SƏMƏD SEYİDOV QURUMU AZƏRBAYCANLA ERMƏNİSTAN ARASINDA AYRISEÇKİLİK YARATMAQDA İTTİHAM ETDİ

Azərbaycan AŞPA ilə münasibətlərində dəyişiklik edə bilər

"AVROPA Şurası Ermənistana təzyiq etməməklə yanaşı, Azərbaycanda görülən işləri qiymətləndirmir. Bu qurumun işi Azərbaycanda problemlər tapmaq və iki ölkəni eyniləşdirməkdir. AŞPA Ermənistandakı siyasi məhbus problemini azadlıqdan məhrum olunmuş insanların problemi kimi qiymətləndirir. Azərbaycanda isə gedən prosesləri görməyərək ölkəmizə insan haqlarının pozulması ilə bağlı məruzəçinin təyin olunmasına cəhd edir.

Ona görə də nümayəndə heyəti həm özünün, həm də Azərbaycan hökumətinin mövqeyini onların diqqətinə çatdırıb ki, belə bir prosses baş verərsə, ölkəmiz bu təşkilatla münasibətini dəyişdirəcək". Bu kəskin bəyanatla dünən Azərbaycanın AŞPA-dakı nümayəndə heyətinin rəhbəri, millət vəkili Səməd Seyidov çıxış edib. Assambleyanın qış sessiyasının yekunlarına dair məlumat verən millət vəkili bəyan edib ki, bu qurumun məqsədi Azərbaycana yalnız iradlar tutmaqdır: "İndi 47 ölkədən ibarət olan təşkilatda heç kim deyə bilməz ki, Azərbaycan öz üzərinə götürdüyü öhdəliklərdə tam şəkildə yerinə yetirməməkdə hansısa bir problem yaradıb. İndiyədək yalnız "Alternativ xidmət" haqqında qanun qəbul olunmayıb. Bu qanun da ekspertlərlə işlənilib. Azərbaycan müharibə vəziyyətində olsa da, bu öhdəliyin də yerinə yetirilməsində israrlıdır. Ancaq ölkəmiz Avropa Şurasından eyni münasibəti gözləyir. AŞPA ilə eyni münasibətlərin gözləntilərində olan Azərbaycan isə tamamilə başqa, heç bir normal məntiqə uyğun olmayan münasibətləri və həqiqətləri görməkdədir".

Onun sözlərinə görə, heç kimə sirr deyil ki, Azərbaycanda prezident seçkilərinin bütün dünya tərəfindən demokratik və dünya standartlarına uyğun şəkildə keçirildiyi bəyan edilib. Bu, Avropada fəaliyyətdə olan millət vəkillərinin sözləridir: "Bu şəkildə qiymətləndirilən ölkə nə üçün başqa ölkələrlə bir araya qoyulur? Harda ki siyasi məhbuslar, insanların öldürülməsi, QHT-lərin ölkədən çıxmaması problemi yaşanır, Azərbaycan bu ölkələrlə bir araya qoyulur. Bu, qeyri-obyektiv və dözülməz bir münasibətdir" deyən deputat bildirib ki, AŞPA-nın yanvar sessiyasında Ermənistan məsələsi müzakirə olunub. Ancaq bu ölkəyə heç bir irad tutulmayıb. "Bizim gözləntilərimiz ondan ibarət idi ki, bu ölkə daim dəstəkləndiyi halda, heç olmasa bu dəfə tənqid olunsun. Yaxşı, səsvermə hüququnu almırsınız, Ermənistanda gedən proseslərə göz bağlayırsınız, bu ölkəni çıxardıb yüxarı başda otuzdurursunuz, heç olmasa, görüntü üçün onları tənqid edin. Deyin ki, Ermənistanda 100-dən artıq adam heç bir günahı olmadan hazırda həbsdədir. 12 nəfər seçki zamanı öldürülüb. Bütün jurnalistlər təzyiq altındadır. Heç olmasa bunu deyin, sonra da isə gücünüz çatmadığını söyləyin". Qurumun sessiyası çərçivəsində bir neçə görüşlər keçirdiklərini vurğulayan nümayəndə heyətinin rəhbəri bildirib ki, oradakı bəzi deputatların mövqeyi Azərbaycan reallıqlarını görməməkdən ibarətdir. Çıxışının sonunda S.Seyidov diqqətə çatdırıb ki, Azərbaycanda keçiriləcək referendumu izləmək üçün AŞPA-nın nümayəndələri ölkəmizə səfər edəcəklər. Məhz bundan istifadə edib Azərbaycan bu təşkilatla bundan sonrakı əlaqələrini müzakirə etməli və öz sözünü deməlidir.

Elməddin

Üç nöqtə.- 2009.- 3 fevral.- S. 6.