Azərbaycanla NATO arasında əlaqələrin inkişafı labüddür

ARAZ ƏZİMOV: "NATO ÜZÜNÜ MÜSƏLMAN DÖVLƏTLƏRİNƏ ÇEVİRMƏLİDİR"

JEAN FRANCİOS BUREAU: "SON İLLƏR AZƏRBAYCAN NATO-nun ƏSAS TƏRƏFDAŞLARINDAN BİRİNƏ ÇEVRİLİB"

DÜNƏN Bakıda "NATO - Alyans tam siyasi yetkinlik çağında" adlı konfrans keçirildi. Azərbaycan və NATO arasında əlaqələndirici missiyasını yaxın 2 ildə həyata keçirəcək Rumıniyanın Azərbaycandakı səfirliyinin təşkilatçılığı ilə keçirilən tədbirdə dövlət rəsmiləri, xarici ölkələrin Azərbaycandakı səfirliklərinin nümayəndələri, NATO-nun nümayəndələri iştirak edirdilər.

Tədbirdə çıxış edən xarici işlər nazirinin müavini Araz Əzimov NATO-nun sonuncu sammitindən sonra belə bir tədbirin Azərbaycanda keçirilməsinin mühüm əhəmiyyət daşıdığını bildirdi: "Azərbaycan NATO ilə əməkdaşlığın genişləndirilməsində maraqlıdır. Yaxın vaxtlarda Azərbaycanın NATO ilə əməkdaşlağının 15 illiyi qeyd olunacaq. Ölkəmiz bu əməkdaşlıq çərçivəsində hərbi, sərhəd nəzarəti sahəsində islahatlar həyata keçirib. Azərbaycan NATO tərəfindən həyata keçirilən sülhyaratma əməliyyatlarına da öz töhfəsini verib. Hazırda ölkəmiz bu qurumla gələcək əməkdaşlıq perspektivlərini araşdırır".

A.Əzimov Azərbaycan artıq inanılan tərəfdaş olduğunu sübut etdiyini vurğuladı: "Əgər bu gün Azərbaycanın NATO-ya birbaşa üzvlük məsələsi mümkün deyilsə, əməkdaşlığa digər aspektdən nəzər salmaq vacibdir. Nəyə görə Azərbaycan Əfqanıstanda NATO ilə birgə fəaliyyət göstərməsin. Hazırda NATO rəhbərliyində yeni dəyişiklik olub. Hesab edirəm ki, artıq NATO üzünü müsəlman dövlətlərinə çevirməlidir. Azərbaycan bu mənada da ən yaxşı tərəfdaşdır".

NATO-nun nümayəndəsi Jean Francios Bureau təmsil etdiyi qurumun davamlı olaraq təhlükəsizliyin təmin olunmasına çalışdığını dedi: "Hazırda NATO-nun 28 üzvü var, eyni zamanda 21 ölkə ilə tərəfdaşlıq mövcuddur. NATO-nun sonuncu sammitindən sonra Alyansın təhlükəsizlik konsepsiyası yeni mərhələyə qədəm qoyacaq. Əfqanıstanda sabitliyə nail olmaq Alyansın gələcək əsas prinsiplərindən biridir. Hesab edirik ki, Azərbaycanla NATO arasında əlaqələrin inkişafı labüddür. Bu tərəfdaşlığın davam etdirilməsi üçün yeni sahələrə baxılması vacibdir. Son illər Azərbaycan elm sahəsində NATO-nun əsas tərəfdaşlarından birinə çevrilib. Əhalinin NATO ilə bağlı maarifləndirilməsi üçün bu son dərəcə vacib amildir".

Daha sonra tədbirdə Rumıniya səfiri Nikolae Ureçe Azərbaycanla NATO arasında əlaqələrin inkişafına çalışacaqlarını vurğuladı.

Fövqəladə hallar nazirinin müavini Etibar Mirzəyev NATO ilə Azərbaycan arasında qurulan əməkdaşlığın xüsusi önəm daşıdığını bildirdi: "Azərbaycan dövləti baş verəcək fövqəladə halların aradan qaldırılması üçün ciddi tədbirlər görür. Hazırda Ermənistan tərəfi işğal altında saxladığı Azərbaycan ərazilərində yanğınlar törədir. Bu da ölkəmizin flora və faunasına ciddi zərər vurur. Həmin ərazilər daimi snayper nəzarətində olduğu üçün bunun qarşısını almaq Azərbaycan üçün çətindir. NATO ölkələri öz nüfuzundan istifadə edib Ermənistana müraciət edərək bu yanğınların qarşısını almağa kömək etməlidir".

Amerika Birləşmiş Ştatlarının Azərbaycandakı səfiri xanım Enn Dersi də Azərbaycanla NATO arasında əməkdaşlığın vacib olduğunu vurğuladı: "15 il əvvəl NATO-nun tərəfdaşlıq planına qoşulan ilk ölkələrdən biri də Azərbaycan olub. Bu gün də NATO tərəfdaşları artmaqdadır. Azərbaycan özünün müstəqil gələcəyini qurduğu bir vaxtda ABŞ və NATO tərəfdaşları bu istiqamətdə öz səylərini əsirgəməyəcək".

Politoloq Vəfa Quluzadə isə NATO üzvü olan dövlətləri Azərbaycan ərazilərinin işğaldan azad edilməsinə yardım etməyə çağırdı: "NATO-nun sonuncu sammitində Azərbaycanın ərazi bütövlüyünün tanındığı bir daha vurğulandı. Hesab etmirəm ki, ATƏT-in Minsk Qrupu bu problemin həllinə nail olsun. Çünki bu qurum hazırda Azərbaycanla Ermənistanın vəziyyətini eyniləşdirir.

Ümid edirəm ki, NATO özündə cəsarət tapıb vəziyyətə real qiymət verəcək. Yalnız Azərbaycan torpaqlarının Ermənistan tərəfindən işğal edildiyni qəbul etməklə, işğalçı və işğala məruz qalan ölkələr arasında fərq qoymaqla problemin həllinə nail olmaq olar".

Xalid

Üç nöqtə.- 2009.- 10 aprel.- S. 9.