NATO Azərbaycanın NABUCCO-da yer almasını dəstəkləyir

MAYKL QAUL: "AZƏRBAYCANIN ENERJİ TƏHLÜKƏSİZLİYİNİN QORUNMASINDA GÜCLÜ MÜDAFİƏ SİSTEMİ VAR"

"AZƏRBAYCANIN enerji təhlükəsizliyinin qorunmasında həddindən artıq güclü müdafiə sistemi var. Bu ölkə enerji hasilatçısı kimi dünyada kifayət qədər mühüm rol oynayır. Biz də istərdik ki, bu məsələlər ətrafında fikir mübadiləsini dərinləşdirək".

Bu açıqlama ilə NATO-nun Müdafiə və iqtisadi təhlükəsizlik departamentinin direktoru Maykl Qaul çıxış edib. M.Qaulun sözlərinə görə, NATO-nun son iki ildə keçirilən sammitlərində enerji təhlükəsizliyi istiqamətində xeyli işlər görülüb: "Bu məsələ ilə bağlı istər enerji istehlakçıları, istərsə də istehsalçıları ilə bilavasitə enerji tranzitı sayılan ölkələr arasında əməkdaşlığın gücləndirilməsi və bununla bağlı müzakirələrin aparılması vacibdir. Belə müzakirələrin Bakıda aparılması isə daha məqsədəuyğundur". M.Qaul regional neft və qaz kəmərlərinin təhlükəsizliyi baxımından NATO-nun rolunun nədən ibarət ola bilməsinə də aydınlıq gətirib: "Bu, daxili infrastruktur kimi qəbul edildiyindən regiondan, ölkə ərazilərindən keçən neft və qaz kəmərlərinin qorunması milli və daxili məsələ kimi prioritetdir. Amma bəzi istisnalar da var. Məsələn, əgər müraciət edilərsə NATO öz üzv dövlətlərinə qaz kəmərlərinin qorunmasında yardım göstərə bilər". NABUCCO-nun qorunmasına gəlincə NATO təmsilçisi ilk öncə bu kəmər ətrafında son razılıq olmasını vacib sayıb: "Yəni NABUCCO-nun maliyyələşdirilməsi istiqamətində də ölkələr ümumi razılığa gəlməlidir. Ona görə də hələlik NABUCCO-nun NATO tərəfindən qorunması üçün belə fikir və ideya yoxdur. Alyans bu layihənin mühümlüyünü və vacibliyni dərk edir. Ona görə də Azərbaycanın bu layihədə yer almasını dəstəkləyir. Amma ilk öncə kəmər ərazisindən keçəcək ölkələr vahid qərara gəlməlidirlər".

Xalid

Üç nöqtə.- 2009.- 11 iyun.- S. 5.