Respublika Muğam Müsabiqəsinə start verildi

MÜSABİQƏDƏN ÜÇ NƏFƏR KƏNARLAŞDIRILIB

DÜNƏN Beynəlxalq Muğam Festivalında iştirak edəcək gənc muğam ifaçılarının püşkatma mərasimi keçirildi. Açılışda iştirak edən mədəniyyət və turizm naziri Əbülfəs Qarayev və təhsil naziri Misir Mərdanov Beynəlxalq Muğam Festivalının keçirilməsini böyük hadisə kimi qiymətləndirdilər.

Misir Mərdanov qeyd etdi ki, Azərbaycan bu festivala çox ciddi şəkildə hazırlaşır. "Müsabiqəyə 100-dən artıq muğam ifaçısı sənəd təqdim edib və onların arasından 24 nəfər seçilib. Buna görə mədəniyyət və turizm naziri Əbülfəs Qarayevə təşəkkürümü bildirirəm. O, bu cür işləri ilə bu vəzifəni layiqincə həyata keçirir və Qarayevlər nəslinin layiqli davamçısı olduğunu sübut edir". Mədəniyyət və turizm naziri Əbülfəs Qarayev isə Beynəlxalq Muğam Festivalının həyata keçirilməsinin Azərbaycan xalqı üçün dəyərli layihə olduğunu diqqətə çatdırdı. O, qeyd etdi ki, Beynəlxalq Muğam Festivalı Heydər Əliyev Fondu, Mədəniyyət və Turizm Nazirliyi, Azərbaycan Bəstəkarlar İttifaqının təşkilatçılığı, Azərbaycan Mədəniyyətinin Dostları Fondu və Təhsil Nazirliyinin sponsorluğu ilə "Muğam aləmi" adı altında baş tutacaq. Beynəlxalq Muğam Festivalı martın 17-dən 25-dək davam edəcək.

Qeyd edək ki, müsabiqədə 27 nəfərin iştirakı nəzərdə tutulsa da, 24 nəfər seçilib. İştirakçılardan üç nəfər gənc - Abgül Mirzəliyev, Güldanə Cavadzadə və Rəvanə Ərəbova püşkatma mərasiminə gecikdikləri üçün münsiflər heyətinin qərarı ilə müsabiqədən kənarlaşdırılıblar.

Münsiflər heyətində xalq artistləri Əlibaba Məmmədov, Arif Babayev, Ağaxan Abdullayev, Siyavuş Kərimi, Səkinə İsmayılova, Mənsum İbrahimov, Ramiz Zöhrabov və Azərbaycan Mədəniyyət Dostları Fondunun nümayəndəsi İbrahim Quliyev təmsil olunmuşdur.

Müsabiqənin təşkilatçısı, Bəstəkarlar İttifaqının sədri Firəngiz Əlizadə bildirdi ki, muğam müsabiqəsinin keçirilməsi ilə əlaqədar olaraq xaricdən böyük musiqiçilər dəvət olunub: "Məqsədimiz muğam musiqisinin "world music" - dünya musiqisi olduğunu sübut etməkdir. Dahi Üzeyir bəy demişdi ki, Şərq musiqisinin yeddi sütunu var.

Biz bu yeddi sütunu həmin festivalda təqdim etmək arzusundayıq. O sütunlardan biri də muğamdır. Muğam bütün ənənəvi musiqilərin kökündədir. Bütün dünya xalqlarının musiqilərində muğam intonasiyaları var. Bu strukturun üzərində köklənən ənənəvi musiqilərin inkişafı həmin festivalda nümayiş olunacaq".

Üç nöqtə.- 2009.- 6 mart.- S. 13.