Gürcüstanda azərbaycanlıların problemləri həll edilmir

ƏLİBALA ƏSGƏROV: "RƏSMİLƏR PROBLEMLƏRİ ETİRAF ETSƏLƏR DƏ, ONLARIN ARADAN QALDIRILMASINA CƏHD GÖSTƏRMİRLƏR"

GÜRCÜSTANDA azərbaycanlılar yaşayan yer adlarının dəyişdirilməsi ilə bağlı problem artıq uzun müddətdir gündəmdədir. Azərbaycan xalqının tarixi, mili ənənələrini əks etdirən toponimlərin yenidən bərpa olunması bir qrup millət vəkilinin Gürcüstana səfəri çərçivəsində də qaldırılmışdı. O zaman Gürcüstan rəsmiləri məsələnin müsbət həll ediləcəyi ilə bağlı vəd vermişdilər. Soydaşlarımızı narahat edən bu kimi problemlərlə bağlı suallarımza "Qeyrət" Xalq Hərəkatının sədri Əlibala Əsgərovla söhbətimizdə aydınlıq gətirməyə çalışdıq.

-Əlibala müəllim, Gürcüstanda azərbaycanlılar yaşayan kəndlərin əvvəlki adları bərpa edildimi?

- 1992-ci ildən etibarən Bolnisi rayonundakı Azərbaycan əsilli adların bir çoxu gürcü toponimlərilə əvəz edilib. Gürcüstan dövlətinin demokratik dəyərlərə söykənən bir dövlət olduğu bildirilsə də, azərbaycanlılar yaşayan bölgələrdə belə hərəkətlər insan hüquqlarının pozulmasıdır. Dəfələrlə müraciət etsək də, bu istiqamətdə Gürcüstan hökuməti heç bir addım atmayıb. Bu günlərdə Orconikidzenin adını daşıyan bir gürcü kəndinin adı dəyişdirildi. Amma yenə də başqa bir gürcü toponimi ilə əvəz edildi. Gürcüstan hökuməti əvvəlki problemlərlə bağlı toponimlərin dəyişdiriləcəyi barədə vəd verib.

- Azərbaycanlılar yaşayan kəndlərdə quraşdırılan xaçların o ərazilərdən götürülməsi ilə bağlı xəbərlər yayılsa da, aldığımız məlumata görə, əvvəlcə quraşdırılan xaçlar yerində qalır.

- Doğrudur, əvvəlcə quraşdırılan xaçlar yerində qalır. Kvemo-Kartli (Borçalı) vilayətindəki Bolnisi rayonunun, əhalisi əsasən azərbaycanlılardan ibarət olan Qoçulu və Kəpənəkçi kəndlərində 7-10 metr hündürlüyündə xaçlar hələ də əvvəlki yerindədir. Arıxlı kəndinin mərkəzində olan xaçlar da yerində qalır. Gürcüstan prezidentinin region üzrə səlahiyyətli nümayəndəsinin də problemdən xəbəri var. Qubernator xaçların quraşdırılmasını öz üzərindən atır. Rəsmi şəxslər bunu dini qurumların həyata keçirdiyini bildirirlər.

- Sizin azərbaycanlıların sosial problemlərinin həlli ilə bağlı hazırlayıb hökumətə təqdim etdiyiniz konsepsiyanın taleyi necə oldu?

- Həmin konsepsiya ilə bağlı hökumətdən bizə heç bir cavab verilmədi. Bu günədək orada göstərilən problemlərin həlli ilə bağlı konkret işlər də görülməyib. Azərbaycanlılara məxsus olan torpaqların 80 faizinin Tbilisidən olan gürcülərə satılıb. Torpağın 1 sotunun 70 dollara təklif olunduğu halda gizli auksionda qiymət 140 dollara qədər bahalaşır. İmkanlı gürcülər bundan yararlanırlar. Əvvəllər Gürcüstanda 167 Azərbaycan məktəbi var idisə, indi bu təhsil ocaqlarından yalnız 137-si qalıb. Gürcüstanda 70 minə qədər abxaz yaşayır və abxaz dili dövlət dilidir. Amma ölkədə 520 min azərbaycanlı yaşadığı halda azəri türkcəsi dövlət dili statusunu almayıb. Bütün bu problemlərdən bezən azərbaycanlılar evlərini kütləvi surətdə tərk edirlər.

Xalid

Üç nöqtə.- 2009.- 5 mart.- S. 9.