"KİV haqqında" qanuna edilən dəyişikliklər müsbət qarşılanır

YADİGAR MƏMMƏDLİ: "BU DƏYİŞİKLİKLƏRİ MƏCBURİ ADDIM KİMİ DƏ QƏBUL ETMƏK OLAR"

MƏLUM olduğu kimi, ötən həftə Milli Məclisdə "KİV haqqında" qanuna əlavə və dəyişikliklər edilib. Bu dəyişikliklərin mətbuatda bəzi problemləri aradan qaldıracağı ilə yanaşı, bunun əksini düşünənlər də var. Demokratik Jurnalistlər Liqasının sədri Yadigar Məmmədlinin qənaətinə görə isə "KİV haqqında" qanuna dəyişikliklər edilməsi dövrün tələbindən irəli gəlib:

"Bu əlavələrin mətbuat sahəsində köklü dəyişikliklərə səbəb olacağını gözləmək düzgün deyil. Azərbaycanda "KİV haqqında" qanun çox mükəmməl bir sənəd idi. Son dəyişikliklər isə mövcud vəziyyətdən irəli gələrək atılan bir addımdır. Bu dəyişiklikləri məcburən atılan addım kimi də qəbul etmək olar. Çünki demokratik ölkələrin bir çoxunda KİV haqqında qanunda belə maddələr yoxdur. Xarici ölkələrdə bu sahədə Azərbaycanda müşahidə olunan hallara rast gəlinmir. Bizdə isə hər kəs qəzet açmağa, mətbuat sahəsində fəaliyyət göstərməyə cəhd edir. Bundan istifadə edən bəzi işbazlar həm mətbuata, həm də cəmiyyətə əlavə problem yaradırdı. Buna görə də yalnız ali təhsilli şəxslərin qəzet açmasına icazə verilməsi barədə dəyişiklik zəruri idi. Digər dəyişikliklərin edilməsinə də ehtiyac vardı. Belə hesab edirəm ki, müəyyən dövrdən sonra həmin dəyişikliklər əhəmiyyətini itirəcək".

"Səs" qəzetinin baş redaktoru Bəhruz Quliyev də "KİV haqqında" qanuna əlavə və dəyişikliklər edilməsinin zərurətdən irəli gəldiyi qənaətindədir: "Digər sahələrdə olduğu kimi, kütləvi informasiya vasitələri haqqında qanunlarda da təkmilləşdirmə aparılmasına ehtiyac var idi. Bu mənada, qanuna edilən son dəyişikliklər müsbət qarşılanmalıdır. Dəyişikliklər mövcud vəziyyətin tələbindən irəli gəlir".

Xalid

Üç nöqtə.- 2009.- 11 mart.- S. 10.