Anqola Azərbaycana yeni səfir təyin edib

TİTU ARMANDO ÖLKƏSİNİN 2008-ci İLDƏKİ MÖVQEYİNİN ANLAŞILMAZLIQDAN İRƏLİ GƏLDİYİNİ DEYİB

XARİCİ işlər naziri Elmar Məmmədyarov Anqolanın Azərbaycana yeni təyin olunmuş səfiri Samuel Titu Armandonun etimadnaməsinin surətini qəbul edib. Görüşdə Azərbaycan-Anqola münasibətlərinin cari vəziyyəti müzakirə edilib. İki ölkə arasında əlaqələrin inkişaf etdirilməsi istiqamətində atılacaq addımlar ətrafında fikir mübadiləsi aparılıb. E.Məmmədyarov Azərbaycanın xarici siyasətində ən prioritet məsələ kimi ölkəmizin ərazi bütövlüyünün bərpa olunmasını vurğulaıb. Azərbaycanın işğal olunmuş ərazilərindəki vəziyyətlə bağlı qətnaməyə dair BMT Baş Assambleyasında 2008-ci ildə keçirilmiş səsvermədə Anqolanın qətnamənin əleyhinə səs verməsinin ölkəmizdə təəccüb doğurduğunu və bu faktın münasibətlərimizə kölgə saldığını bildirib.

Anqola Prezidenti Jose Eduardo dos Santuşun Bakıda Neft Akademiyasında təhsil aldığını bildirən səfir ölkəsinin Azərbaycanla münasibətlərin inkişafında maraqlı olduğunu vurğulayıb. Anqolanın qeyd olunan qətnaməyə dair səsvermə zamanı tutduğu mövqeyinin anlaşılmazlıqdan irəli gəldiyini deyən səfir bu faktın münasibətlərə xələl gətirməməsi üçün müvafiq iş aparacağını bildirib.

Üç nöqtə.-2009.-6 fevral.-S.5.