"Azərbaycan islam həmrəyliyinin daha da möhkəmlənməsinə çalışır"

PREZİDENT İLHAM ƏLİYEV: "BİZ ERMƏNİSTANIN TƏCAVÜZÜ NƏTİCƏSİNDƏ İŞĞAL ALTINDA OLAN TARİXİ ABİDƏLƏRİMİZİ BƏRPA EDƏCƏYİK"

"BİZ bütün tarixi abidələrimizi torpaqlarımız işğal altından çıxandan sonra bərpa edəcəyik. Bütün şəhərləri yenidən bərpa edəcəyik, binaları tikəcəyik. Ancaq bunu etmək üçün Ermənistan-Azərbaycan, Dağlıq Qarabağ münaqişəsinə son qoyulmalıdır. Azərbaycanın ərazi bütövlüyü bərpa olunmalıdır və bizim vətəndaşlarımız öz doğma torpaqlarına qayıtmalıdırlar".

Prezident İlham Əliyev bu bəyanatı "Bakı - İslam mədəniyyətinin paytaxtı-2009" mədəniyyət ilinin təntənəli açılışı mərasimindəki nitqində səsləndirib. Dövlət başçısı Bakının və ölkənin digər bölgələrində çoxsaylı memarlıq, tarixi və dini abidələrin dövlət tərəfindən qorunduğunu vurğulayaraq deyib: "Biz Ermənistanın Azərbaycana təcavüzü nəticəsində işğal altında qalan torpaqlarda öz tarixi irsimizi qoruya bilmirik. Çünki torpaqlarımız erməni işğalı altındadır. Bu işğal və etnik təmizləmə siyasəti nəticəsində ərazimizin 20 faizi işğal altına düşübdür və bir milyondan artıq soydaşımız qaçqın-köçkün vəziyyətində yaşayır. Tarixi abidələrimiz, muzeylərimiz, dini məbədlərimiz, məscidlərimiz ermənilər tərəfindən dağıdılıb". Dövlət başçısı diqqətə çatdırıb ki, bütün bu faktlar 2005-ci ildə ATƏT-in faktaraşdırıcı missiyasının Dağlıq Qarabağa və işğal olunmuş digər ərazilərə səfəri zamanı hazırlanan məruzədə göstərilib.

Prezident İlham Əliyev onu da bəyan edib ki, Azərbaycan öz tərəfindən bütün islam ölkələrinin maraqlarının qorunması üçün öz töhfəsini verməyə hazırdır və bundan sonra da öz siyasətində bu prinsipləri rəhbər tutacaq. Dövlət başçısı ötən ilin martında Birləşmiş Millətlər Təşkilatının Baş Məclisində Azərbaycanın işğal altında olan torpaqlarının azad edilməsi ilə əlaqədar qətnamənin qəbul edilməsinə səs verən bütün dövlətlərə, o cümlədən islam ölkələrinə minnətdarlığını bildirib: "Baxmayaraq ki, böyük dövlətlər, bu münaqişə ilə bilavasitə məşğul olan ölkələr qətnamənin qəbul olunmasına problemlər yaratmaq istəyib və əleyhinə səs veriblər, ancaq bu qətnamə böyük səs çoxluğu ilə qəbul edilib. Qətnaməyə səs verən 39 ölkə arasında əksəriyyət müsəlman ölkələridir. Bunlar islam həmrəyliyinin, müştərək siyasətimizin real nəticələridir". Azərbaycan Prezidenti qeyd edib ki, ölkəmizdə İslam Konfransı Təşkilatı, İSESKO və Avropa strukturlarının xətti ilə çoxsaylı tədbirlər keçirilir. Bu, çox önəmlidir: "Avropa ilə islam dünyası arasında olan münasibətlərin möhkəmlənməsi maraqlarımıza cavab verir. "Azərbaycan müstəqil ölkə kimi öz siyasəti, praktiki işləri ilə islam aləminin bir-birinə daha da yaxın olmasına, islam həmrəyliyinin daha da möhkəmlənməsinə çalışır", - deyən Prezident İlham Əliyev vurğulayıb ki, buna böyük ehtiyac var və biz bir-birimizi dəstəkləməli, iqtisadi, siyasi sahədə sıx əməkdaşlıq etməliyik. İslam ölkələri arasında qarşılıqlı ticarət aparılmalıdır: "Siyasi müstəvidə, beynəlxalq təşkilatlarda, Birləşmiş Millətlər Təşkilatında islam ölkələrinin birliyi, həmrəyliyi çox böyük əhəmiyyət daşıyır. Bizim birgə təşəbbüslərimiz bir məqsəd güdür: dünyada sülh, təhlükəsizlik, əmin-amanlıq təmin olunsun. Dünyada müharibələr olmasın və sivilizasiyalar arasında aparılan dialoq daha da möhkəmlənsin və onun daha da yaxşı nəticələri olsun. Azərbaycanın bu işlərdə rolu getdikcə artmaqdadır".

Elməddin MURADLI

Üç nöqtə.- 2009.- 19 fevral.- S. 3.