“Rollarımın hamısı mənə stimul verib”

Rasim Balayev: “Hazırda yeni bir rol oynamaq istəyirəm”

Nuriyyə Əhmədova : “O Azərbaycan kinosunun ulduzudur”

Bu yaxınlarda xalq artisti Rasim Əhməd oğlu Balayev 66 yaşını qeyd etdi. Rasim Balayev avqustun 8-də 1948-ci ildə Ağsuda anadan olub. 1969-cu ildə Azərbaycan Dövlət İncəsənət İnstitutunu bitirib. Rasim Balayev ilk dəfə Bakı kinostudiyasında “Ulduzlar sönmür” əsərində kiçik bir rolda çəkilib. Oynadığı “Nəsimi”, “Babək” və “Sönmüş ocaqların işıqları” filmlərindəki rollarla tamaşaçıların sevgisini qazanıb. Xalq artistinin “Üç nöqtə”yə açıqlamasına görə, doğum günündə Allahdan yalnız can sağlığı arzu edib: “Sağlamlığımda bir az problemlər var. Ona görə də, sağlamlıq arzu edirəm. Həyatda bundan böyük xöşbəxtlik ola bilməz. Başqa heç nə istəmirəm”.

Zəngin yaradıcılıq yolunu keçən xalq artisti hansı rol daha çox yaddaşınızda qalıb və onu düşündükdə sizə yaradıcılıq stimulu verir sualına cavab verir ki, böyüklüyündən və kiçikliyindən asılı olmayaraq bütün rollarım yaddaşımda, xatirələrimdə məhəbbətlə qalıb: “Rollarımın hamısı mənə stimul verib. Hazırda yeni bir rol oynamaq istəyirəm. Düşünürəm ki, yaradıcılığımda yeni rol stimul verər. Konkret necə bir rol canlandırmaq istədiyimi deyə bilmərəm. Amma dərin psixoloji bir rol canlandırmaq istərdim. Yaxşı və yadda qalan bir rol olmalıdır. Yenə də məşqlərim olur. Bu sənətdə təcrübəm var. Hər tərəfli bir obraz oynamaq istəyirəm”.

Xalq artisti dedi ki, seriallardan təkliflər alıram: “Amma razı olmuram. Görürəm ki, mən orada oynamasam daha yaxşı olar”.

Xalq artisti Nuriyyə Əhmədova

Rasim Balayevlə tələbəlik illərindən həmkar olduğunu dilə gətirdi: “O “Nəsimi” filminə çəkilirdi . Mən də orada çəkilirdim. Amma mən filmdə görünmürəm. Rasim Balayevin zəhmətkeş, ailəsini sevmən, vəfalı dost olmaqla yanaşı və yaxşı yol yoldaşıdır. Çox gözəl insandı. Onunla tərəf müqabili olmuşuq. Rasimin həyat yoldaşı Sevil xanımı, uşaqlarını da tanıyıram. O çox böyük sənətkardır. Mən Moskvada festivalda olanda Həsən Məmmədov və Rasim Balayev haqqında gözəl sözlər eşitdim. O Azərbaycan kinosunun ulduzudur. Biz onunla fəxr etməliyik”.

Xalq artisti bildirdi ki, “Həm ticarət, həm ziyarət” filmində Rasim həqiqi sənətkar olduğunu bir daha göstərdi: “Ona ampula lazım deyil. Onda yumor da, satira da var. O filmdə mənfi rolu çox gözəl oynadı. O, bütün həyatını ailəsinə, övladlarna həsr edib. Həyat yoldaşı onun öz qohumudur. Çox gözəl ailələri var. Rasim həm də çox vəfalı insandır. Bu sözləri hər adam üçün demək olmaz”.

Nuriyyə Əhmədova qeyd etdi ki, sənətkara arzularının həyata keçməsini diləyir. “ Nəvələrinin toyunu görsün. Özündən muğayat olsun. Eyni zamanda gözəl rollarda oynasın. O, Azərbaycan kinosuna mükəmməl rolları ilə möhür vurub”.

Rəqsanə.

Üç nöqtə.-2014.- 12 avqust.- S. 13.