"Açıq-saçıq filmlərə çəkiləcəyəm"

"QIZLAR" SERİALINI OYNAMAĞA ÖZÜMÜ MƏCBUR EDİRDİM"

VƏFA ZEYNALOVA: "HEÇ KİM MƏNİ QINAMASIN"

AKADEMİK Milli Dram Teatrının aktrisası Vəfa Zeynalova hər kəsə tanışdır. O, filmlərdə və tamaşalarda daha çox baş rolun ifaçısı kimi xatırlanır. Aktrisanın həyatında ilk çəkildiyi "Xınalı yapıncaq" serialındakı Lamiyə obrazının xüsusi yeri var. Bu filmi özünün vizit kartı hesab edən aktrisa qeyd edir ki, tamaşaçılar ona hələ də Lamiyə deyə müraciət edirlər. Redaksiyamızın qonağı olan aktrisa bizimlə söhbətində həm yaradıcılığından danışdı, həm də bir çox digər mətləblərdən söhbət açdı.

- Vəfa Zeynalova, yoxsa, Rzayeva?

- Əslində tamaşaçıların çaş-baş düşməsinə mən özüm şərait yaratmışam. Zeynalova mənim ata soyadımdır. Ailə qurandan sonra yoldaşımın soyadını daşıdım və o mənə söylədi ki, artıq bəyan elə ki, sən Rzayevasan. Mən də onun söylədiyi kimi açıqlama verdim, bundan sonra tamaşaçılar arasında çaşqınlıq yarandı. Hətta bəziləri şayiə yaydı ki, guya Zeynalova mənim birinci həyat yoldaşımın soyadıdır, Rzayeva isə, ikinci dəfə ailə qurduğum şəxsin soyadıdır. Amma elə deyil, mən bircə dəfə ailə həyatı qurmuşam. Ailəmlə xoşbəxtəm. Kim hansı soyadla istəyirsə, məni onunla da təqdim edir. Çünki Zeynalova da mənimdir, Rzayeva da. Sənəddə yodaşımın soyadı yazılsa da, xalq məni Zeynalova kimi qəbul edib. Nə isə Rzayeva soyadı qəbul olunmadı. Özüm də istəyirəm ki, Zeynalova kimi təqdim olunum. Buna heç yoldaşım narazı deyil.

- Hollivud və Türkiyənin kino ulduzları ilə eyni filmə dəvət almışdınız. Həmin filmin taleyi necə oldu?

- Filmlə əlaqədar olaraq bir neçə gündür ki, İstanbuldan qayıtmışam. Bu, böyük bir büdcə tələb edən filmdir. Hələ ki, çəkiliş üçün lazım olan smeta dəyəri tutulmayıb. Ona görə də çəkilişlər uzanır. Onu da qeyd edim ki, Türkiyə telekanallarında filmin reklam çarxları getdi.

- Həm filmlərdə, həm də tamaşalarda siz sənətdə öz sözünü demiş sənətkarlarla tərəf-müqabil olmusunuz. Hansı ilə oynamaq sizə daha yaxındır, yəni bir hərəkətlə, bir işarə ilə bir-birinizi başa düşürsünüz?

- Bunu çox düzgün vurğuladınız. Çünki istər kinoda, istərsə də, tamaşada tərəf-müqablilərin bir-birini tamamlaması böyük şərtdir. Çünki elə böyük sənətkarlar var ki, tərəf-müqabil kimi zəifdir. Mənim tərəf-müqabilim ürəyimcə olmayanda özüm də oynaya bilmirəm. Çox sənətkarlarımızla tərəf-müqabil olmuşam və onların mənə böyük köməkliyi olub. Şükufə Yusifova ilə eyni səhnədə oynayanda mən zövq alıram. Ondan nə isə öyrənməyə çalışıram. Bu sırada Anar Heybətovun da adını çəkə bilərəm.

Redaksiyamıza ilk oxucu zəngi daxil olur.

- Vəfa xanım, sizi "Yanmış körpülər" serialında çox bəyəndim. Amma son zamanlar sənətinizdə sanki durğunluq yaranıb...

- Film çəkilişləri var, ona görə görünmürəm. Çəkiliş prosesi uzun çəkir. Çünki tamaşaçı həmişə nəticəni görür. Filmlərə baxandan sonra görəcəksiniz ki, mən boş oturmuram. Həm də mən teatrda da tamaşalar oynayıram.

- Gəlin, söhbətimizi davam etdirək. "Qızlar" serialının uğursuz alınması ilə razısınız? Çunki bir çox peşəkar insanlar da bunu təsdiqlədi.

- Bayaq siz tərəf-müqabil ilə bağlı sual verəndə gözlərimin önündən o serial keçdi. Çünki biz o qızlarla tərəf-müqabil kimi bir-birimizi başa düşə bilmirdik, tamamlamırdıq. Ona görə də serialın uğursuz alınmasında hardasa bizim də bir oyunçu kimi rolumuz var. Yəni biz üç nəfər qız bir-birimizi yaxşı anlaya bilmədiyimzə görə, mənim istədiyim səviyyədə rolun öhdəsindən gələ bilmədik. Buna baxmayaraq, mən hardasa aktrisalıq təcrübəmdən qazandıqlarımı həmin rolda istifadə etdim. Çəkiliş prosesində "Qızlar" serialını oynamağa özümü məcbur edirdim. Öz rolumdan özüm ləzzət ala bilmirdim. Bu da aktyor üçün çox ağırdır. Çünki özüm-özümə zülm edirdim. Qəbul edirəm ki, filmin çatışmayan tərəfləri çox idi. Digər tərəfdən isə, Azərbaycanda serial üçün bu, başlanğıc idi. "Bakı-film" studiyası həmin serialın ərsəyə gəlməsində çox əziyyət çəkdi. Onlar istəyirdilər ki, yüksək səviyyəli serial çəksinlər.

Yenə oxucu zəngi daxil olur:

- Salam, Vəfa xanım. "Xınalı yapıncaq"da siz Lamiyə obrazını yaratdınız. Amma mənə elə gəlir ki, bu, sizin şah əsəriniz deyil. Hələ siz özünüzü tam olaraq doğrultmamısınız. Biz sizdən bir rol gözləyək, yoxsa, Lamiyə sizin obrazlarınızın ən kulminasiya nöqtəsidir?

- Lamiyə mənim üçün başlanğıc idi. Bundan sonra bir neçə uğurlu filmlər olacaq ki, o zaman məni yenidən kəşf edəcəksiniz.

- Yeri gəlmişkən, Vəfa xanım, siz bir çox filmlərə və tamaşalara çəkilməyinizə baxmayaraq, tamaşaçıların yadında Lamiyə kimi qalmısınız. Bu adla heç sizə müraciət edən olur?

- Hə, bu günə qədər tamaşaçı mənə Lamiyə kimi müraciət edir. Elə insanlar var ki, yaxınlaşır mənimlə söhbət edir, mənə Lamiyə deyir. O anda demirəm ki, mən Lamiyə deyiləm, Vəfayam. Çünki bu, mənə zövq verir. Elə bilirəm ki, doğrudan da Lamiyəyəm. Hətta bu obrazım mənə bütün yaratdığım rollardan əzizdir.

Daha bir oxucu zəngi:

- Vəfa xanım, sizin oynadığınız rolları bəyənirəm, amma düşünürəm ki, səsiniz dublyaj olunmalıdır. Çünki səsinizdə kəsilmələr var.

- Bu məsələləri mən həll etmirəm. Filmin rejissoru və prodüseri olur. Ona görə də hes bir söz deyə bilmərəm.

- Vəfa ilə Lamiyənin arasında hansı oxşarlıqlar var?

- Heç bir oxşarlıq yoxdur.

- Şou aləmini hər kəs qalmaqal meydanı kimi tanıyır. Amma bir çox aktrisalar deyir ki, bütövlükdə teatr aləmində elə olaylar cərəyan edir ki, şou aləmi onun yanında toya getməlidir. Bu fikirlə razısınızmı?

- Ümumilikdə götürəndə hər bir sahədə kolleqalar arasında çəkişmə var. Sadəcə, müğənnilər və aktyorlar göz önündə olduğu üçün mətbuat və maqazin proqramları onu xalqa tez çatdırır. O ki qaldı sizin sualınıza, bu, insanın özündən asılıdır. İnsanın qanında, canında davakarlıq varsa, harada olursa-olsun qırğın salacaq.

- Şəxsən sizin teatrda həmkarlarınızla münasibətiniz necədir?

- Hər kəslə münasibətim yaxşıdır. Sadəcə olaraq, mən sözü üzə deyən olduğum üçün bu, bir çoxunun xoşuna gəlmir. Yəni insanlar öz eyiblərini görmək istəmir. Sonra da məndən inciyirlər. Əgər kimsə mənim hansısa səhvimi üzümə desə, ola bilər ki, söz mənim üçün xoş olmasın, amma qəbul edirəm. Hətta bu barədə çox düşünürəm, səhvlərimi düzəltməyə çalışıram. Bəlkə də aqressiv insan olduğum üçün sözü üzə deməyi xoşlayıram.

Oxucu zəngi:

- Vəfa xanım, sizin Məleykə Əsədova ilə münasibətləriniz niyə pozulmuşdu?

- Mən deməzdim ki, onunla mənim münasibətim pozulmuşdu. Məleykə xanım nə düşünürsə, onun özü bilər, öz işidir. Mən nə var, onu demişəm. O, da həmin sözləri qəbul etməyib. Lakin bu, onun öz problemdir, mən yenə də fikrimdə qalıram.

- İfa etdiyiniz rollar bir az açıq-saçıq olur. Bu, ailənizdə problem yaratmır ki?

- Hansısa bir obrazla Vəfanı qatmaq olmaz. Mən aktrisayam, səhnədə başqalarının həyatını oynayıram. Səhnədən arxada isə özüməm və unutmuram ki, mən hansısa kişinin qızıyam, kiminsə bacısıyam, kiminsə həyat yoldaşıyam, anayam və nəhayət, Azərbaycanda yaşayıram. Görürsünüz, buların hamısı məsuliyyətdir. Həmişə istəmişəm ki, insan birinci özünü, sonra ətrafını fikirləşsin. Amma məndə əksinə olur. İstər-istəməz ətrafı, ən sonda isə, özümü düşünürəm. Açıq-saçıq səhnələrə çəkilmək məsuliyyətdir və buna görə, çox böyük işlərimi itirmişəm. Çünki açıq-saçıq səhnələrə çəkilməkdən imtina etməyə məcbur olmuşam. Bu da mənim itkilərim olub. Amma sərhəddi keçməmək şərtilə açıq-saçıq filmlərə çəkiləcəyəm, heç kim məni qınamasın. Çünki mən Vəfa kimi küçədə çılpaq gəzmirəm, hansısa obrazı canlandırıram və onun həyatını tamaşaçıya göstərirəm. Çəkiliş meydanından çıxdıqdan sonra artıq özüm oluram. Təbii ki, həyat yoldaşım bu səhnələrə bir az qısqanclıqla yanaşır. Amma son anda razılaşır ki, bu, mənim sənətimdir.

- Həyat yoldaşınız sizi Vəfa kimi bəyəndi, yoxsa Lamiyə kimi?

- Vəfa kimi bəyənib. Çünki onunla tanış olanda "Xınalı yapıncaq"a dəvət almamışdım. Sonra filmə dəvət aldım və o özü məni çəkiliş meydançasına aparıb gətirirdi. Ondan sonra film efirə getdi. Amma mən bir az ağıllı addım atdım. Tanış olanda ona söylədim ki, mən sənətdən uzaqlaşmayacağam. O da məni qəbul etdi. Şükür Allaha, indiyə qədər də ailəmi qoruyub saxlayıram. O, barədə heç bir problem yaşamıram. Baxmayaraq ki, özü başqa bir sənətin sahibidir, mənim sənətimə hörmətlə yanaşır və mənə dayaq olur.

Redaksiyamıza sonunca oxucu zəngi daxil olur:

- Siz çox gözəl xanımsınız, amma kənardan çox özündənrazı görünürsünüz, bunu heç sizə deyiblər?

- Çox, çox, o qədər deyiblər. Amma mən nə edə bilərəm ki, mənim görünüşüm budur. Məni tanıyan hər kəs bilir ki, səmimiyəm.

Simnarə HƏMİDQIZI

Üç nöqtə.-2009.-14 fevral.-S.15.