"Heydər Əliyevin ideyaları XXI əsrdə: Azərbaycanın inkişaf yolu"

ƏLİ ƏHMƏDOV: "AZƏRBAYCANIN İNKİŞAFININ KÖKÜNDƏ HEYDƏR ƏLİYEV İDEYASI DAYANIR"

DÜNƏN Yeni Azərbaycan Partiyasının təşəbbüsü ilə "Heydər Əliyevin ideyaları XXI əsrdə: Azərbaycanın inkişaf yolu" mövzusunda konfrans keçirildi. Konfransın plenar iclasında millət vəkilləri, hökumət nümayəndələri, partiya rəhbərləri və bir sıra dövlət qurumlarının rəhbərləri iştirak edirdi. Yeni Azərbaycan Partiyasının sədr müavini Əli Əhmədov "Azərbaycanın inkişafına aparan ideyalar: Heydər Əliyev dayanıqlı, sabit və davamlı inkişaf konsepsiyası müasir mərhələdə" mövzusunda çıxış etdi. Xalqların və ölkələrin inkişafının əsasında böyük şəxsiyyətlərin ideyalarının dayandığını qeyd edən Ə.Əhmədov, məhz Heydər Əliyev ideyalarının Azərbaycanın bu günü və sabahını özündə əks etdirdiyini dedi. O, Heydər Əliyev ideyalarını müstəqilliyin çiçəkləndirilməsinin təminatçısı saydı. Ə.Əhmədov qeyd etdi ki, Heydər Əliyev ideyaları Azərbaycan iqtisadiyyatının strateji inkişafını təmin edən ideyalar məcmuəsu olaraq Azərbaycan cəmiyyətinin milli-mənəvi əsasını təşkil edir. O, Azərbaycanın dünəninin və bu gününün Heydər Əliyevin ideyalarına söykəndiyini söylədi: "Azərbaycanın inkişaf yolu Heydər Əliyevin islahatçılıq məfkurəsi ilə ifadə olunur. Böyük ideyaları böyük insanlar yarada bilər. Heydər Əliyev Azərbaycanın bu günü və gələcəyi üçün böyük ideyalar verib. Azərbaycanın inkişafının kökündə Heydər Əliyev ideyası dayanır". Milli Məclis sədrinin müavini Ziyafət Əsgərov "Azərbaycan Respublikasının Konstitusiyası müasir mərhələdə" mövzusunda çıxış etdi. Millət vəkili Azərbaycan Konstitusiyasının dövlətin və millətin hüquqlarının müdafiəçisi kimi tətbiq olunmasını Heydər Əliyevin uğurlu fəaliyyətinin nəticəsi saydı. Milli Məclisin komitə sədri Səməd Seyidov "Azərbaycanın xarici siyasət konsepsiyasının təkamülü" mövzusunda çıxış etdi. Komitə sədri dəyişən xətt üzrə inkişaf edən dünya siyasətində sabitliyin, təhlükəsizliyin azaldığı bir vaxtda Heydər Əliyevin bünövrəsini qoyduğu xarici siyasətin müəyyən bəhrələr verdiyini dilə gətirdi. S.Seyidov regionda toqquşan maraqlar zamanında Azərbaycanın Qərblə Şərqi birləşdirən strateji əhəmiyyətə malik dövlət kimi vurğuladı. Nizami Cəfərov "Azərbaycançılıq və Azərbaycanşünaslıq" mövzusunda çıxış edərək, Heydər Əliyev ideyalarının elmə çevrildiyini bildirdi: "Ən böyük ideya elmə çevrilən ideyadır. Daha çox yaşayan və uğur gətirəndir. Heydər Əliyevşünaslıq bizdə çox yaşayan bir sistemdir. O ideyalar elmə çevrilir ki, onlar praktikada qalib gəlir. Bu mənada Əliyevsşünaslıq qalib gəlməyə əsas verən bir sistemdir. Heydər Əliyevçilik hər şeydən əvvəl Azərbaycanşünaslıqdır". Plenar iclasdan sonra bölmə iclasları keçirildi. Birinci bölmədə"Heydər Əliyev və müasir Azərbaycan tarixi", ikinci bölmədə "Heydər Əliyev - Böyük islahatçı", üçüncü bölmədə isə "Böyük islahatların uğurlu davamı" mövzularında müzakirələr aparıldı. Konfrans öz işini bu gün davam etdirəcək.

Tahirə QAFARLI

Üç nöqtə .-2009.- 8 may.- S. 3.