Millət vəkilinizi tanıyırsınızmı?

SEÇİCİ: "FUAD MURADOVU TANIMAQ ÜÇÜN, GƏRƏK, YOL KƏSƏYMİŞİK"

SEÇİCİLƏR SEÇDİKLƏRİNİN ADLARINI BELƏ XATIRLAMIRLAR

MİLLƏT vəkillərinin parlamentdə səlahiyyət müddətlərinin bitməsinə 1 ildən az vaxt qalıb. Bu müddətdən sonra hazırkı deputatların səlahiyyət müddəti bitəcək və yenidən seçki keçiriləcək. Bununla belə, parlamentdə bu 5 il ərzində bir dəfə də olsun danışmayan, ümumiyyətlə, Milli Məclisin iclaslarında iştirakı hiss olunmayan xeyli deputatımız var. Elə deputatlar var ki, bu müddətdə parlamentin iclaslarında bir kəlmə belə danışmayıblar. Hətta iş o yerə çatıb ki, əhali səs verib seçdiyi deputatını yaddan çıxarıb, onu tanımır. Biz də "millət vəkilinizi tanıyırsınızmı" sualı ilə sorğu keçirdik.

Şəfəq Kərimova (Xətai rayonu): - Tanımıram. Bundan sonra tanımaq da istəmirəm. Şəhərin mərkəzinə göstərilən diqqət burada yoxdur.

Vüqar Əliyev (Sabunçu rayonu): - Millət vəkili kimdir ki, mən heç qonşularımı tanımıram. Özüm Kəlbəcər rayonundanam, bu rayondan seçilmiş Cavid Qurbanovu tanıyıram. O, da rayon əhalisinin problemləri ilə həmişə maraqlanıb.

Nüşabə Allahverdiyeva (Səbail rayonu): - Hə, tanıyıram. Fuad Muradovdur. Xeyli şikayətlərdən sonra bir dəfə üzünü gördük. Əhali yolu kəsdiyinə görə o, cavab verməli oldu. Axırda su problemimiz həll olundu. Millət vəkilini biz yalnız bu qədər şikayətdən, baş ağrısından sonra görə bildik. Onu tanımaq üçün yol kəsməliymişik. Bu gün də küçələr işıqsız qalıb, qaranlıqda heç yolu görə bilmirik.

Arzu Səlimova (Binəqədi rayonu): -Xeyr, tanımıram. Bir dəfə də olsun üzünü görməmişəm.

Vəfa Allahverdiyeva (Nizami rayonu): - Xeyr, öz deputatımızı tanımıram. Adam öz qohumunu 5 il görməyəndə yadından çıxarır. Deputatlardan ancaq İqbal Ağazadəni tanıyıram. Amma haradan seçilib, bilmirəm.

Arif Kərimov (Nəsimi rayonu): - Mən bilən, bizim rayonun iki deputatı var. Amma onların adlarını bilmirəm. Eşitmişəm ki, biri idmançıdır, digəri isə partiyada işləyir.

Vaqif Səfərli (Xətai rayonu): - Xeyr, Xətainin deputatının kim olduğunu bilmirəm. Bura yeni köçmüşəm. Özüm cəlilabadlı olduğum üçün bu rayonun millət vəkilini tanıyıram. Aydın müəllim (Aydın Həsənov), arabir gəlib bizə baş çəkirdi.

Rəfiqə İmanova (Səbail rayonu): - Mən deputatımızın nə adını bilirəm, nə də özünü görmüşəm. Amma qonşular deyir ki, cavan adamdır. Orada oturanlardan (Milli Məclis) Aydın Mirzəzadəni, bir də Zahid Orucu arabir televiziyada görürük deyə, tanıyıram".

İmran İsayev (Səbail rayonu): -Mən deputatları tanımıram, tanımaq istəmirəm də. Onlar məni tanıyır ki, mən də tanıyam?

Lətifə Əliyeva (Sumqayıt şəhəri 2-ci mkrn.): "Millət vəkilini bu neçə ildə görməmişəm, adını da eşitməmişəm. Bundan sonra da görməyəcəyimizə əminəm.

Sorğumuzu bu yerdə dayandırırıq. Çünki adlar dəyişsə də, cavabların məzmunu təxminən eynidir: deputatımızı tanımırıq, bundan belə tanımaq da istəmirik, verdikləri vədə belə əməl etməyiblər. Millət vəkillərindən gözləntilər, onlara bəslənilən ümidlər hara, seçicilərin dedikləri hara. Bu dönəmi sayqısızlıqla başa vuracağımız şübhəsizdir. Ümidlər ölmədiyindən, növbəti seçkini gözləyək. Ancaq necə? Bu necəlik hər birimizdən asılıdır. Seçən qərarını qətiləşdirməli, seçilən vəzifəsinə və işinə məsuliyyətlə yanaşmalıdır ki, yenə də sayqısızlıq yaşanmasın

Afaq.

Üç nöqtə.-2009.-7 fevral.-S.11.