Parisdə Azərbaycan musiqiçilərinin iştirakı ilə konsert keçirilib

Fransanın paytaxtı Paris şəhərində Heydər Əliyev Fondunun təşkilatı dəstəyilə Avropanın ən məşhur konsert salonlarından biri olan “Elisey Teatrında” (Theatre des Champs Elysees) Azərbaycan və Fransa musiqiçilərinin iştirakı ilə təntənəli konsert keçirilmişdir. Konsert eyni zamanda “İpək və Alov” Musiqi Festivalının açılışına həsr olunmuşdur. Gecənin açılışında Azərbaycanın Fransadakı Fövqəladə və Səlahiyyətli Səfiri cənab Elçin Əmirbəyov və Musiqi Festivalının bədii rəhbəri tanınmış bəstəkar Pyer Tilua çıxış etmişlər. Rəsmi hissədən sonda Fransanın ən qədim musiqi kollektivi olan – “Lamürö” (Lamoureux) simfonik orkestri beynəlxalq müsabiqələr laureatı, Azərbaycan Dövlət Akademik Opera və Balet Teatrınını dirijoru, Prezident mükafatçısı Əyyub Quliyevin rəhbərliyi altında rəngarəng proqramla çıxış etmişdir. Konsertdə Azərbaycanın tanınmış musiqiçiləri Xalq artisti Murad Hüseynov (fortepiano), beynəlxalq müsabiqələr laureatları Səbinə Rakçeyeva (skripka), Nəzrin Rəşidova (skripka), Emil Əfrasiyab (fortepiano), Əməkdar artistlər Elşən Mənsurov (kamança) və Malik Mənsurov (tar) iştirak etmişlər. “Lamürö” simfonik orkestri və dirijor Əyyub Quliyevin ifasında Üzeyir Hacıbəylinin “Koroğlu” operasından Üvertura, Qara Qarayevin “Yeddi gözəl” baletindən Süita, Paul Dyükanın “Sorcerer’s Apprentice” fantastik skertso səslənmişdir. İnstrumental əsərlər sırasında

Fikrət Əmirov və Elmira Nəzirovanın fortepiano və orkestr üçün “Ərəb mövzularında konserti” (solist Murad Hüseynov), Vaqif Mustafazadənin Fortepiano və orkestr üçün konserti (solist Emil Əfrasiyab), Hacı Xanməmmədovun Kamança və orkestr üçün konserti (solistlər Elşən və Malik Mənsurovlar) dinləyicilər tərəfindən böyük maraqla qarşılanmışdır. Hər bir əsərdən sonra dinləyicilərin alqışları altında ifaçılar əlavə olaraq yeni əsərlər ifa etmişlər. Proqramın sonunda isə tanınmış fransız bəstəkarı Pyer Tiluanın 10-cü Simfoniyası “Exil” dünya premyerası keçirilmışdir. Əsərin ifasında 100-dən artıq musiqiçi – 4 solist (tar, kamança və 2 skripka), böyük simfonik orkestr və Elektronik qrup “Chords” iştirak etmişlər. Əsərin ifasında sonra tamaşaçılar musiqiçiləri və bəstəkar P.Tiluanı dəfələrlə səhnəyə dəvət etmişlər. Qeyd etmək lazımdır ki, “İpək və Alov” beynəlxalq musiqi festivalı Heydər Əliyev Fondunun dəstəyilə sentyabrın 19-dək Fransanın Paris və Mülyuz şəhərlərində davam edəcəkdir.

Üç nöqtə.- 2015.- 17 sentyabr.- S.- 13