"Kosovo məsələsində Azərbaycan bizə dəstək verdi"

SERBİYANIN XARİCİ İŞLƏR NAZİRİ VUK YEREMİÇİN: "KOSOVO İLƏ BAĞLI MƏSƏLƏ DÜNYA ÖLKƏLƏRİNİN ƏRAZİ BÜTÖVLÜYÜ MƏSƏLƏSİNƏ FƏSADLAR YARADA BİLƏR"

ELMAR MƏMMƏDYAROV: "MÜNAQİŞƏLƏR BEYNƏLXALQ HÜQUQ NORMA VƏ PRİNSİPLƏRİ ƏSASINDA HƏLL EDİLMƏLİDİR"

DÜNƏN Azərbaycanın xarici işlər naziri Elmar Məmmədyarov serbiyalı həmkarı Vuk Yeremiçinlə görüşüb. Görüşdən sonra hər iki nazir birgə mətbuat konfransı keçirib. E.Məmmədyarov bildirib ki, serbiyalı həmkarı ilə təkbətək və geniş tərkibdə görüşdə ikitərəfli və regional maraq doğuran bir sıra məsələlər müzakirə edilib. Serbiyanın Azərbaycana səfər edən ilk xarici işlər naziri olduğunu bildirən Vuk Yeremiçin bundan mənmun qaldığını vurğuladı. E.Məmmədyarov Azərbaycan və Serbiya arasında bir çox sahələr üzrə saziş və müqavilələrin imzalanmasına ehtiyac olduğunu vurğuladı: "Bu ilin sentyabrında Nyu-Yorkda həmkarımla paket tipli sazişlər imzalayacağıq. Buna hazırlıqla bağlı nazirliklərin hüquq departamentinə təlimat verilib. Sazişlərin digər hissəsi isə qarşıdakı aylarda Azərbaycandan Serbiyaya ediləcək yüksək səviyyəli səfərlər zamanı baş tutacaq".

Daha sonra jurnalistlərin suallarını cavablandıran nazirlər Qarabağ və Kosovo məsələsinin nizamlanması barədə aparılan müzakirələr haqqında məlumat veriblər. E.Məmmədyarov deyib ki, Kosovo və Qarabağ münaqişələri ətrafında müzakirə apardıq. "Hər iki ölkənin mövqeyi bundan ibarətdir ki, münaqişələr beynəlxalq hüquq norma və prinsipləri əsasında həll edilməlidir".

Vuk Yeremiçin isə bildirib ki, Kosovo ilə bağlı məsələ dünyada bütün ölkələrin ərazi bütövlüyü məsələsinə fəsadlar yarada bilər: "Bu səbəbdən də Serbiya beynəlxalq Haaqa Məhkəməsi qarşısında bu məsələni qaldırıb. BMT-nin Baş Assambleyasında keçirilən səsvermə zamanı Azərbaycanın dəstəyi nəticəsində bu məsələdə qalib gəlmişik. Məhkəmənin qərarına gəlincə, hesab edirik ki, birtərəfli şəkildə müstəqillik elan edilə bilməz. Beynəlxalq hüquqda ərazi bütövlüyü toxunulmazdır. Ona görə də məhkəmənin ədalətli qərar çıxaracağına inanırıq".

Xalid

Üç nöqtə.- 2009.- 24 iyun.- S. 4.