"Azerfon" və
"Vodafone" strateji
tərəfdaşlıq müqaviləsi
imzaladılar
"BU, AZƏRBAYCANIN İKT SAHƏSİNİ
DAHA DA İNKİŞAF ETDİRMƏYƏ İMKAN VERƏCƏK"
AZƏRBAYCANIN sürətlə
inkişaf edən mobil operatorlarından biri olan
"Azerfon" MMC ilə "Vodafone" şirkəti
arasında strateji tərəfdaşlıq müqaviləsi
imzalandı. Bu münasibətlə dünən "Hyatt
Regency" otelində təqdimat mərasimi keçirildi.
"Azerfon" şirkətinin baş direktoru Gido Helbix qeyd
etdi ki "Azerfon" və "Vodafone" arasında strateji
tərəfdaşlıq hər iki şirkət
üçün çox önəmlidir: "Ölkənin
böyük sürətlə inkişaf edən mobil operatoru
"Azerfon" üçün sözügedən müqavilənin
imzalanması gələcək inkişafa istiqamətlənən
məntiqli bir addımdır. Belə ki, "Azerfon"
"Vodafone" şirkətinin təcrübəsindən və
dünya miqyaslı uğurlarından istifadə edərək
qabaqcıl və ən innovativ məhsulları yerli bazarda təqdim
edə biləcək. Bu, potensialımızı nümayiş
etdirməyə və Azərbaycanın İKT sahəsini daha
da inkişaf etdirməyə imkan verəcək". Tərəfdaş
bazarları haqqında müqaviləyə əsasən,
"Azerfon", xidmət və qurğuların, habelə təchizatlar
silsiləsinin idarə edilməsi, müştərilərin cəlb
olunması və təkmilləşdirilən şəbəkələrarası
əlaqənin təşkil olunması sahəsində
"Vodafone" şirkətinin geniş təcrübəsindən
eksklüziv istifadə hüququ əldə edir. "Vodafone"
şirkətinin məhsulları "Azerfon"un
hazırkı və gələcək abunəçilərinə
təqdim olunacaq. "Vodafone" şirkətinin tərəfdaş
bazarları üzrə vitse-prezidenti Riçard Deyli (Richard
Daly) qeyd etdi ki, "Azerfon" ilə imzalanan müqavilə
"Vodafone" şirkətinin Azərbaycan bazarında
iştirakını təmin etmək, habelə ölkənin ən
sürətlə inkişaf edən mobil operatoru ilə əməkdaşlıq
etmək üçün əla imkandır. Rabitə və
informasiya texnologiyaları nazirinin müavini Elmir Vəlizadə
və Böyük Britaniyanın ölkəmizdəki səfiri
Karolin Braun da mərasimdə çıxış edərək
bildirdilər ki, "Azerfon" şirkətilə əməkdaşlıq
"Vodafone" şirkətinə öz müştərilərinə
"qlobal" (dünya tərəfdaşları) şəkəbəsinin
imkanlarından bəhrələnmək üçün bir
sıra xidmətləri, həmçinin Azərbaycan ərazisində
genişləndirilən əhatə dairəsini təqdim etməyə
imkan verəcək. Hər iki şirkət regiondakı
"Vodafone Global Enterprise" proqramının müştəriləri
üçün əlavə dəstəyin təqdim edilməsi
məqsədilə əməkdaşlıq edəcəklər".
Əfsun
Üç nöqtə.- 2009.- 23 iyul.- S.14.