"Türkiyədə qalmaq istəyirəm"

RƏŞAD SADIQOV: "KİMƏ GÖRƏSƏ "NEFTÇİ"yə NİFRƏT ETMƏRƏM"

Yenidən zədəylə üzləşən Rəşad özünü həkimə göstərmək üçün 1 günlük Bakıya qayıdıb. Sivasa aparılmayan müdafiəçi "Bakı"nın həkimi Murad Mərdanlı tərəfindən tibbi müayinədən keçirilib. Türkiyəyə qayıtmamışdan 1-2 saat əvvəl isə o, bizə müsahibə verməyə razılıq verdi. Xeyli yorğun görünən müsafirimizin fikri-zikri yeni klubundadır. "Neftçi" ilə bağlı suallar könlüncə olmadı. Onu da başa düşməliyik. 2000-ci ildən şərəfini qoruduğu Bakı klubundan qalmaqalla ayrıldı və adına yüz cür söz çıxarıldı. Bu azmış kimi, 200 min dollar kompensasiya ödəmək məcburiyyətində qaldı. Hansı ki, hələ heç bir futbolçu keçmiş komandasına belə böyük məbləğ köçürməyib...

- "Gəncərbirliyi" ilə matçın ertəsi məşqdə belim ağrımağa başladı. Əvvəlki zədənin yeri deyildi. Belimin yuxarı hissəsi məni incidirdi. Gəldim Bakıya ki, Murad həkim baxsın. Allah üzümə baxıb, ciddi bir şey yoxdur. Əzələ dartılıb, "spazma" da var. Müalicə keçirəm. Özümü nisbətən yaxşı hiss etsəm də, hələ bir neçə gün müalicə kursunu aparmalıyam. Həkimlər nə vaxt lazım bilsə, onda da meydana çıxacam. Əsas heyətdəki yerimi itirməkdən qorxmuram. Müqaviləmdə yazılmayıb ki, mən hər oyunda meydana çıxmalıyam.

- İkinci dövrənin ilk turunda böyükhesablı qələbə qazandınız, lakin son 2 turda məğlub oldunuz. Bu, gözlənilən idi?

- "Hacettepe" bizim əsas rəqiblərimizdən biridir. Onlarla oyunda hər şey etdik. "Gənclərbirliyi" isə bizdən yaxşı təsir bağışladı. Bacardığımızı etdik, amma bu, kifayət eləmədi.

- "Gənclərbirliyi" ilə görüşdə də pis təsir bağışlamamışdın.

- Birinci hissədəki oyunumdan çox razı qaldım. Son dəqiqələrdə Kalye ilə toqquşduğumdan, dodağım parçalandı. Fasilədə ora 5 tikiş qoydular. Həkimə dedim ki, saxla, oyundan sonra edərsən. Əl çəkmədi, partlayan yerə iynə vurdu, sonra da tikdi. Bu da mənə çox pis təsir elədi. Fikrim yaranın yanında qalmışdı. Yorğunluq da güc gəldi. Komanda hücuma atıldığından, rəqib bizi arxada az adamla tutdu. "Kocaelispor" ikinci dövrəyə tam hazır deyil. Çempionat başlayanadək normal hazırlıq keçə bilməmişdik. Bunların təsirini hər gün yaşayırıq.

- Klub rəhbərliyinin, məşqçilərin münasibətindən razısan?

- Əla münasibətimiz var. Burdakı söz-söhbətlər yoxdur. Allaha şükür ki, adam kimi yaşayıram! Çirkin söhbətlərin yığışmasına görə qəlbim rahatdır.

- Türkiyəyə gedənədək bir neçə ay idi ki, oyun praktikasının azlığından əziyyət çəkirdin. Ancaq "Kocaelispor"la anlaşan kimi əsas heyətə düşdün. Elə belə də gözləyirdin?

- "Neftçi"nin əsas heyətindən ayrılandan sonra əvəzedici heyətdə oynadım. Yəni, oyun praktikamı tam itirmədim. Həm də bu arada milli oyunlar oldu, hamısında da iştirak elədim. Altın bizə tez-tez ikitərəfli oyunlar verir. Mən müdafiəçiyəm, oyun praktikam nə qədər az olsa da, problem yaşamıram.

- "Koacelispor"da sizə yaradılan şəraitdən razısınızmı?

- Bəli. Komandanın bazasında qalırıq, hərənin öz otağı var.

- Yeni komandada özünü lider kimi hiss edirsən?

- Meydana çıxan 11 oyunçudan biriyəm. Bütün günü Allaha dua edirəm ki, komandamız yaxşı çıxış eləsin, mənim də bunda payım olsun.

- Baş məşqçi Erhan Altınla özün barədə söhbətin olub?

- Dəfələrlə. Yaxşı insandır. Mənə çox inanır. Zədələnməyimə baxmayaraq, bir gözü üstümdədir. Sivasa getməmişdən qabaq neçə gün məşq eləmədim, yenə istəyirdi ki, meydana çıxım. Yalnız İstanbulda tibbi müayinədən keçəndə bilindi ki, oyunu mütləq buraxmalıyam.

- Altının "Neftçi"də başına gələnlərdən xəbəri var?

- Bizdə bu məsələni belə şişirdirlər. Bu qış fasiləsində "Kocaelispor" 8-9 futbolçusunu çıxardı. Heç kim demədi ki, siz nəyisə qəsdən elədiniz, bilərəkdən uduzdunuz. Onlara deyildi ki, istədiyimiz komandanı qura bilmədiyimiz üçün yeni heyət yığırıq. Futbolçuyla normal ayrılmağın yolları var.

- Kocaeli təmsilçisinin maddi durumu çox aşağıdır. Hansı şərtlərlə orda qalmağa razılıq vermisən?

- Maliyyə vəziyyəti həqiqətən yaxşı deyil. Yalnız maaşa oynayıram. Ancaq qarşıdakı 4-5 ayı fikirləşirəm. Yayadək belə davam edəcək. Puldan da vacib şeylər var. Çempionatın sonunadək özümü göstərib, Türkiyədə qalmaq, tanınmaq istəyirəm.

- Klubunu dəyişmək fikrin var?

- Ola bilər. "Kocaelispor"un Superliqada qalıb-qalmamasından çox şey asılıdır. Komanda çempionatda yerini qorusa, birinci növbədə orada qalacağam. İkinci liqada oynamaq fikrim yoxdur. İspaniyaya getmək sonranın işidir. "Valyadolid"ə bir də getməyə hazırlaşmıram. Bütün diqqətim Türkiyədədir ki, burda möhkəmlənim.

- "Sivasspor"un baş məşqçisi Bülənt Uyğun bizə bildirib ki, səni öz komandasında görmək istəyərdi.

- Türkiyədən qayıdandan bəri heç əlimə qəzet-filan keçməyib. Bütün günü dost-tanışla görüşmüşəm, yaxınlara baş çəkmişəm. Bülənt Uyğunun fikirləri ilə tanış deyiləm. Əlbəttə, mən də daha güclü komandada oynamaq istərdim. "Sivasspor" çempionatın lideridir. Ya qismət!

- "Neftçi"nin pulunu ödəmisən?

- Onlardan vaxi istəmişəm, bir müddət sonra verməliyəm. "Kocaelispor"da o pulu qazanmıram. Keçmişdə nəsə almışıqsa, indi onu satıb pulu qaytarmalıyam.

- Ya maşını satacaqsan, yada evi.

- Onu açıqlamaq istəmirəm. "Neftçi"nin pulunu başqa cür qaytara bilmərəm. İndi məndə o imkan yoxdur. Başqa kluba keçmək üçün vaxt az idi, ona görə də təkliflə razılaşdım. "Neftçi" mənim doğma komandamdır. Başqa futbolçu olsaydı, UEFA-ya şikayət edərdi ki, əsas heyətdən çıxarılandan sonra əvəzedici komandada oynasa da, ondan bu qədər pul istəyirlər. Bunu özümə sığışdırmadım, qəbahət bildim. "Neftçi"dən şikayət etmək, yenə qalmaqala düşmək istəmədim.

- "Neftçi"yə qayıtmaq variantı var?

- O variant həmişə gündəmdədir. Mən "Neftçi"ni hansısa adlara, simalara görə istəməmişəm, onu adına görə sevmişəm. "Neftçi" Azərbaycan futbolunun flaqmanıdır, keçmişidir. Futbolumuzun gələcəyi də "Neftçi"ylə bağlıdır. Kimə görəsə də "Neftçi"yə nifrət etməyəcəm. Gələcəkdə yenə böyük məmnuniyyətlə o komandanın formasını geyinərəm.

- Bu arada başqa klublardan təklif gəlməyib?

- Heç bir dəvət yoxdur. "Sakaryaspor"la danışıqlar aparmağım haqda deyilənlər yalandır.

- "Kocaelispor" Superliqanın həm debütantı, həm də autsayderidir. Klubun çempionatdan çıxmasına inanmırsan?

- Sonadək mübarizə aparacağıq. Superliqada qalmaq yolunda əsas 3 rəqibimiz var - "Dənizlispor", "Ankaragücü" və "Hacettepe". Hər üçü bu tur xal itirdi. Qalan komandalar bir kənara, adlarını çəkdiyim 4 komandanın öz arasında sanki turnir keçirilir. Onlardan biri qalacaq. Əlimizdən gələni edəcəyik. Bütün uşaqlar buna söz verib. Amma bizdən də asılı olmayan səbəblər var. Fasilədə güclü hazırlıq keçsəydik, vəziyyətdən tez çıxardıq. Heyət çox dəyişdi, gəlib-gedənlər oldu. Pulun azlığına görə klub gücdən düşdü.

- Səndən fərqli olaraq, digər futbolçumuz Ramal Hüseynov meydana, ümumiyyətlə, buraxılmayıb. Bunun səbəbi nədir?

- Baş məşqçi Ramalı ikitərəfli oyunlarda görüb və bəyənib, ondan razılıq edir. Amma Ramala deyir ki, fiziki cəhətdən hələ Türkiyə superliqasının oyunlarına hazır deyilsən. Buna görə də Ramal oyunlara buxarılmır.

- Hər açıqlamanda jurnalistlərdən narazılığını dilə gətirirsən. Mətbuatdan incikliyinin arxasında ciddi səbəb dayanır?

- İncikliyim mətuatdan yox, bəzi insanlardandır. O iki-üç nəfər də mənim üçün heç kimdir.

- Millini irəlidə Rusiya və Almaniya ilə rəsmi matçlar gözləyir.

- Millidən kənarda qalmağım pis oldu. Doğrudan da, Berti Foqtsun məşqlərindən zövq alıram. Məşqdə müdafiəçilərə çox vaxt ayırır. Onun gəlişindən sonra mən xətti müdafiədə oynamağın bir çox sirlərini öyrənmişəm. Bu gün həmin sirlər Türkiyə çempionatında normal çıxış etməyimdə mənə kömək olur. Foqtsdan bilmədiyim şeyləri götürmüşəm. Dubaya getmək istəyirdim, klubdan dedilər ki, qal, oyuna çıxacaqsan. Bazada bir günü də boş keçirmirəm. Ruslarla oyunu səbirsizliklə gözləyirəm.

İlkin

Üç nöqtə.-2009.-10 fevral.-S.15.