"Əsas məqsəd təhsilli futbolçu yetişdirməkdir"

Rövnəq Abdullayev: "Azərbaycanda uşaq futbolunun inkişafına qoyulan hər bir sərmayə gələcəkdə öz bəhrəsini verəcək"

Şenes Erzik: "Bakıya gözəl stadion lazımdır"

Məlum olduğu kimi, UEFA və AFFA-nın maliyyə vəsaiti hesabına inşa olunmuş "Futbol Akademiyası"nın açılış mərasimi keçirilib. Tədbirdə AFFA prezidenti Rövnəq Abdullayev, FİFA İcraiyyə Komitəsinin üzvü, UEFA-nın vitse-prezidenti Şenes Erzik, FİFA-nın texniki direktoru Jan Mişel Benezet, gənclər və idman nazirinin müavini İsmayıl İsmayılov, Milli Olimpiya Komitəsinin vitse-prezidenti Çingiz Hüseynzadə, İcraiyyə Komitəsinin üzvləri, futbol veteranları və digər rəsmi şəxslər iştirak ediblər. Abdullayev və Erzik jurnalistlərin suallarını cavablandırıb.

- Əvvəlcə "Futbol Akademiyası"nın açılış mərasimi ilə bağlı fikirlərinizi bildirərdiniz.

Rövnəq Abdullayev - Bu akademiya UEFA və AFFA-nın birgə səyi nəticəsində başa gəlibdir. "Futbol Akademiyası"nda gənc futbolçular hazırlıq mərhələsi keçəcəklər. Həmçinin Azərbaycanın aşağı yaş qrupu üzrə milli komandalarının - U-15 və U-17-nin burada təlim-məşq toplanışı olacaq. Azərbaycanın müxtəlif şəhər və rayonlarında istedadlı uşaqları buraya toplayıb, onlara məşqlər keçiriləcək. Bu akademiyada uşaqlar üçün hər bir şərait yaradılıb. Onların işi ancaq futbolla məşğul olmaq olacaq.

- Belə akademiyaların Azərbaycanın müxtəlif bölgələrində tikilməsi nəzərdə tutulubmu?

R.A. - Artıq bu sahədə işlər həyata keçirilməyə başlanılıb. Bilirsiniz ki, bir müddət əvvəl 8-ci mikrorayonda Təhsil Nazirliyi ilə birgə yeni futbol məktəbi tikib istifadəyə verdik. İndi bir neçə bölgədə - Gəncədə, Siyəzəndə artıq futbol internatları tikilir. Keçmiş internat futbol məktəblərini təmir etdiririk. Bu sahədə Təhsil Nazirliyi çox aktiv iştirak edir.

- Uşaqlara məşq keçəcək kadrlar varmı?

R.A. - Azərbaycanda kifayət qədər məşqçilər var. Bilirsiniz ki, U-17-nin baş məşqçisi almaniyalı Bernhard Lippert, U-15-in çalışdırıcısı Oliver Pelzer, onların köməkçiləri isə yerli məşqçilərdir. Almaniyalı məşqçilər böyük bir proqram həyata keçirirlər. Azərbaycanda uşaq futbolunun inkişafı üçün bu proqramları reallaşdırırıq.

- Bakıda böyük stadionun tikintisinə nə vaxt başlanılacaq?

R.A. - Bununla bağlı hazırlıq gedir. Hazırda layihənin hazırlıq işləri aparılır. Artıq bununla bağlı müqavilələr imzalanıb. Layihə tamamlandıqdan sonra inşaat işinə başlanılacaq.

- Cənab Şenes Erzikin "Futbol Akademiyası" ilə bağlı fikirlərini bilmək istərdik...

Şenes Erzik - Türkiyədə belə bir söz var: "Ağaç yaş olanda əyilir". Yəni gənclərə qoyulan hər bir sərmayə gələcəkdə öz bəhrəsini verəcək. Ona görə də belə futbol akademiyaları bölgələrdə də inşa edilməlidir. Bölgədə yetişən uşaqlar gələcəkdə aparıcı futbolçular olmalıdırlar. Təbii ki, burada ikitərəfli təhsil - həm futbol, həm də məktəb təlim-tərbiyəsi verilməlidir. Əsas məqsəd təhsilli futbolçu yetişdirməkdir. Azərbaycana yaraşan böyük bir layihə var. Bu da paytaxtda inşa olunacaq böyük arenadır. Bundan başqa, Rövnəq Abdullayevin futbolun inkişafına dair layihələri var. Bu barədə müzakirələrimiz olacaq. Bakıya gözəl stadion lazımdır.

Mən, eyni zamanda, UEFA-nın stadionların Təhlükəsizlik Komitəsinin prezidenti kimi öz təcrübələrimdən istifadə edərək, yeni stadionun inşasında köməyimi əsirgəməyəcəyəm. Beynəlxalq oyunların keçiriləcəyi stadionun inşa edilməsi həyata keçiriləcək ən yaxşı layihələrdən biri olacaq. Ölkə prezidenti İlham Əliyevin də dəstəyi ilə böyük bir stadionun tikiləcəyinə inanıram. Bu işə UEFA və FİFA olaraq biz də dəstək verəcəyik.

Üç nöqtə.- 2009.- 25 fevral.- S. 15.