Vasif Adıgözəlovun xatirə gecəsi keçirildi

DÜNƏN 12 saylı musiqi məktəbində bəstəkar, tanınmış incəsənət xadimi Vasif Adıgözəlovun xatirəsinə həsr olumuş tədbir keçirildi. Tədbirdə çıxış edən bəstəkarın oğlu Yalçın Adıgözəlov atasının yaradıcılığına xüsüsi diqqət və qayğı göstərildiyinə görə, məmnun olduğunu bildirdi. "Vasif Adıgözəlovun yaradıcılığı xalq tərəfindən hər zaman sevilir və yad edilir. O, xoşbəxt bəstəkardır ki, əsərləri nəinki Azərbaycanda, dünyanın bir çox ölkəsində səslənir. Bu, o deməkdir ki, illər keçsə də, onun əsərləri yaşayacaq".

Bəstəkarlar İttifaqının sədri Firəngiz Əlizadə də Vasif Adıgözəlovun yaradıcılığına nəzər salaraq onun sayılıb-seçilən bəstəkarlardan olduğunu söylədi: "Uzun illər onunla çiyin-çiyinə Bəstəkarlar İttifaqında işləmişik. O, həm böyük fitri istedad, həm də böyük insan idi".

Tədbir konsert proqramı ilə başa çatdı. Məktəbin tələbələri bəstəkarın musiqilərindən ibarət mahnılar ifa etdilər, tarzən Mürvət Müslümov onun əsərlərindən parçalar səsləndirdi. Qeyd edək ki, Vasif Adıgözəlov "Natəvan" operası, "Qarabağ şikəstəsi" kantatası, "Çanaqqala" aratoriyası kimi əsərlərin müəllifidir.

Üç nöqtə.-2009.-5 fevral.-S.13.