“Əsli və Kərəm” 25 illik fasilədən sonra tamaşaya qoyuldu

Operada fədakar məhəbbətin gücü, insanın mənəvi gözəlliyi tərənnüm olunur

Azərbaycan Dövlət Akademik Opera və Balet Teatrında yeni ilin ilk premyera tamaşası – dahi Azərbaycan bəstəkarı Üzeyir Hacıbəylinin “Əsli və Kərəm” operasının premyerası keçirilib. Teatrın mətbuat xidmətindən verilən məlumata görə, 25 illik fasilədən sonra yeni quruluşda hazırlanan “Əsli və Kərəm”in rejissoru əməkdar incəsənət xadimi Hafiz Quliyev, musiqi rəhbəri və dirijoru əməkdar incəsənət xadimi Sevil Hacıyeva, quruluşçu rəssamı isə əməkdar mədəniyyət işçisi Yusif Babayevdir.

Premyera tamaşasında əsas partiyaları Opera və Balet Teatrının gənc solistləri, respublika muğam müsabiqəsinin laureatları Vüsalə Musayeva (Əsli) və İlkin Əhmədov (Kərəm) ifa edib. Gənclərlə yanaşı, tamaşada həmçinin teatrın təcrübəli solistləri – xalq artisti Şahlar Quliyev (Keşiş), əməkdar artistlər Sabir Əliyev (Şah), Nizami Bağırov (Paşa), solistlərdən Nəzər Bəylərov (Sofi), Mütəllim Dəmirov (Şeyx) və b. çıxış ediblər. Ü.Hacıbəylinin yaradıcılığına xüsusi yeri olan bu operanın ilk tamaşası 1912-ci il mayın 18-də Opera və Balet teatrının binasında keçirilib. Operada fədakar məhəbbətin gücü, insanın mənəvi gözəlliyi tərənnüm olunur.

Aygün

Üç nöqtə.-2013.-25 yanvar.-S.-13.