Müğənnilərimizin bərbad veb-saytları

FAİQ AĞAYEV ÖZ SAYTINDA HƏLƏ DƏ ƏMƏKDAR ARTİSTDİR

AYGÜN KAZIMOVANIN SAYTINDA İSƏ ANA DİLİNDƏ HEÇ NƏ YOXDUR

İNTERNETDƏN istifadə gündəlik həyatımızın ayrılmaz hissəsinə çevirilib. Bu, digər sahələrlə yanaşı, məşhur şou-biznes nümayəndələri ilə təmas qurmaq üçün yaxşı vasitədir. Xaricdə fanatlar sevdikləri müğənnilərin saytlarına daxil olmaqla onların yaradıcılığını izləmək, yeni layihələrlə tanış olmaq imkanı qazanır, suallara cavab ala bilir, arzu, təklif və ya iradlarını bildirirlər. Ən əsası isə əcnəbi ulduzlar öz pərəstişkarlarının müraciətlərinə biganə qalmırlar. Təəssüf ki, Azərbaycan sənətçiləri barədə belə xoş sözlər söyləmək mümkün deyil. Bunu milli şou-biznes nümayəndələrinə məxsus veb-səhifələri gözdən keçirdikdən sonra bir daha qətiyyətlə söyləmək olar. Sayt yaradılır, bir neçə hit mahnı, sənətçi və onun yaradıcılığı haqqında məlumat yerləşdirilir, bununla da iş bitmiş hesab olunur. Sonra isə heç nə yenilənmir. Şou-biznes aləmindəki əjdahaların, madonnaların, primadonnaların, toylar krallarının saytları nə gündədir? Başladıq müğənnilərimizin veb saytlarını araşdırmağa.

İlk açdıgımız sayt xalq artisti Brilliant Dadaşovanın oldu. Xanım müğənninin internet saytının o biri həmkarlarının saytından nisbətən yaxşı olduğunu gördük. Qara lövhə ilə açılan saytda əvvəlcə "brilliant" daşı təqdim olunur, sonra da köhnə xəbər - onun "Yağış" mahnısına çəkdirdiyi klip haqqında məlumat görünür. Üç dildə olan saytda onun şəkilləri, klipləri, mahnıları yerləşdirilib. Bioqrafiya bölməsində isə tanınmış ailədən olması, anasını avtoqəza nəticəsində itirməsi kimi məlumatlar yer alıb. Köhnə şəkil və məlumatlardan görünür ki, müğənni uzun müddət sayta daxil olmayıb. Amma insafən Brilliant xanımın saytı orijinallığı ilə seçilir.

Sevda Ələkbərzadənin saytı milliliyi özündə əks etdirdiyindən ürəkaçandır. Müğənninin peşəkarlıqla çəkilmiş şəkillərini, milli geyimini, əlindəki tar və qavalı bəyənməmək mümkün deyil. Amma bu müğənni də saytında rəngarənglik etməyib. Burda da yeniləşmə aparılmır. Saytda "Gül açdı" albomu və "Şəbi-hicran" layihəsi haqqında gen-bol xəbərlər təkrarçılığı və bənzərliyi ilə yorucudur. Düzdür, müğənninin nisbətən yeni fotolarına və mahnılarına burada rast gəlmək olar. Nəzərə alsaq ki, digər müğənnilər saytı sonuncu dəfə 2002-ci ildə yeniləşdirib, onda Sevda Ələkbərzadəni heç olmasa bir il əvvəl saytı ilə maraqlandığına görə, alqışlamaq olar.

Xalq artisti Aygün Kazımovanın saytında ana dilində heç nə yoxdur. Eyni zamanda, sayt açılar-açılmaz buna baxmamaq fikrinə düşürsən. Birinci səhifə o qədər maraqsızdır ki, içində səni nə gözlədiyini öyrənmək fikrindən o dəqiqə vaz keçirsən. Rus və ingilis dilində olan sayta Azərbaycan dilini daxil etməyi deyəsən, müğənni unudub. Burada sonuncu dəfə 2002-ci ildə onun "Best model of Azərbaijan"ın rəhbəri seçilərkən qələmə alınan informasiyalar yerləşdirilib. Müğənni son mahnılarını bura daxil etməyi unutmaqla yanaşı, haqqında informasiyalar yetərli qədər deyil.

Faiq Ağayevin saytı Aygünün saytından heç də az fəqlənmir. Müğənninin saytı oxunmadığı üçün toz basmış kitaba bənzəyir. Maraqlı burasıdır ki, müğənni öz saytında hələ də əməkdar artist kimi göstərilir. Yəni xalq artistinin özü də saytına baxmır. Sayt iki foto və "qızıl şlyager" sözləri ilə açılır. Burada 1991-ci ildən 2002-ci ilə qədər onunla bağlı xəbərlər yerləşdirilib. Şəkillər bölməsində olan fotolar onun sənətə yeni gəldiyi illəri xatırladır. Sözün qısası, Faiq də illərdir ki, saytından xəbər tutmur. Belə olan halda sayt onun nəyinə lazımdır?

Elşad Xosenin saytı bərbad vəziyyətdədir. Bir neçə il əvvəl yaradılan sayt necə var idisə, elə də qalıb. Sayt bir neçə bölüm və bir-iki şəkildən ibarətdir. Burada onun ilk albomundan mahnılar da var. Çox kasad saytda bölmələr işləmir. Reperin işləməyən sayt yaratmasının səbəbini də yəqin yalnız özü bilir.

Tünzalə Ağayevanın saytı maraqlı olsa da, burada da heç bir yeniləşmə aparılmır. Sonuncu məlumatlar 2004-cü ili əhatə edir. Saytda onun haqqında qısa məlumat, əvvəlki stilində-başı bağlı şəkilləri, mahnıları var. Müğənninin 4 ildəki dəyişikliyi haqqında saytda zərrə qədər də informasiya yoxdur.

Dörd dildə fəaliyyət göstərən, amma bircə dəfə də olsun baxılmayan saytın özü maraqlıdır. Sayt bölmələrinin teatr səhnəsi formasında əvəzlənməsi ilə diqqəti çəkir. Eyni zamanda, saytın forum bölməsi işləmir.

Azərinin saytı 3 dildə fəaliyyət göstərir. Müğənni bildirir ki, sayt ziyarətçilərini burada görməkdən məmnundur. Ən maraqlısı isə Azərinin özü haqqında informasiyaları saytda yerləşdirməməsidir. Saytda müğənninin yaradıcılığı ilə bağlı məlumatlar yerləşdirilib. Eyni zamanda, Emin Sabitoğlu, Vaqif Mustafayev, Rafiq Babayev və başqa sənətkarlar haqqında qısa məlumatlar var. Azərin təvazökar olduğunu saytda da nümayiş etdirib.

Röyanın saytı isə təmirdədir. Müğənninin saytına giriş məhdudlaşdırılıb. Saytın ilk səhifəsi açılsa da, bölümlərə daxil olmaq mümkün deyil.

İradə İbrahimovanın saytı isə qətiyyən işləmir. Nə vaxt işləyəcəyi isə məlum deyil.

Beləliklə, tanınmış estrada müğənnilərinin İnternet saytlarını nəzərdən keçirdikdən sonra belə qənaətə gəlmək olur ki, bizim müğənnilər öz veb-səhifələrini sadəcə prestij əlaməti olaraq yaradıblar. Vaxtilə həmin saytların gurultulu təqdimat mərasimini keçirən müğənnilərin əsas məqsədi bu olub ki, qoy desinlər ki, filankəsin də veb-səhifəsi var. Halbuki, bu cür "ölü saytlar"ın fəaliyyət göstərməsindənsə, göstərməməsi daha məqsədəuyğundur. Belə nəticəyə gəlmək olar ki, bu saytları heç kim - nə jurnalistlər, nə musiqi həvəskarları, nə də fanatları izləyir...

Simnarə.

Üç nöqtə.-2009.-7 fevral.-S.17.