlə yarışa bilsin. Onun getdiyi vəzifəyə namizəd olsun və o yer uğrunda mübarizə apara bilsin. Bu şəraiti isə dövlət yaratmalıdır».
Gender Bərabərliyi və Qadın Təşəbbüsləri İctimai Birliyinin icraçı direktoru Ülviyyə Məmmədova isə hesab edir ki, gender siyasətinin məqsədi yalnız statistik göstəriciləri artırmaq olmamalıdır: «Eyni zamanda ictimai şüuru dəyişmək lazımdır. Hazırda bu sahədə ən ciddi problem mövcud qanunvericilik bazasının işlək olmamasıdır. Əgər bu baza işlək olarsa, o zaman bizdə gender məsələsi ilə bağlı durum ən inkişaf etmiş ölkələrlə müqayisə oluna bilər».
Beynəlxalq təcrübə göstərir ki, qərar qəbul etmədə qadınların iştirakını artırmaq üçün ilk növbədə hökumətlər əmək bazarında bərabərliyə əməl olunmasını təmin etməlidir. Amma gender stereotipləri qaldıqca ayrı-seçkilik davam edəcək. Sirr deyil ki, bu gün respublikamızda qadınların inkişafında əsas maneə həm də stereotiplərdir. Ölkə mediası da bilərəkdən və ya bilməyərəkdən daima gender stereotiplərini qabardır, qadınları kişilərlə müqayisədə daha əlverişsiz şəkildə işıqlandırır. Daha çox cəmiyyətdə qadınlarla kişilərin mövcud yeri haqda hökmran olan stereotipləri qüvvətləndirir. Amma bir şeyi unutmamalıyıq ki, nə qədər ölkəmizdə qadının hüququ tam təmin olunmayıb, itirən cəmiyyətimiz olacaq.
Xalid
VAHİDOĞLU
Üç nöqtə.-2013.-22
yanvar.-S.-14.