"Dağlıq Qarabağ münaqişəsinin həlli prioritet məsələdir"

PİTER SEMNEBİ: "İŞĞAL OLUNMUŞ TORPAQLARIN AZƏRBAYCAN ƏRAZİSİ OLDUĞUNA ŞÜBHƏ ETMİRİK"

BAKIYA səfərinin yekunlarına dair keçirdiyi mətbuat konfransında Avropa İttifaqının Cənubi Qafqaz üzrə xüsusi nümayəndəsi Piter Semnebi deyib ki, Azərbaycanda keçirilən referendumla bağlı Venesiya Komissiyasının verdiyi rəylə razılaşıblar. Diplomat səfərinin "Şərq Tərəfdaşlığı" proqramının qəbul olunması ərəfəsində reallaşdığını vurğulayıb. O bildirib ki, Azərbaycanda keçirdiyi görüşlərdə regional məsələlər, Rusiya ilə münasibətlər, Dağlıq Qarabağ münaqişəsinin nizamlanması, hüququn aliliyi, demokratiyanın inkişafı, media azadlığı məsələləri müzakirə olunub. Semnebi Prezident İlham Əliyevi "Şərq Tərəfdaşlığı" proqramı ilə bağlı müzakirələr aparmaq üçün aprelin axırlarında Brüsselə dəvət etdiyini deyib. Diplomat onu da əlavə edib ki, ölkə rəsmiləri ilə görüşlərində diqqət mərkəzində saxlanılan məsələlərdən biri də media və demokratiya məsələsi olub.

Semnebi bir daha xatırladıb ki, NABUCCO layihəsi Avropa İttifaqının prioritetidir. O, Cənubi Qafqazda açıq münaqişələrin Avropa İttifaqı üçün narahatlıq doğurduğunu deyib: "Açıq münaqişələr həm region, həm də Avropa üçün təhlükədir. Biz münaqişələrin həllinin tərəfdarıyıq. Hadisələrdən sonra Gürcüstanda sabitliyin yaranmasında Azərbaycanın rolu böyükdür".

O həmçinin ölkə rəsmiləri ilə Dağlıq Qarabağ münaqişəsinin, Azərbaycan-Rusiya münasibətlərinin müzakirə edildiyini deyib. Görüşlərdə Avropa İttifaqı ilə Azərbaycan arasında münasibətlərin bütün aspektlərinin müzakirə olunduğunu deyən P.Semnebi Azərbaycanda bir neçə jurnalistin həbsdə olmasından narahatlığını da ifadə edib. Xarici radioların ölkə ərazisində yayımı məsələsinin görüşlərdə müzakirə olunub-olunmadığı ilə bağlı sualı diplomat belə cavablandırıb: "Plüralizm bir dəyərdir, ona məhdudiyyətin qoyulması plüralizmi azaldır". Türkiyə-Ermənistan sərhədinin açılmasına münasibət bildirən xüsusi nümayəndə deyib ki, bunun Dağlıq Qarabağ münaqişəsinin həllinə necə təsir edəcəyinə cavab verməkdə çətinlik çəkir. Amma Avropa İttifaqı Cənubi Qafqazda sərhədlərin açıq olmasının istəyir. Avropalı diplomat onu da bəyan edib ki, heç kim işğal olunmuş torpaqların Azərbaycan ərazisi olduğuna şübhə etmir: "Amma Avropa İttifaqı bu münaqişənin həlli ilə birbaşa məşğul olmur, nizamlanmada vasitəçilik edən ATƏT-in Minsk qrupunun səylərini dəstəkləyir. Dağlıq Qarabağ münaqişəsinin həlli prioritet məsələdir, münaqişənin həlli yolu tapılmalıdır, münaqişə hazırkı vəziyyətdə qala bilməz, bu regionun və Avropa İttifaqının təhlükəsizliyi üçün böyük təhlükədir. Gürcüstandakı müharibənin nəticələri Avropa İttifaqına öz təsirini göstərdi". Piter Semnebi Bakıda səfərinin yekunlaşdırdıqdan sonra Gürcüstana gedəcək.

Elməddin

Ədalət.- 2009.- 7 aprel.- S. 3.