“Kino sahəsində texniki mütəxəssislər azdır”

Müşfiq Hətəmov: “Səs rejissoru, rəssam və bəzi sahələrdə problemlər var”

Azərbaycan filmləri festivallarda təmsil olunduqdan sonra dünya kinematorafiyaçılarının diqqətini çəkdi. Bu barədə “Üç nöqtə”yə danışan C.Cabbarlı adına “Azərbaycanfilm” kinostudiyasının direktoru Müşfiq Hətəmov dedi ki, dünyada “Azərbaycanfilm” studiyası tanındı və rəqabət aparmaq gücündə olduğunu təsdiq etdi: “Xarici ölkələrdən bizə çoxlu təbriklər gəldi və layihələr təklif olundu. Kino bazarına girmək üçün festivallar bizə şərait yaratdı. “Mahmud və Məryəm” və “Sonuncu” filmi sübut etdi ki, müştərək filimlərin çəkilməsində iştirak edə bilərik. Bu il Kann, Karlo Vari və Venesiya festivallarında iştirak etdik. Ən böyük uğurlarmızdan biri də son 20 ildə ilk dəfə olaraq Qarabağ mövzusunda çəkdiyimiz filmin beynəlxalq festivala çıxarılmasıdır. Əvvəllər kino festivapllarında bu cür mövzuları qəbul etmirdilər. Dünyanın bir çox aparıcı kino mütəxissləri həmin festivalda iştirak edəcəklər və ən nüfuzlu kataloqlarda film haqqında məlumatlar yerləşdiriləcəkdir. Bu, Qarabağ münaqişəsi ilə bağlı dərdimizin dünyaya çatdırılmasında mühüm rol oynayacaq”.

Müşfiq Hətəmov müştərək filmlərin çəkilməsi üçün Kann festivalından sonra İspaniyadan, Fransadan, Türkiyədən və Almaniyadan təklif aldıqlarını qeyd etdi: “Artıq o layihələri müzakirə edərək görəcəyimiz işləri planlaşdırırıq. Filmlərimizin Kann festivalına düşməsi kino sahəsində böyük inkişafa səbəb oldu. Gürcü dostlarımız dedilər ki, sizin inkişafınız sübut edir ki, artıq Azərbaycan filmi daha öndə gedir. Bu bizi sevindirir”.

Kinostudiyanın direktoru vurğuladı ki, Azərbaycanda prodüser məktəbi yeni-yeni formalaşır: “İki il əvvəl aparıcı kino şirkətlərini “Azərbaycanfilm” ətrafında birləşdirdik və layihələr işləməyə başladıq. Bu gün kino sahəsində texniki mütəxəssislər azdır. Barmaqla sayılası prodüserlərimiz var. Yaradıcı qrupumuz zəifdir. Səs rejissoru, rəssam və bəzi sahələrdə problemlər var. Yaşlı nəslin nümayəndələri var, amma gənc kadrlar yoxdur.

Buna görə də xarici ölkələrdə “master klaslar” açılır. Xaricdə yaşayan gənc rejissorları Azərbaycana dəvət edirik. 2013-cü ildə əsas məqsədimiz yaradıcı heyəti gücləndirmək, 2014-cü ildə isə kadr problemlərini həll etmək və festivallarda çıxış etmək olub. Bir müddət əvvəl Karlo Vari festivalının prezidenti, direktoru və bir sıra nümayəndələri rejissorlarımıza “master klaslar” keçdilər. Eyni zamanda müəllif filmlərinin müsabiqəsini təşkil etdik. Kino sahəsində problemlərimizin düzəlməsi üçün ciddi işlər aparırıq”.

M. Hətəmov bildirdi ki, aktyor sənəti məktəbi çox güclüdür: “Mahmud və Məryəm” filmini çəkən türk yaradıcı heyəti aktyorlarımızın oyununu görəndə heyran qaldılar. Orada Fəxrəddin Manafov iştirak edirdi. Bizim güclü məktəbimiz var. Artıq 3 filmimiz festivalda iştirak etdi. Bu sahədə düzgün rəqabəti formalaşdırmalıyıq. Bu zaman istedadlılar üzə çıxacaq, zəiflər isə rəqabətə dözə bilməyərək sıradan çıxacaqlar. Dövlət tərəfindən dəstək var. Cənab prezidentimiz kinonun inkişafı ilə bağlı proqram imzalayıb. Bu, Azərbaycan kinosunun inkişaf etdirilməsinə və bir çox layihələri həyata keçirilməsinə imkan verir”.

Direktor dedi ki, “İçəri şəhər” adlı film istehsala buraxılıb: “Filmin rejissoru İlqar Safatdır. Ekran əsərində müasir gənclərin həyatından bəhs olunur. Gənclər müasir dövrün psixoloji vəziyyətini düzgün dəyərləndirə bilmədikdə informasiyalar fəsadlar verə bilər. Film tərbiyəvi və müasirlik mövzusundadır. Qarşımza uşaq mövzusunda və müxtəlif janrlarda bir çox filmlər çəkməyi qoymuşuq. 2015-ci ildə əsas məqsədimiz Azərbaycan tamaşaçısını Azərbaycan kinosuna baxmağa dəvət etmək və yaradıcı qrupların səviyyəsini qaldırmaqdır”.

Rəqsanə.

Üç nöqtə.-2014.- 22 avqust.- S. 13.