“Epizodik rol baş roldan çətindir”

Elşən Hacıbabayev: “Əsas baş rola qaçmaq deyil, rolu düzgün oynadıqda epizodik rol da gözəldir”

20 ildən çoxdur teatr sahəsində çalışır. Bununla yanaşı film və seriallara da çəkilir. Onu daha çox “Oğlan evi” filmindəki məşhur oğru və eyni zamanda yardımsevər obraz olan “İsi” obrazı ilə tanıyırıq. Deyir ki, bu filmdən sonra həyatda da artıq bir çox insanlar onu oğru kimi tanıyır və “İsi” deyərək çağırırlar:

“Bilirsiniz, əgər məni “İsi” obrazı ilə çağırırlarsa, məni oğru hesab edirlərsə, deməli obrazım yaxşı alınıb. Bunu müsbət hal kimi qiymətləndirirəm. Ümumiyyətlə, o film Azərbaycandakı ən uğurlu filmlərdən biri idi. O filmin rejissor və ssenaristlərinə inanırdım, güvənirdim. Filmin uğuruna da inanırdım. Amma obrazımın bu qədər seviləcəyini düşünmürdüm. Nəticənin belə olması məni çox sevindirdi”.

“Üç nöqtə” qəzetinin qonağı Gənc Tamaşaçılar Teatrının aktyoru Elşən Hacıbabayevdir.

- Hazırda “Qız qaçırtma - 3” filminin çəkilişlərindəsiniz. Necə gedir proseslər?

- Proseslər çox gözəl gedir. Hətta mən deyərdim ki, “Qızqaçırtma 3” daha məsuliyyətli bir film olacaq. Düzdür, əvvəlkilər də yaxşı idi. Çox adam elə bilirdi ki, 3-cü hissə alınmayacaq. Amma mənə elə gəlir ki, çox gözəl alınacaq. Rejissorumuz Rüfət Şahbazov sağ olsun, bu işin üzərində layiqincə çalışır.

- 20 ildən çoxdur Gənc Tamaşaçılar Teatrındasınız. Bu illər ərzində istədiyiniz rolları oynaya bildinmi?

- Bu 20 ilin 10 ilini Gənclər Teatrında, geridə qalan 10 ilini isə Gənc Tamaşaçılar Teatrında işləmişəm. 20 ildən artıqdır ki, artıq teatr sahəsində çalışıram. İnanırsınız, bu dünyada heç kəs tam olaraq istədiyinə nail ola bilməyib. Amma bəlkə də kimlərsə nail olub, deyə bilmərəm. İstədiyim, ürəyimə yatan rolların bir neçəsini oynamışam.

Yenə də istəyərdim ki, yaxşı rollar oynayım. Sadəcə teatrda belə bir tendensiya var ki, rollar düzgün seçilmir, bir az məcburiyyət var. Belə ki, əgər bir rol sənə verilibsə, məcbur da olsa onu oynamalısan. Aktyor bu rolu oynayaraq öhdəsindən gəlməlidir. Kinoda istəmədiyin bir roldan imtina edə bilirsən, amma teatrda belə bir şey yoxdur. Oynamaq istədiyim bir-iki rol var.

- Uşaqlar üçün tamaşalar göstərmək çətin deyil?

- İyirmi birinci əsrdə bu qədər inkişafın olduğu dövrdə uşaqlar üçün nəsə göstərmək çətin məsələdir. Əvvəllər fikirləşməzdik ki, telefonu əlimizdə tutaraq bu qədər informasiyanı əldə edə bilərik. Biz bunu müəyyən yaşdan sonra görmüşük. Amma indiki uşaqlar anadan olan kimi bunun içində böyüyürlər. Təsəvvür edin ki, onlar bizdən nə qədər irəlidədirlər. İndiki uşaqlar üçün tamaşa göstərmək ən çətin məsələlərdən biridir. Onları aldatmaq mümkün deyil.

- Müsahibələrinizdə zərgər olmaq istədiyinizi bildiribsən. Adından da göründüyü kimi zərgərlik pullu sənətdir, aktyorluq isə o qədər də yox. Zərgərliyi deyil, aktyorluğu seçməyinizə səbəb nə oldu?

- Zərgərlik adı ilə Mədəni Maarif Texnikumuna (indiki Bakı Humanitar Kolleci) gedib aktyorluq fakültəsinə qəbul olmuşam. Bura qəbul olanda 14 yaşım var idi. Sadəcə olaraq zərgərlik incəsənət olduğuna görə onu çox sevirdim. Ümumiyyətlə belə xırda işlərdən xoşum gəlir.

Zərgər sənəti vaxtilə pullu olub, amma indi o qədər də deyil. Zərgər olmaq istəmişəm, amma yəqin ki tam istəmişəm. Çünki tam zərgər olmaq istəsəm olardım (gülür). İnşallah bizim aktyorluq sənətimiz elə bir zamana gəlib çatacaq ki, zərgərlərin özü də aktyor olmaq istəyəcək. Ona görə də düşünürəm ki, insan öz sənətini düzgün seçəndə onun qazancını əldə edə biləcək. Ümumiyyətlə, peşəsindən asılı olmayaraq bir işi ürəkdən, istəyərəkdən edirsənsə onu lazımınca qiymətləndirəcəklər. Düşünürəm ki, mən öz sənətimi seçmişəm, bura mənə rahatdır. Burda mənə xoşdur. Öz işimi çox sevirəm. Hər şeyin yaxşı olacağına inanıram.

- “Oğlan evi” filmində “İsi” obrazı ilə çox məşhurlaşdınız. İnsanlar sizi sanki oğru hesab edirdi. Bunu mənfi, yoxsa müsbət hal kimi qiymətləndirirsiniz?

- O filmin üzərindən müəyyən müddət keçsə də çoxu mənə “İsi” deyərək müraciət edir. Bu filmdəki obrazıma görə, İlham Qasımova öz təşəkkürümü bildirirəm. Kastinqlərdən sonra düzgün obrazları seçdi. Ümumiyyətlə, o film Azərbaycandakı ən uğurlu filmlərdən biri idi. Bilirsiniz, əgər məni “İsi” obrazı ilə çağırırlarsa, məni oğru hesab edirlərsə, deməli obrazım yaxşı alınıb. Bunu müsbət hal kimi qiymətləndirirəm. Məlik Dadaşov ilk dəfə “Haray” filmində erməni obrazını oynayanda hamı ona pis baxırdı. Çünki rolunu çox gözəl oynamışdı, əsl ermənini canlandırmışdı. Mən də onun rolunu çox bəyənirdim.

- “İsi” ilə Elşən arasında oxşar cəhətlər varmı? Heç oğurluq etmisinizmi həyatda?

- İsi ilə Elşən arasında yerlə göy qədər fərq var. “İsi” tamam başqadır, oğrudur, həm də eyni zamanda yardımsevərdir. Bəlkə də həyatda oğruluq etmişəm xəbərim olmayıb. Qonşunun bostanından, bağındakı alma ağacından oğurlamışam. Əslində mən həyatda çox oğurluq edirəm. Küçədə, bayırda insanlara baxıb onların obrazlarını, xarakterlərini oğurlayıram və sonra istifadə edirəm.

- Bu obrazı üzərinizə götürəndə bu qədər seviləcəyinizi düşünürdünüzmü?

- Xeyr, həqiqətən düşünmürdüm. Amma o filmin rejissor və ssenaristlərinə inanırdım, güvənirdim. Filmin uğuruna da inanırdım. Amma obrazımın bu qədər seviləcəyini düşünmürdüm. Nəticənin belə olması məni çox sevindirdi.

- Teatrda çalışasınız da, serial və filmlərə də çəkilirsiniz. Bütün bunları çatdıra bilirsinizmi, çətin olmur sizə?

- Dünyada asan iş yoxdur, hamının işi çətindir. Müəllimin də, həkimin də, dərzinin də və s. peşəsindən asılı olmayaraq insanların işi çətinliklə başa gəlir. Mən deyərdim ki, bizimki daha çətindir. Çünki elə peşə var ki, orda fiziki cəhətdən, elə peşə də var ki, zehni cəhətdən əziyyət çəkirlər.

Biz amma həm fiziki, həm də zehni cəhətdən əziyyət çəkirik. Müəyyən işlər var ki, orda biri digərini növbə ilə əvəz edir. Amma bizim işimizdə elə bir şey yoxdur. Amma gərək özümüz axıracan edək, bizim ifa etdiyimiz obrazı kimsə əvəz edə bilmir. Evə gecə saatlarında gəlirik, səhər gedirik. Çünki işi bitirib setdən elə çıxmalıyıq. Çünki günün işini çatdırmaq lazımdır. Aktyora film də, serial da, teatr da mütləq şəkildə lazımdır. Əgər işini düzgün görmək istəyirsənsə, düzgün şəkildə bölgü etməlisən. Çətin olsa da bunu bacarmalıyıq. Teatr ən vacib yerdir. Teatrda çıxış etdiyimiz tamaşalarla yanaşı film və seriallarda da çəkilmək bizim peşə borcumuzdur.

- Bəzi aktyorlar baş rola çəkildikdən sonra epizodik rollara çəkilməkdən qaçırlar. Necə düşünürsünüz, bu nə dərəcədə düzgündür? Ümumiyyətlə, aktyor üçün baş, yaxud epizodik rol anlayışı olmalıdırmı?

- Bilirsiniz, baş rolu yaxşı ifa etsən alınacaq, yaxşı ifa etməsən alınmayacaq. Əsas baş rola qaçmaq deyil. Rolu düzgün oynayandan sonra epizod da gözəldir. Bizim o qədər gözəl aktyorlarımız var ki, hamısı epizodik rollarla böyüyüb, tanınıb. Epizodik rolu oynamaq özü çətin məsələdir. Epizodik rol baş roldan çətindir. Dünya aktyorlarının 95 faizi epizodik rollarla üzə çıxıblar. İstər epizodik, istərsə də baş rol mənim ürəyimə yatırsa, özümü o rolda görürəmsə oynamağa dəyər.

- Yeni film, yaxud serial təklifləri varmı?

- Bəli, hər ikisi var. Sadəcə olaraq indi adlarını açıqlaya bilmərəm. Çünki əvvəlcə efirə getməlidir, ondan sonra onun haqqında məlumat verə bilərəm. Avqust ayında da yeni bir film olacaq. Hal-hazırda teatrımız məzuniyyətdədir. İctimai televiziyada “Bizim restoran” serialına çəkilirəm. Başqa təkliflər də var, onların təsdiqini gözləyirəm. Bu çəkiliş bitəndən sonra ora gedəcəm.

- “Oskar” mükafatı almaq istədiyinizi deyibsiniz. Bu, elə də asan iş deyil. Bəs bunun üçün nələr edirsiniz?

- Bəli, demişəm. Hazırda bunun üçün heç nə etmirəm (gülür). Əvvəllər dünya kastinqlərinə videolarımı, şəkillərimi göndərirdim. Amma gördüm ki, heç birindən səs-soraq gəlmədi. Azərbaycanda serial və filmlərə çəkilərək fəaliyyətimi davam etdirirəm. Bəlkə nə vaxtsa filmlər üçün ölkəmizdə mükafatlandırma olacaq, mənə də mükafat verəcəklər, bilmirəm. Oskar almaq üçün nə etmək lazım olduğunu bilmirəm. Bəlkə də Amerikaya getmək lazımdır.

- Qarşıda hansı işləriniz var?

- Gələcəkdə işlər çoxdur. Bizim işimiz üzdədir, hansı aktyorun necə çalışdığını, hansı işlər gördüyünü bilirsiniz. İnşallah eyni işlərimiz işıq üzü gördükcə siz də şahidi olacaqsınız. Sonda sizə, qəzetinizə və bizi izləyən oxucularınıza da təşəkkürümü bildirirəm.

Könül Oruc

Üç nöqtə.-2019.- 25 iyul.- S.7.