Böhranın qarşısını almaq üçün Mərkəzi Banka əlavə səlahiyyətlər verilir

ELMAN RÜSTƏMOV: "MƏRKƏZİ BANK BANKLARA KREDİTLƏRİN VERİLMƏ MÜDDƏTİNİ ÖZÜ MÜƏYYƏNLƏŞDİRƏCƏK"

DÜNYADAKI maliyyə böhranı ilə əlaqədar Azərbaycan Mərkəzi Bankının səlahiyyətləri genişləndirilir. "Media forum" saytının məlumatına görə, Milli Məclisin İqtisadi siyasət komitəsinin dünən keçirilən iclasında "Mərkəzi Bank haqqında" qanuna əlavə və dəyişikliklər edilməsi məsələsi müzakirə olunub.

Mərkəzi Bankın sədri Elman Rüstəmov qeyd edib ki, hazırda bütün dünyada qlobal iqtisadi böhran yaşanmaqdadır: "Bu böhranın Azərbaycana da təsiri var. Azərbaycan dünyanın böhrana ən davamlı ölkələrindən biri olsa da, prosesin mənfi təsirlərindən tam qaça bilməyib. Buna görə də hökumət bir sıra məsələ ilə bağlı qabaqlayıcı tədbirlər görür. Böhran şəraitində Mərkəzi Bankın da daha çevik olmasına ehtiyac var. Bununla əlaqədar qanuna bir sıra dəyişikliklər təklif olunur. Məsələn, Mərkəzi Banka səlahiyyətləri çərçivəsində özəl banklara kreditlər vermək hüququ tanınır. Hazırda qüvvədə olan qanunda da Mərkəzi Bank bu hüquqa malikdir. Amma banklara verilən kreditlər ən uzağı 6 ay müddətinə verilə bilər və bu müddət bir dəfə 6 ay müddətinə uzadıla bilər. İndi isə Mərkəzi Bank banklara kreditlərin verilmə müddətini özü müəyyənləşdirəcək".

E.Rüstəmov deyib ki, kreditlərin 6 ay müddətində verilməsi indiki şəraitdə olduqca azdır. O bildirib ki, qanuna edilən digər dəyişikliyə əsasən? Mərkəzi Bank real sektora maliyyə yardımı göstərmək hüququ qazanır. Onun sözlərinə görə, böhran dövründə ölkədə bir sıra sahələrə ciddi maliyyə dəstəyinin verilməsinə ehtiyac yaranıb: "Böhran nəticəsində ölkənin alüminium sənayesində nəzərə çarpacaq problemlər müşahidə olunur. Vəziyyətdən çıxmaq üçün alüminium sənayesinə böyük miqdarda maliyyə yardımı edilməsinə ehtiyac var. Amma indiki şəraitdə ölkənin özəl banklarının bu həcmdə maliyyə ayırmaq imkanı yoxdur. Buna görə də təklif olunur ki, Mərkəzi Banka bu cür situasiyalarda real sektora kreditlər ayırmaq səlahiyyəti verilsin. Lazım gəlsə, Mərkəzi Bank bank sektoru vasitəsilə böyük müəssisələrə maliyyə yardımları edəcək. Bütövlükdə qanuna təklif olunan dəyişikliklər Mərkəzi Bankın çevikliyinin artırılmasına hesablanıb. Dəyişikliyin digər məqsədi böhran dövründə lazımi addımların atılması və ölkənin post-böhran dövrünə hazırlanmasıdır".

Mərkəzi Bankın sədri vurğulayıb ki, Azərbaycanın 2010-cu il üçün iqtisadi proqnozları post-böhran dövrü şərtlərinə uyğun hazırlanacaq, görülən bütün tədbirlər iqtisadiyyatın böhrandan çıxarılmasına hesablanacaq: "Ölkənin gələn il üçün müəyyənləşdirilən pul-kredit siyasəti də məhz bu xarakterli olacaq. Artıq indidən bu dövrdə hansı addımların atılacağı dəqiqləşdirilir. Hökumət post-böhran dövründə pul-kredit siyasətinin əhəmiyyətli dərəcədə yumşaldılması siyasətini davam etdirəcək. Eyni zamanda, sahibkarlığa geniş şəkildə dəstək veriləcək. İxrac xarakterli qeyri-neft sektoruna diqqət artırılacaq".

Müzakirələrdən sonra qanun layihəsi Milli Məclisin plenar iclasına tövsiyə olunub.

Üç nöqtə.- 2009.- 11 iyun.- S. 10.