Qarabağa "Qarabağ"la !!!

ƏHSƏN, "QARABAĞ"!!! NORVEÇİN ƏN ÜNLÜ FUTBOL KOMANDASI "RUSENBORQ" BAKIDA YENİLDİ!!!

Tahir Gözəl: "Xalqımıza belə bir qələbə bəxş etdiyimizə görə çox sevinirik"

QURBAN QURBANOV: "QƏLƏBƏNİN BELƏ BİR GÜNDƏ QAZANILMASI DAHA SEVİNDİRİCİDİR"

BİZ O QƏLƏBƏNİ "ÜÇ NÖQTƏ" OLARAQ TOFİQ BƏHRAMOV ADINA STADİONDA İZLƏDİK VƏ GEDƏNDƏ HƏR BİRİMİZ ÖZÜMÜZLƏ ÜÇ NƏFƏRİ APARDIQ

XATIRLADIRIQ ki, bu komandaların iyulun 16-da Norveçdə keçirilən qarşılaşması 0:0 hesabı ilə başa çatmışdı. Növbəti mərhələyə adlamaq üçün yaxşı şans əldə edən "Qarabağ" dünən mütləq qələbə qazanmalı idi. Özü də təsadüfdənmi, yoxsa zərurətdənmi, iyulun 23-ü "Qarabağ" futbol komandasının təmsil olunduğu Ağdam şəhərinin erməni silahlı qüvvələri tərəfindən işğal günü idi. Və elə ona görə də futbolçularımızın uduzması praktiki cəhətdən qəbulolunmaz idi, çünki məhz iyulun 23-də qazanılan qələbə Qarabağa doğru "Qarabağ"la başlanılacaq qələbənin bünövrəsi olmalı idi və nə yaxşı ki, o ümidlərimiz doğruldu və biz Qarabağa doğru 1:0 hesabı ilə gedəsi olduq. Bu, həm də təkcə "Qarabağ" komandasının qələbəsi deyildi, bütövlüklə Azərbaycan futbol elitasının qələbəsi idi. Qurban Qurbanov Norveçdə oynatdığı 11-liyi dəyişmək niyyətində deyil. Azarkeşlər "Qarabağ bizimdir, bizim olacaq" şüarını səsləndirir.

Bütün stadion dayanmadan "Qarabağ!" qışqırırdı. "Qarabağ" bu gün qalib gəlməli idi. Əlbəttə, bunu etmək asan məsələ deyildi. Qonaqların baş məşqçisi Erik Hamrin Bakıya döyüşkən heyət gətirmişdi və matç öncəsi son mətbuat konfransında da dünənki matçın onlar üçün ağır keçəcəyini bildirmişdi. Qurban Qurbanov isə rəqibə hörmətlə yanaşdıqlarını, bununla belə qələbə qazanmaq istədiklərini açıqlamışdı. Gənc mütəxəssis ilk oyundakı əsas heyəti də dəyişməyərək, beləliklə, uğura inamını ifadə etmişdi.

Azarkeşlər də "Qarabağ"ı tək buraxmamışdı, arena tamamilə dolmuşdu. Oyunun ayın 23-nə təsadüf eləməsi prinsipiallığı artırmışdı. Axı 16 il əvvəl, məhz iyulun 23-də Ağdam ermənilər tərəfindən işğal olunmuşdu. Mənfur düşmənlərimizin bu hərəkəti heç vaxt unudulmayandır və dünən "Qarabağ" göstərdi ki, Qarabağın oğlanları hələ ölməyib, yaşayır, vuruşur. Bəli, komandamız qalib gəldi. Dünən meydanda yalnız "Qarabağ" vardı, yalnız "Qarabağ". Həmin "Qarabağ" ki qan yaddaşımızı təzələdi, ruhumuzu yerindən oynatdı. Rəşad Sadıqovun 45-ci dəqiqədə cərimə zərbəsindən vurduğu möhtəşəm qol "Qarabağ"ı növbəti mərhələyə daşıdı. İkinci hissədə norveçlilər bütün komandayla hücuma atılsa da, Ağdam klubunun müdafiə xətti keçilməz idi. Kimi fərqləndirək, bütün futbolçular əsl QƏHRƏMAN kimi mübarizə apardılar. Qonaqlar bunu gözləmirdi.

"İlk növbədə "Qarabağ"ı təbrik edirəm. Birinci hissədə çox zəif oynadıq. İkinci hissədə fəal olsaq da, əlimizə düşən imkanlardan istifadə edə bilmədik". Bu sözlər "Rusenborq"un baş məşqçisi Erik Hamrinə məxsusdur. "Qarabağ"a uduzaraq mübarizəni dayandıran Norveç təmsilçisinin çalışdırıcısı bildirib ki, ikinci hissədə hücumlarının nəticə verəcəyinə əmin idi: "Ancaq bir neçə epizodda qapıçınız yaxşı oynadı. Mən sizi həm də vurduğunuz fantastik qol münasibətilə təbrik edirəm. Bizim üçün növbəti mərhələyə keçmək çox vacib idi. Amma bu məğlubiyyət mənim üçün ona görə acıdır ki, ilk itkimiz oldu. Həm mən, həm də futbolçularımız "Qarabağ" adını uzun müddət unutmayacağıq". "Qarabağ"ın baş məşqçisi Qurban Qurbanov isə olduqca şad idi: "Mən hələ Norveçdə söyləmişdim ki, cavab oyunu daha çətin olacaq". Gənc çalışdırıcının sözlərinə görə, bu dəfə hər şey qaydasında idi: "Futbolçular bu tarixi qələbə üçün maksimum güclərini qoydular. Əlbəttə, qələbənin belə bir gündə qazanılması daha sevindiricidir. Futbolçular, rəhbərlik hamısı birgə söz vermişdilər ki, belə bir gündə qələbəni azarkeşlərə hədiyyə edək. Allah qismət eləsin ki, gələcəkdə Ağdam torpağında da belə qələbəmiz olsun". Qurbanov 90 dəqiqə ərzində durmadan komandaya dəstək verən azarkeşləri də yaddan çıxarmayıb: "Onların möhtəşəm dəstəyi bizə əlavə güc verdi. Onlara "afərin" deyirəm. Həmkarım Rəşadın qolunu fantastik adlandırırsa, mən bunu daha yüksək qiymətləndirirəm. Növbəti mərhələyə yüksəldik. Çalışacağıq ki, yolumuza davam edək". Əlbəttə, bu qələbə bütün azərbaycanlıların, qarabağlıların qələbəsidir! "Qarabağ" Avropanı ayağa qaldırdı, adından söz etdirdi. Hər bir uğurun bir memarı olur. Bu tarixi uğurun memarı isə Abdulbarı Gözəl və komandanın vitse-prezidenti Tahir Gözəlin simasında Qarabağı və "Qarabağ"ı sevən insanlardır. Düz 8 il əvvəl onlar dağılmaq üzrə olan kluba sahib çıxdılar, bütün çətinlikləri aşa-aşa gətirib bu səviyyəyə çatdırdılar. Matçdan sonra onların hər ikisi futbolçuları təbrik etdi, yeni-yeni uğurlar arzuladı. Tahir bəyin gözlərindəki yaş isə dayanmaq bilmirdi. Sevincindən sanki dünyanı ona vermişdilər. "İndi Ən xoşbəxt Adam kimdir" deyə soruşulsaydı, "əlbəttə, mən!" söyləyərdi. Klubun vitse-prezidenti jurnalistləri də yaddan çıxarmadı və matçla bağlı fikirlərini bölüşdü: "Çox çətin oyun oldu. Amma əsas olan odur ki, möhtəşəm qələbə qazandıq. Tarixi bir gündə meydana çıxmışdıq. Belə bir gündə qələbə qazanmaq daha çox xoşdur. Bu qələbədə azarkeşlərin də böyük rolu oldu. Xalqımıza belə bir qələbə bəxş etdiyimizə görə çox sevinirik. Bizi həddindən artıq çətin oyunun gözlədiyini bilirdik. "Rusenborq" Avropa səviyyəli bir komandadır. Amma biz rəqibin ad-sanından çəkinmədik. Sonadək meydanda bütün gücümüzü qoyaraq, qələbə qazandıq. "Rusenborq" kimi komandanı məğlub etmək çox xoşdur. Bu qələbədə azarkeşlərin də böyük rolu oldu. Bizə göstərdikləri möhtəşəm dəstəyə görə onlara təşəkkür edirəm. İnşallah, bu uğurların davamı gələcək. Mən söz verirəm ki, "Qarabağ" yenə adına layiq səviyyədə çıxış edəcək. Avropa qoy, bizim ayaq səslərimizi eşitsin. Hədəfimiz bacardıqca irəli getməkdir. Mən həmişə demişəm, "Qarabağ" öz oyununu oynayarsa, qarşısında bir kimsə dayana bilməz. Bu gün hamımız bunun şahidi olduq. Ağdamın işğalı günündə 1 milyondan çox qaçqına sevinc bəxş edə bildik. Bundan gözəl nə ola bilər///... Bütün məşqçilərimi, futbolçularımı və azarkeşləri bağrıma basıram. Bu gün heç vaxt yaddaşlardan silinməyəcək".

Sonunda "Üç nöqtə" kollektivi adından "Qarabağ" komandasının inkişafın və bugünkü qələbəsində böyük xidməti olan "Azərsun Holdinq" Şirkətlər Qrupunun prezidenti Abdulbarı Gözələ təşəkkür edirik.

Babək İlkin

Üç nöqtə.- 2009.- 24 iyul.- S. 3.