Avropa Azərbaycanlıları Konqresinin III qurultayı keçirilib

ƏVVƏLKİ TƏRKİBDƏ I VİTSE-PREZİDENT OLAN BAŞAR KÖMÜR AAK-ın PREZİDENTİ SEÇİLİB

ALMANİYANIN Frankfurt şəhərində Avropa Azərbaycanlıları Konqresinin (AAK) III qurultayı keçirilib. Diasporla İş üzrə Dövlət Komitəsindən "Üç nöqtə"yə verilən məlumata görə, qurultaya Avropanın 25 ölkəsindən 79 nümayəndə və qonaq qatılıb. Tədbirdə Diasporla İş üzrə Dövlət Komitəsinin sədri Nazim İbrahimov, Azərbaycanın Almaniyadakı səfiri Pərviz Şahbazov və digər nümayəndələr iştirak ediblər. Qurultayın qətnaməsi qəbul olunub. Qətnamədə konqresin növbəti qurultaya qədər fəaliyyət proqramının qəbul olunması qeyd edilib. Qətnaməyə uyğun olaraq AAK-ın strukturunda dəyişiklik edilib. Qurumun iki birinci vitse-prezident və beş vitse-prezident vəzifələri təsis edilib. Türkiyə-Azərbaycan Dərnəkləri Federasiyasının sədri Bilal Dündar və Benilüks Azərbaycanlıları Konqresinin fəxri prezidenti Sahil Qasımov I vitse-prezidentlər, Belarus Azərbaycan İcmaları Konqresinin sədri Natiq Bağırov, Estoniya Parlamentinin üzvü Eldar Əfəndiyev, Ukrayna Azərbaycanlıları Konqresinin sədri Akif Gülməmmədov, Srtasburq Azərbaycan Evinin rəhbəri Mustafa Alınca, Almaniya Azərbaycanlılarının Koordinasiya Mərkəzinin rəhbəri Samirə Patzer-İsmayılova isə vitse-prezident seçildilər. Sonra 27 nəfərdən ibarət İcraiyyə Komitəsinin tərkibi təsdiqlənib.

Mayns-Azərbaycan Cəmiyyətinin sədri, Dünya Azərbaycanlıları Əlaqələndirmə Şurasının İdarə Heyəti sədrinin müavini, əvvəlki tərkibdə I vitse-prezident olan Başar Kömür qurultayda AAK-ın prezidenti seçilib. Qeyd edək ki, qətnaməyə görə, Avropa Azərbaycanlıları Konqresinin IV qurultayı 2011-ci ildə Şərqi Avropa ölkələrinin birində keçiriləcək.

Afaq

Üç nöqtə.- 2009.- 16 aprel.- S. 6.